పర్వత యుద్ధంలో భారత్‌ను ఎదుర్కొనలేక పాక్ సాయంతో చైనా కుట్ర.. సాక్ష్యం ఇదే

సరిహద్దుల్లో భారత్‌‌ను ఎదుర్కోవడానికి పొరుగు దేశాలు చైనా, పాకిస్థాన్‌ ఒకరికొకరు సాయం చేసుకుంటున్నాయి. ఇటీవల తూర్పు లడఖ్‌లో భారత్-చైనాల మధ్య నెలకున్న ప్రతిష్టంభన విషయంలో చైనా‌కు సాయంగా దాయాది తన సైన్యాలను పంపినట్టు కథనాలు వెలువడుతున్నాయి. పర్వత యుద్ధతంత్రలో భారత్‌ను ఎదుర్కోవడం చైనా పీపుల్స్‌ లిబరేషన్‌ ఆర్మీకి కష్టంగా మారడంతో పాక్ తన బలగాలను పంపిందనడానికి సాక్ష్యంగా ఓ వీడియో సోషల్ మీడియాలో చక్కర్లు కొడుతోంది. ఇటీవల చైనాకు చెందిన సీజీటీఎన్‌ న్యూస్‌ ప్రొడ్యూసర్‌ షెన్‌ సీవే ట్విటర్‌లో ఒక వీడియోను షేర్ చేశారు. 52 సెకెన్ల నిడివి ఉన్న ఈ వీడియోలో 0.05 సెకన్ల వద్ద కనిపించిన ఓ వ్యక్తి చైనీయులకు భిన్నంగా ఉన్నాడు. పొడువాటి గడ్డంతో ఉన్న ఆ వ్యక్తి ఎవరూ అనే విషయాన్ని మాత్రం షెన్‌ ప్రస్తావించలేదు. అయితే, ఈ వీడియోను విశ్లేషించిన సైనిక నిపుణులు మాత్రం ఆ వ్యక్తి పాకిస్థాన్‌ ఆర్మీకి చెందిన ఎస్‌ఎస్‌జీ కమాండో అని ధ్రువీకరిస్తున్నారు. భారత్‌ను ఇబ్బందులకు గురిచేసేందుకు అనుంగు మిత్రులు పరస్పరం సహకరించికుంటున్నారు. గిల్గిత్- బాల్టిస్థాన్‌లోని పాక్ అభివృద్ధి చేసిన స్కర్దూ వైమానిక స్థావరంలో జూన్‌లో చైనాకు చెందిన ఐఎల్‌-78 ట్యాంకర్‌ విమానం కనిపించింది. దీంతో ఈ రెండు దేశాలు ఏ స్థాయిలో పరస్పరం సహకరించుకొంటున్నాయో అర్థం చేసుకోవచ్చు. చైనాకు చెందిన సైనిక నిపుణుడు హాంగ్‌ గుజి భారత్‌ పర్వత యోధుల శక్తి గురించి ఇటీవల మోడెర్న్ వెపనరీ పత్రికలో వ్యాసం రాశారు. అమెరికా, రష్యా, ఐరోపా దేశాల్లోనూ భారత్‌ కంటే శక్తిమంతమైన మౌంటేన్‌ వార్ఫేర్‌ బృందం లేదని పేర్కొన్నారు. అయితే, ఈ విషయంలో భారత్ వ్యూహాత్మకంగా ముందుకు వెళ్లింది. 1962, 67ల్లో చైనా తీరును చూసిన భారత్‌ 1970 నుంచి పర్వత యుద్ధతంత్రంపై దృష్టి సారించింది. పాక్‌, మయన్మార్‌ సరిహద్దుల్లో పర్వత ప్రాంతం ఎక్కువగా ఉండటంతో ఇక్కడ నుంచే శత్రువులు, ఉగ్రవాదులు దేశంలోకి చొరబడుతుంటారు. దీంతో పర్వతాలపై పట్టు సాధించడానికి సైనికులకు పర్వత యుద్ధతంత్రంపై భారత్ శిక్షణ ఇచ్చింది. మన బలగాల్లో అత్యధిక మంది సర్వీసు కూడా పర్వతాలపైనే ఉంటోంది. మౌంటెన్‌ స్ట్రైక్‌ గ్రూప్‌ను ఏర్పాటు చేయడంపై కూడా దృష్టిపెట్టింది. ఓ అంచనా ప్రకారం.. భారత్‌ వద్ద దాదాపు 12 డివిజన్లతో 2,00,000 మంది పర్వత యుద్ధతంత్ర నిపుణులు ఉన్నారు. వీరికి అదనంగా పారామిలటరీ సిబ్బంది పలు చోట్ల పర్వత కనుమల వద్ద పహారా బాధ్యతలు నిర్వహిస్తోంది. ప్రపంచంలోనే అత్యంత ఎత్తయిన యుద్ధభూమి సియాచిన్‌లో పనిచేసిన అనుభవం భారత సైనికుల సొంతం. అక్కడ కనీసం ఆరువేల మంది సిబ్బంది నిత్యం పహారా కాస్తున్నారు.

By October 05, 2020 at 07:43AM

Read More https://telugu.samayam.com/latest-news/international-news/pakistan-army-helping-china-deal-with-indias-mountain-warfare-forces-at-lac/articleshow/78484332.cms