ఎన్నికల ముందు ఎదురుదెబ్బ: ఆర్జేడీ మాజీ నేత హత్య.. లాాలూ తనయులపై కేసు
బిహార్‌లో ఆర్జేడీ పార్టీకి చెందిన మాజీ నేత శక్తి మాలిక్ గుర్తుతెలియని వ్యక్తుల చేతుల్లో ఆదివారం హత్యకు గురైన విషయం తెలిసిందే. అయితే, ఈ హత్యోదంతంలో ఆర్జేడీ కీలక నేతలు, లాలూ ప్రసాద్ యాదవ్ తనయులపై పోలీసులు కేసు నమోదుచేశారు. బీహార్ శాసన ఎన్నికలు నేపథ్యంలో ఆర్జేడీ నేతలపై హత్య కేసు నమోదుకావడం చర్చనీయాంశమయ్యింది. , తేజ్ ప్రతాప్ యాదవ్, అనిల్ కుమార్ సాధులతో పాటు ఆరుగురిని ఈ కేసులో నిందితులుగా చేర్చారు. శక్తిమాలిక్ కుటుంబ సభ్యుల ఫిర్యాదు మేరకు బీహార్ మాజీ డిప్యూటీ సీఎం తేజస్వీ యాదవ్, మాజీ ఆరోగ్యశాఖ మంత్రి తేజ్ ప్రతాప్ యాదవ్, ఎస్సీ, ఎస్టీ విభాగం రాష్ట్ర అధ్యక్షుడు అనిల్ కుమార్ సాధు పాశ్వాన్, అరారియాకు చెందిన ఆర్జేడీ నేత కాలో పాశ్వాన్ తదితరులపై కెహట్ పోలీసులు కేసు నమోదు చేశారు. కాగా, శక్తి మలిక్ తన నివాసంలో హత్యకు గురయ్యారు. ఆదివారం ఉదయం ఆయన నిద్రిస్తుండగానే గుర్తుతెలియని వ్యక్తులు బైక్‌పై వచ్చి తుపాకీతో కాల్పు జరిపి పరారయ్యారు. దుండగుల కాల్పుల్లో తీవ్రంగా గాయపడిన శక్తి మలిక్ ఆస్పత్రికి తరలించేలోపే ప్రాణాలు కోల్పోయాడు. ఈ ఘటనపై శక్తి మలిక్ భార్య ఖుష్బూ దేవి పోలీస్ స్టేషన్‌లో ఫిర్యాదు చేశారు. ఇదిలా ఉండగా మాలిక్‌ను తేజస్వీ యాదవ్ బెదిరించినట్టు ఓ వీడియో సోషల్ మీడియాలో చక్కర్లు కొడుతోంది. రాణిగంజ్ స్థానం నుంచి పోటీ చేయాలంటే రూ.50 లక్షలు విరాళంగా అడిగారని, నియోజకవర్గంలో పనులు కొనసాగిస్తే అంతుచూస్తానని బెదిరించినట్టు మాలిక్ ఆరోపించిన వీడియో వైరల్ అయ్యింది. తేజస్వీ యాదవ్, ఆయన సోదరుడు ప్రతాప్ సహా ఆరుగురిపై ఎఫ్ఐఆర్ నమోదయినట్టు పూర్ణియా ఎస్పీ విశాల్ శర్మ తెలిపాడు.
By October 05, 2020 at 09:30AM
No comments