ఉలిక్కిపడ్డ పాక్.. సైన్యం రిగ్గింగ్ వల్లే ఇమ్రాన్ గెలిచారని మాజీ ప్రధాని వ్యాఖ్యలు
పాక్ ప్రధాని ఎన్నికపై పాకిస్థాన్ మాజీ ప్రధాని చేసిన వ్యాఖ్యలతో తీవ్ర కలకలం రేగుతోంది. పాక్ సైన్యాన్ని లక్ష్యంగా చేసుకుని విమర్శలు గుప్పించిన షరీఫ్.. సైన్యం సహకారంతోనే ఇమ్రాన్ ఖాన్ ఎన్నికల్లో గెలిచారని గురువారం ఆరోపించారు. 2018 ఎన్నికల్లో పాకిస్థాన్ సైనికులు రిగ్గింగ్ వంటి నేరాలకు పాల్పడిందని దుయ్యబట్టారు. ప్రస్తుతం ఉన్న ప్రధానిని ప్రజలు ఎన్నుకోలేదని, సైన్యమే గెలిపించిందని షరీఫ్ వ్యాఖ్యానించారు. పాకిస్థాన్ ఎలక్ట్రానిక్‌ మీడియా కొన్ని ప్రత్యేక పరిస్థితుల్లో ఆయా వ్యక్తుల ప్రసంగాలు, ఇంటర్వ్యూలు ప్రసారం చేయకుండా స్వీయ నియంత్రణ విధించుకుంది. దేశం నుంచి పరారైన వ్యక్తులు, బహిష్కరించిన నేతలు, ప్రకటిత నేరస్థులకు ఈ నియంత్రణ వర్తిస్తుంది. ప్రస్తుతం లండన్‌లో ఉంటున్న నవాజ్ షరీఫ్ చాలా రోజుల తర్వాత మీడియాలో మాట్లాడారు. ఈ ప్రసంగం అక్కడ న్యూస్‌ ఛానళ్లలో ప్రసారం కావడంతో పాకిస్థాన్ ఎలక్ట్రానిక్‌ మీడియా అథారిటీ (పీఈఎంఆర్ఏ) సత్వరం స్పందించింది. షరీఫ్ ఉదంతాన్ని ఉటంకిస్తూ అన్ని ఛానళ్లకు సూచనలు జారీ చేసిన పీఈఎంఆర్ఏ.. వీటిని ఉల్లంఘించినవారిపై కఠిన చర్యలు తీసుకుంటామని హెచ్చరించింది. మూడుసార్లు పాక్ ప్రధానిగా బాధ్యతలు చేపట్టిన షరీఫ్ 2017లో అవినీతి ఆరోపణల కారణంగా కోర్టు ద్వారా పదవీచ్యుతుడయ్యారు. పాకిస్థాన్ ముస్లిం లీగ్ నవాజ్ (పీఎంఎల్-ఎన్) సీడబ్ల్యూసీ సమావేశంలో షరీఫ్ వీడియో ద్వారా మాట్లాడుతూ.. తన పోరాటం ఎంచుకున్న ప్రభుత్వానికి వ్యతిరేకంగా కాదని, రిగ్గింగ్ ద్వారా ఎంపికైన పాలకుడిపైనే అని వ్యాఖ్యానించారు. ‘మిమ్మల్ని అధికారంలోకి తెచ్చిన వ్యక్తులు ఎక్కడ ఉన్నారు? వారు దేశానికి కూడా సమాధానం చెప్పాలి. మేము అతనికి ఎటువంటి ప్రాముఖ్యత ఇవ్వం. అతను ఈ దేశానికి మీరు నిర్ణయించి ఎంపిక చేసిన ప్రధానమంత్రి’ అని ప్రభుత్వాన్ని ఉద్దేశించి వ్యాఖ్యలు చేశారు.‘ఈ బహుమానం ఇచ్చిన వారు సమాధానం చెప్పాలి ... పాక్ ప్రజల ఎన్నికలను, ఆదేశాన్ని ఎందుకు తస్కరించారు? అని నిలదీశారు. ఇదిలా ఉండగా.. సెప్టెంబరు 20 నుంచి పాక్ ప్రతిపక్ష నేతలు సైన్యానికి వ్యతిరేకంగా ప్రసంగాలు చేస్తున్నారు. అయితే, దీని వెనుక భారత్ హస్తముందని అధికార పార్టీ ఎదురుదాడి చేస్తోంది. భారత్ ప్రోద్బలంతోనే షరీఫ్ ఇటువంటి వ్యాఖ్యలు చేస్తున్నారని ఇమ్రాన్ ఆరోపించారు.
By October 03, 2020 at 07:29AM
No comments