ఐదు నెలల్లోపు యాంటీబాడీలు తగ్గితే మరోసారి కరోనా వైరస్ దాడి

నుంచి కోలుకున్న బాధితులకు ఐదు నెలల్లో యాంటీబాడీలు తగ్గితే వారికి మళ్లీ వైరస్‌ సోకే అవకాశం ఉందని ఐసీఎంఆర్‌ హెచ్చరించింది. కాబట్టి, ఒకసారి కోవిడ్‌-19 సోకినవారు సైతం తప్పనిసరిగా మాస్క్‌ను ధరించడం వంటి జాగ్రత్తలు పాటించాలని ఐసీఎంఆర్ డైరెక్టర్ జనరల్ బలరాం భార్గవ సూచించారు. మంగళవారం ఆయన మీడియాతో మాట్లాడుత్తూ.. కరోనా వ్యాప్తికి అడ్డుకట్టే వేయడానికి ప్రతి ఒక్కరూ మాస్క్‌ను ధరించాలని విజ్ఞప్తి చేశారు. అహ్మదాబాద్‌లో ఒకటి, ముంబయిలో రెండు రీఇన్ఫెక్షన్‌ కేసులు నమోదయ్యాయని తెలిపారు. ప్రపంచ ఆరోగ్య సంస్థ వెల్లడించిన వివరాల ప్రకారం ప్రపంచ వ్యాప్తంగా 24 రీఇన్ఫెక్షన్‌ కేసులు నమోదయ్యాయని పేర్కొన్నారు. ‘కోవిడ్-19 బారినపడి కోలుకున్న బాధితులకు మరోసారి వైరస్ నిర్ధారణ కావడానికి వారిలో యాంటీబాడీలు మూడు నుంచి ఐదు నెలల్లోనే తగ్గినట్టు గుర్తించాం’ అని బలరాం భార్గవ వివరించారు. ‘కోవిడ్ నుంచి కోలుకున్న 90 రోజుల తర్వాత మళ్లీ వైరస్ నిర్ధారణ అయితే దానిని రీఇన్‌ఫెక్షన్ అని సీడీసీ చెబుతోంది.. డేటాను దానికి అనుగుణంగా పరిగణిస్తామం.. ఆ సమాచారం మాకు వచ్చిన వెంటనే అందజేస్తాం’ అని మీడియా ప్రతినిధులు అడిగిన ప్రశ్నకు సమాధానం ఇచ్చారు. యాంటీబాడీలు మూడు నెలల్లో తగ్గిపోతున్నట్టు కొన్ని అధ్యయనాలు.. ఐదు నెలల్లో కోల్పోతున్నట్టు ఇంకొన్ని చెబుతున్నాయన్నారు. అయితే, ఇది కొత్తరకం వ్యాధి కావడంతో పరిమితి సమాచారం మాత్రమే అందుబాటులో ఉందన్నారు. ఐదు నెలల్లోపు యాంటీబాడీలు తగ్గిపోతే మరోసారి వైరస్ బారినపడే ప్రమాదం ఉందన్నారు. దేశంలో కొవిడ్ బాధితులకు ఆక్సిజన్‌ సరఫరాలో కొరత లేదని, అవసరానికి మించి అందుబాటులో ఉందని కేంద్రం వెల్లడించింది. గత పది నెలలుగా ఆక్సిజన్‌ కొరత లేదని, సెప్టెంబర్‌ నాటికి 6 వేలకు పైగా మెట్రిక్‌ టన్నుల ఆక్సిజన్‌ ఉత్పత్తి సామర్థ్యం కలిగి ఉన్నామని కేంద్ర ఆరోగ్య శాఖ కార్యదర్శి రాజేశ్ భూషణ్ వెల్లడించారు. అక్టోబర్‌ చివరికల్లా ఆ సామర్థ్యం ఇంకా పెరుగుతుందని, దేశంలో 246 ఆక్సిజన్‌ ఉత్పత్తి ప్లాంట్లను కొత్తగా ప్రారంభించేందుకు కేంద్రం నిర్ణయం తీసుకుందన్నారు. ఇందులో భాగంగా తొలి దశలో 18 రాష్ట్రాలు, కేంద్ర పాలిత ప్రాంతాల్లో 67 ప్లాంట్లు, రెండో దశలో 30 రాష్ట్రాల్లో 150 ప్లాంట్లు ప్రారంభమవుతాయనిి తెలిపారు. ఆక్సిజన్‌ అందుబాటు విషయంలో భారత్‌ అనుకూల వాతావరణంలో ఉందని, ఐసీయూ, వెంటిలేటర్‌, ఆక్సిజన్‌ ఆధారిత బెడ్లు 43 వేల నుంచి 75 వేలకు పెరిగాయని రాజేశ్‌ భూషణ్‌ వెల్లడించారు.

By October 21, 2020 at 06:56AM

Read More https://telugu.samayam.com/latest-news/india-news/if-antibodies-in-a-person-reduce-in-5-months-there-is-a-possibility-of-covid-19-reinfection/articleshow/78779597.cms