హథ్రాస్ కేసు: రేప్ జరగలేదని ఫోరెన్సిక్ నివేదిక చెబుతోంది.. ఈ ప్రశ్నలకు సమాధానం ఏదీ?
హథ్రాస్ ఘటనలో బాధితురాలిపై అత్యాచారం జరిగిందనడానికి పక్కా ఆధారాల్లేవని ఫోరెన్సిక్ నివేదికలో వెల్లడయినట్టు ఉత్తర్ ప్రదేశ్ పోలీసులు ప్రకటించిన విషయం తెలిసిందే. అత్యాచారానికి పాల్పడిన వ్యక్తుల వీర్యం నమూనాలు కూడా లేవని ఎఫ్ఎస్ఎల్ నివేదిక పేర్కొంది. అయితే, బాధితురాలిపై దాడి జరిగిన 11 రోజుల తర్వాత నమూనాలు సేకరించి, పరీక్షించడాన్ని నిపుణులు ప్రశ్నిస్తున్నారు. యువతిపై అత్యాచారం జరగలేదని గురువారం ప్రకటించారు. ‘మెడపై తీవ్ర గాయం వల్లే బాధితురాలు చనిపోయిందని పోస్ట్‌మార్టం నివేదిక చెబుతోంది.. ఫోరెన్సిక్ నివేదిక సైతం వీర్యం నమూనాలు గుర్తించలేదంది.. అంటే ఇది కుట్రపూరితంగా రెండు వర్గాల మధ్య ఉద్రిక్తతలను పెంచడానికే ఇలా చేశారని అర్ధమవుతోంది.. అటువంటి వ్యక్తులను గుర్తించి చట్టపరంగా చర్యలు తీసుకుంటాం’ అని యూపీ పోలీస్ అధికారి ప్రశాంత్ కుమార్ వ్యాఖ్యానించారు. బాధితురాలిపై దాడి జరిగిన 11 రోజుల తర్వాత ఫోరెన్సిక్ ల్యాబ్‌కు నమూనాలు పంపితే శుక్రకణాల అప్పటి వరకూ ఉంటాయా? అని నిపుణులు ప్రశ్నిస్తున్నారు. సెప్టెంబరు 22న అలీగఢ్ ఆస్పత్రిలో సేకరించిన నమూనాలను మూడు రోజుల తర్వాత అంటే సెప్టెంబరు 25న ఎఫ్ఎస్ఎల్‌కు పంపినట్టు నివేదిక తెలిపింది. సెప్టెంబరు 14న బాధితురాలిపై అగ్రవర్ణాలకు చెందిన నలుగురు దాడికి పాల్పడగా.. తీవ్రగాయాలతో అపస్మారక స్థితిలో గ్రామ పొలిమేరల్లో ఉన్న ఆమెను కుటుంబసభ్యులు గుర్తించారు. బాధితురాలి గొంతుకోయడానికి నిందితుడు ప్రయత్నించినప్పుడు ఆమె నాలుక తెగిపోయి ఉంటుందని పోలీసులు పేర్కొన్నారు. అయితే, హడావుడిగా అర్థరాత్రి సమయంలో కుటుంబసభ్యులకే తెలియకుండా అంత్యక్రియలు చేపట్టాల్సిన అవసరం ఏంటి? అని నిలదీస్తున్నారు. ఈ కేసులో పోలీసుల వ్యవహార శైలిపై తీవ్ర ఆరోపణలు వెల్లువెత్తుతున్నాయి. బాధితురాలిపై సామూహిక అత్యాచారం జరగలేదని, ఆమె కుటుంబసభ్యులు అబద్దాలు చెబుతున్నారని పోలీస్ అధికారులే వ్యాఖ్యానించడంపై విమర్శలు గుప్పిస్తున్నారు. తమను అధికారులు బెదిరిస్తున్నారని బాధిత కుటుంబం ఆరోపిస్తోంది. దేశవ్యాప్తంగా ఈ ఘటనపై నిరసన పెల్లుబికడంతో ముగ్గురు పోలీస్ అధికారులు సస్పెండ్ చేశారు. అలాగే, కేసును సీబీఐకి అప్పగిస్తూ యూపీ ముఖ్యమంత్రి యోగి ఆదిత్యనాథ్ నిర్ణయం తీసుకున్నారు.
By October 05, 2020 at 11:39AM
No comments