భారత్-అమెరికా రక్షణ సహకారంలో మరో ముందుడుగు.. కీలక ప్రతిపాదనకు పెంటగాన్ ఆమోదం
సీ-130జే సూపర్ హెర్క్యూలస్ కార్గో యుద్ధ విమానాల అదనపు పరికరాలు, విడి భాగాలను భారత్ అమ్మడానికి అమెరికా సమ్మతించింది. మొత్తం 90 మిలియన్ డాలర్ల విలువైన కొనుగోలు ఒప్పందానికి అమెరికా రక్షణ శాఖ అమోద ముద్ర వేసింది. ప్రతిపాదిత అమ్మకం అమెరికా విదేశాంగ విధానం, జాతీయ భద్రతకు తోడ్పడుతుంది. అమెరికా-భారత్ వ్యూహాత్మక సంబంధాన్ని బలోపేతం చేయడానికి, ప్రధాన రక్షణ భాగస్వామి భద్రతను మెరుగుపరచడంలో సహాయపడుతుంది.. దక్షిణాసియా, ఇండో-పసిఫిక్‌ ప్రాంతంలో రాజకీయ స్థిరత్వం, శాంతి, ఆర్థిక పురోగతికి శక్తిగా మారుతుంది అని కాంగ్రెస్‌కు పెంటగాన్ తన అభిప్రాయాన్ని తెలియజేసింది. విమాన వినియోగ వస్తువులు, మరమ్మతు లేదా విడి భాగాలు, గ్రౌండ్ సపోర్ట్, కార్ట్‌రిడ్జ్ యాక్చుయేటెడ్ డివైజెస్ / ప్రొపెల్లెంట్ యాక్చుయేటెడ్ డివైజెస్(CAD/PAD) కోసం ఒప్పందం చేసుకుంది. అలాగే, ఏఎన్/ ఏఎల్ఆర్-56ఎం అడ్వాన్స్‌డ్ రాడార్ వార్నింగ్ రిసీవర్ షిప్‌సెట్, కౌంటర్‌మెజన్ డిస్పెన్సర్ సిస్టమ్ షిప్‌మెంట్, రాత్రివేళలో వినియోగించే పది తేలికపాటి బైనాక్యులర్స్, నైట్ విజన్ గాగుల్స్, జీపీఎస్, ఎలక్ట్రానిక్ యుద్ధ పరికరాలు కూడా ఇందులో ఉన్నాయి. ల్యాబ్ పరికరాలు, జాయింట్ మిషన్ ప్లానింగ్ సిస్టమ్, క్రిప్టోగ్రఫిక్ డివైజ్ స్పేర్స్, లోడర్స్, సాఫ్ట్‌వేర్, పబ్లికేషన్స్, సాంకేతిక డాక్యుమెంట్లు, వ్యక్తిగత శిక్షణ, శిక్షణ పరికరాలు, ఇంజినీరింగ్, సాంకేతిక సహకారాన్ని కూడా భారత్ కోరుతోంది. నోటిఫికేషన్ ప్రకారం.. ప్రతిపాదిత అమ్మకాలు భారత వైమానిక దళం, ఆర్మీ, నేవీ రవాణా అవసరాలు, స్థానిక, అంతర్జాతీయ మానవతా సహాయం, ప్రాంతీయ విపత్తు ఉపశమనం అవసరాలకు గతంలో కొనుగోలు చేసిన విమానం సమర్థవంతంగా పనిచేస్తుందని నిర్ధారిస్తుంది. ఈ అదనపు పరికరాలు పొందడంలో భారత్‌కు ఎలాంటి ఇబ్బంది ఉండదు.. ఈ ప్రాంతంలోని ప్రాథమిక సైనిక సమతౌల్యత మారదు. ఆయుధ ఎగుమతి నియంత్రణ చట్టం ప్రకారం.. పెద్ద మొత్తంలో ఒప్పందాలకు నోటిఫికేషన్ తప్పనిసరి. ప్రతిపాదనలను సమీక్షించడానికి చట్టసభ సభ్యులకు 30 రోజులు గడువు ఉంటుంది. సీ -130 జే సూపర్ హెర్క్యులస్ విమానాలను అమెరికా 17 దేశాలకు విక్రయించగా.. అందులో భారత్ ఒకటి. భారత వైమానిక దళం వద్ద ప్రస్తుతం ఐదు విమానాలు ఉన్నాయి. మరో ఆరు సూపర్ హెర్క్యులస్ విమానాల కోసం ఆర్డర్ ఇచ్చింది.
By October 02, 2020 at 12:47PM
No comments