కాంగ్రెస్ ట్రబుల్ షూటర్ డీకే శివకుమార్ నివాసంలో సీబీఐ దాడులు
కాంగ్రెస్ ట్రబుల్ షూటర్, కర్ణాటక కాంగ్రెస్ అధ్యక్షుడు నివాసంలో సోమవారం ఉదయం అధికారులు ఆకస్మిక దాడులు చేశారు. అవినీతి ఆరోపణల కేసులోనే ఈ దాడులు చేసినట్టు తెలుస్తోంది. మొత్తం 14 ప్రాంతాల్లో సీబీఐ ఏకకాలంలో దాడులు నిర్వహించినట్టు సమాచారం. పూర్తి వివరాలు తెలియాల్సి ఉంది. సిరా, రాజరాజేశ్వర్ నగర్ స్థానాలకు ఉప-ఎన్నికలు జరుగుతున్న వేళ.. శివకుమార్ నివాసంలో సీబీఐ సోదాలు నిర్వహించడం రాజకీయ వర్గాల్లో చర్చకు దారితీసింది. కర్ణాటక పీసీసీ అధ్యక్షుడిగా శివకుమార్ బాధ్యతలు చేపట్టిన తర్వాత జరుగుతోన్న ఎన్నికలు కావడంతో ఆయన దీనిని సవాల్‌గా తీసుకున్నారు. ఇదిలా ఉండగా.. మనీలాండరింగ్ కేసులో గతేడాది సెప్టెంబరులో శివకుమార్‌ను ఎన్‌ఫోర్స్‌మెంట్ డైరెక్టరేట్ అరెస్ట్ చేసింది. ఆదాయ పన్ను శాఖ ఫైల్ చేసిన ఛార్జిషీట్ ఆధారంగా కాంగ్రెస్ నేతపై ఈడీ కేసు చేసి అదుపులోకి తీసుకుంది. 50 రోజుల తర్వాత బెయిల్ లభించడంతో ఆయన అక్టోబరు 23న తీహార్ జైలు నుంచి విడుదలయ్యారు. మనీలాండరింగ్ కేసులో ఢిల్లీ హైకోర్టు బెయిల్ మంజూరు చేసింది. తీహార్ జైల్లో రిమాండ్‌ ఖైదీగా ఉన్న ఆయన గతంలో అనేక మార్లు అయన బెయిల్ కోసం దాఖలు చేసినా కోర్టు కొట్టేసింది. ఇక, 2017 రాజ్యసభ ఎన్నికల్లో గుజరాత్ కాంగ్రెస్ ఎమ్మెల్యేలు చేజారకుండా చూసుకోవడంలో.. కర్ణాటకలో జేడీఎస్, కాంగ్రెస్ కూటమి అధికారంలోకి రావడం కోసం.. కాంగ్రెస్ నేతలు చేజారకుండా చూడటంలో.. రిసార్ట్ రాజకీయాల్లో ఆయన కీలక పాత్ర పోషించారు. డీకే శివకుమార్ మరో ముగ్గురితో కలిసి లెక్క చూపని నగదును హవాలా మార్గంలో భారీ మొత్తంలో తరలించారని ఇన్‌కమ్ ట్యాక్స్ విభాగం ఆరోపిస్తోంది. సింగపూర్‌లో తన తల్లి పేరిట ఉన్న ఆస్తులు, ఢిల్లీలో డీకే పేరిట ఉన్న ప్లాట్ల గురించి ఈడీ ఆరా తీస్తోంది.
By October 05, 2020 at 09:51AM
No comments