గృహ హింసపై సుప్రీం సంచలన తీర్పు.. వేలాది మంది మహిళలకు ఊరట

గృహ హింసను ఎదుర్కొంటున్న వేలాది మంది మహిళలకు ఊరట కలిగించే తీర్పును వెలువరించింది. అత్తమామలు, ఆడపడుచులు లేదా ఇతర కుటుంబ సభ్యులు గానీ కోడళ్లను ఇంటి నుంచి గెంటేయడం కుదరదని స్పష్టం చేసింది. ‘వివాహమైన తర్వాత భర్తతో కలిసున్నా లేదా ఒంటరిగా ఓ ఇంట్లో ఉంటున్నపుడు అక్కడ ఉండే హక్కు ఆ మహిళకు (కోడలికి) ఉంటుంది. ఆ ఇల్లు భర్త లేదా అత్తమామలు లేదా భర్త తరఫు బంధువుల పేరున ఉన్నా లేక కుటుంబం ఉమ్మడి ఆస్తి అయినా.. చివరకు అద్దె ఇల్లయినా సరే... ఆమెకు 2005నాటి గృహ హింస-వ్యతిరేక చట్టం ప్రకారం ఆ కుటుంబంతో కలిసి ఉండే హక్కు ఉంటుంది. ఆ మహిళకు ఆ ఇంటితో గృహసంబంధమైన (సంసార) బంధం ఉండడం తప్పనిసరి’ అని జస్టిస్‌ అశోక్‌ భూషణ్‌, జస్టిస్‌ సుభాష్‌ రెడ్డి, జస్టిస్‌ ఎంఆర్‌ షాలతో కూడిన త్రిసభ్య ధర్మాసనం వ్యాఖ్యానించింది. చట్టం ప్రకారం ఒక మహిళ నివసించే హక్కును పరిరక్షించే మధ్యంతర ఉత్తర్వు ఆస్తికి సంబంధించిన సివిల్ కేసుల కిందకు రాదని పేర్కొంది. గృహ హింస చట్టం నివాస హక్కుకు సంబంధించి సెక్షన్ 19 ప్రకారం ఏదైనా సివిల్ వివాదం ప్రారంభించడానికి లేదా కొనసాగించడానికి ఆంక్షలు కాదు, ఈ చట్టం కింద విచారణలో ఇచ్చిన మధ్యంతర లేదా తుది ఉత్తర్వులకు సంబంధించినవని తెలిపింది. ఇదే అంశంపై 2007లో ద్విసభ్య ధర్మాసనం ఇచ్చిన తీర్పును కొట్టివేసింది. ఇల్లు ఆమెది కానపుడు, సదరు ఇంట్లో ఉండే హక్కు ఆమెకు ఉండదంటూ 2007లో ద్విసభ్య ధర్మాసం తీర్పు ఇచ్చింది. ‘సదరు ఇల్లు ఉమ్మడి కుటుంబానిదా లేక మరింకెవరిదా అన్న విషయాన్ని కేసు దాఖైలన కోర్టు లేదా కుటుంబ న్యాయస్థానం తేల్చాలి. అంతేకాదు... రాజ్యాంగంలోని ఆర్టికల్‌ 19 ప్రకారం సంక్రమించిన నివాస హక్కు రద్దు చేయడానికి వీల్లేని అనివార్యమైన హక్కు కాదు. వయసుపైబడ్డ తలిదండ్రులు (అత్తమామలు) తమ జీవన సాయం సంధ్యలో ఎక్కడికి పోగలరు? వారికీ ఆ ఇంట్లో ఉండే హక్కుంటుంది. కొడుకు-కోడలి మధ్య గొడవలకు వారిని బలిచేయడం సరికాదు. ఆ నివాస హక్కు ఇరువురికీ ఉంటుంది. దీన్ని సక్రమంగా సమతౌల్యత చేయాల్సిన బాధ్యత సదరు (ఫ్యామిలీ) కోర్టుది’ అని బెంచ్‌ వివరించింది. సతీశ్‌చందర్‌ ఆహూజా అనే 76-ఏళ్ల వ్యక్తి వేసిన కేసుపై బెంచ్‌ ఈ తీర్పునిచ్చింది. అహుజా కోడలను ఇళ్లు ఖాళీచేయాలని ట్రయల్ కోర్టు ఆదేశాలివ్వగా.. దీనిని ఢిల్లీ హైకోర్టు పక్కన పెట్టింది. అనంతరం పలు సూచనలు జారీచేసి, ఈ కేసును కొత్తగా నిర్ణయించాలని సివిల్ కోర్టును కోరింది. ఈ ఆస్తి తనకు చెందినదని, తన కొడుకు లేదా కోడలికి దానిపై యాజమాన్య హక్కులు లేవని అహుజా వాదించారు.

By October 16, 2020 at 08:52AM

Read More https://telugu.samayam.com/latest-news/india-news/relief-of-right-to-residence-to-woman-under-domestic-violence-law-relevant-in-civil-courts-sc/articleshow/78692948.cms