Breaking News

భవిష్యత్ చర్చ‌ల అజెండాలో కశ్మీర్ ఉండబోదు.. పాక్‌కు భారత్ సంకేతాలు


గతేడాది ఆర్టికల్ 370ను భారత్ రద్దు చేసిన తర్వాత అంతర్జాతీయ వేదికలపై ఈ అంశాన్ని లేవనెత్తి సానుభూతి పొందడానికి పాకిస్థాన్ చేయని ప్రయత్నం లేదు. తాజాగా, మరోసారి కశ్మీర్ అంశాన్ని అంతర్జాతీయ వేదికపై పాక్ ప్రస్తావించగా.. భారత్ దీటుగా బదులిచ్చింది. ఈ వారం జరిగిన కామన్వెల్త్ దేశాల విదేశాంగ మంత్రుల సమావేశంలో పాకిస్థాన్ మంత్రి షా మొహమూద్ ఖురేషీ కశ్మీర్ అంశాన్ని ప్రస్తావించారు. దీనిపై భారత్ తీవ్ర అభ్యంతరం వ్యక్తం చేస్తూ ఇది తమ అంతర్గత వ్యవహారమని, ఇందులో ఎవరి జోక్యం అవసరంలేదని పునరుద్ఘాటించింది. అంతేకాదు, ఉగ్రవాదాన్ని పాక్ ప్రోత్సహిస్తోన్న విషయం ప్రపంచం మొత్తానికి తెలుసని స్పష్టం చేసింది. ఈ ప్రకటన కొత్తది కానప్పటికీ, కశ్మీర్‌పై మరో మాటలేదని, వాస్తవానికి పీఓకే పాక్ ఆక్రమణలో ఉందని పాకిస్థాన్‌కు స్పష్టమైన సంకేతం పంపింది. కశ్మీర్ అంశాన్ని పాక్ మంత్రి ప్రస్తావించగా.. విదేశాంగ శాఖ కార్యదర్శి వికాస్ స్వరూప్ తూర్పారబట్టారు. ‘మతపరమైన మైనారిటీలపై దారుణానికి పాల్పడిన దేశం నీతులు చెప్పడం విడ్డూరంగా ఉంది.. ఒక దేశం తన సొంత ప్రజలను చంపి, 49 సంవత్సరాల కిందట దక్షిణాసియాకు మారణహోమాన్ని తెచ్చిపెట్టింది’ అని పాక్‌పై వ్యంగ్యాస్త్రాలు సంధించారు. తర్వాత ఆసియా సొసైటీ వేదికపై విదేశాంగ మంత్రి ఎస్ జయశంకర్ మాట్లాడుతూ.. ఉగ్రవాదాన్ని సమర్థించే విధానాలను పాకిస్థాన్ ప్రభుత్వం బహిరంగంగా అంగీకరించింది.. కాబట్టి వారితో సాధారణ సంబంధాలు నిర్వహించడం చాలా కష్టమని పేర్కొన్నారు. మా అంతర్గత విషయమని స్పష్టం చేసిన జయశంకర్.. పాక్‌తో యథాపూర్వక సంబంధాలు పునరుద్దరణకు అవకాశం లేదని సంకేతాలు పంపారు. వాస్తవానికి ఇమ్రాన్ ఖాన్ సలహాదారు మొయీద్ యూసుఫ్.. భారత్‌తో భవిష్యత్ చర్చల పరిమితులను నిర్దేశించడం ఇరు దేశాల ఎంత దూరంలో ఉన్నాయో చూపించాయి. భారత్‌కు సంబంధించినంత వరకు.. కశ్మీర్ అంశంపై చర్చలు జరపడం ఇప్పుడు సమస్య కాదు. దివంగత విదేశాంగ మంత్రి సుష్మా స్వరాజ్ ప్రారంభించిన ‘సమగ్ర’ చర్చలు కూడా ప్రస్తుతం వర్తించవు. ముఖ్యంగా ఆర్టికల్ 370ను రద్దుచేసి జమ్మూ కశ్మీర్, లడఖ్‌ కేంద్రపాలిత ప్రాంతాలుగా ఏర్పాటుచేసిన తర్వాత భారత్, పాక్‌ల మధ్య చర్చలకు తలుపులు మూసుకుపోయాయి.


By October 24, 2020 at 08:59AM


Read More https://telugu.samayam.com/latest-news/india-news/india-signals-to-pakistan-kashmir-off-the-table-for-future-talks/articleshow/78839699.cms

No comments