హథ్రాస్ ఘటన: బారికేడ్లతో గ్రామం అష్టదిగ్బంధనం.. మీడియాతో మాట్లాడే వీల్లేకుండా 144 సెక్షన్‌
హాథ్రాస్‌ ఘటనపై దేశవ్యాప్తంగా నిరసననలు హోరెత్తుతున్నాయి. ఈ ఘటన పట్ల ఉత్తర్ ప్రదేశ్‌ ప్రభుత్వం వ్యవహరిస్తున్న తీరుపై సర్వత్రా విమర్శలు వెల్లువెత్తుతున్నాయి. అయితే, బీజేపీ ప్రభుత్వం మాత్రం ఈ ఘటనపై ప్రత్యేక బృందం(సిట్) దర్యాప్తు ముగిసే వరకు ఎలాంటి నిరసనలకు అనుమతి ఉండబోదని స్పష్టం చేసింది. హాథ్రాస్‌ జిల్లాలోని బాధిత గ్రామం చుట్టూ బారికేడ్లు కట్టి, 144 సెక్షన్‌ విధించారు. బాధిత కుటుంబాన్ని ఎవరూ కలవకుండా, ఆ గ్రామం నుంచి ఎవరూ బయటకు రాకుండా పోలీసులు అడ్డుకుంటున్నారు. మీడియాతో మాట్లాడనివ్వకుండా.. బాధితురాలి కుటుంబం దగ్గర ఉన్న మొబైల్‌ ఫోన్‌లను లాక్కున్నారు. పొలాల్లో దాక్కుంటూ రహస్యంగా గ్రామంలోకి వెళ్లేందుకు ప్రయత్నించిన మీడియా ప్రతినిధులను అడ్డుకున్నారు. మీడియా విజ్ఞప్తితో బాధిత కుటుంబం ఒక బాలుడిని గ్రామం వెలుపల ఉన్న జర్నలిస్ట్‌లను కలిసేందుకు పంపింది. ఆ బాలుడిని మధ్యలోనే అడ్డుకున్న పోలీసులు, అతడి దగ్గర ఉన్న ఫోన్‌ లాక్కున్నారు. దాంతో మీడియాకు బాధిత కుటుంబంతో కనెక్షన్‌ పూర్తిగా తెగిపోయింది. అయితే, బాలుడు పోలీసుల కళ్లుగప్పి పొలాల్లో నక్కుతూ వెళ్లి మీడియా ప్రతినిధులను కలిశాడు. పోలీసులు తమను బెదిరిస్తున్నారని, గ్రామం నుంచి బయటకు వెళ్లనివ్వడం లేదని తెలిపాడు. బాలుడు మీడియా ముందు మాట్లాడుతుండగానే పోలీసులు వచ్చి అడ్డుకున్నారు. ఇదిలా ఉండగా.. ఈ ఘటన విషయంలో నిర్లక్ష్యంగా వ్యవహరించిన నలుగురు అధికారులను ప్రభుత్వం సస్పెండ్ చేసింది. హథ్రాస్ ఎస్పీ విక్రాంత్ వీర్, ఘటన జరిగిన చందా పోలీస్ స్టేషన్‌లోని మరో నలుగురిని సస్పెండ్ చేస్తూ ప్రభుత్వం శుక్రవారం ఉత్తర్వులు జారీచేసింది. సదాబాద్ సర్కిలల్ ఆఫీసర్ రామ్ షబ్డ్, స్టేషన్ హౌస్ ఆఫీసర్ దినేశ్ కుమార్ వర్మ, ఎస్ఐ జగ్‌వీర్ సింగ్, క్లర్క్ మహేశ్ పాల్‌ను తాత్కాలికంగా విధుల నుంచి తప్పించారు. మరోవైపు, ఈ కేసుతో సంబంధం ఉన్న నిందితులు, బాధిత కుటుంబం, పోలీసులకు పాలీగ్రాఫ్, నార్కో టెస్ట్‌లు నిర్వహించాలని సిట్ సిఫార్సు చేసింది. బాధితుల గ్రామానికి వచ్చిన తృణమూల్‌ మహిళా ప్రతినిధి బృందానికీ పోలీసుల నుంచి చేదు అనుభవం ఎదురైంది. తృణమూల్‌ కాంగ్రెస్‌ నేత డెరెక్‌ ఒబ్రెయిన్‌ నేతృత్వంలో ఆ పార్టీ మహిళా ఎంపీ ప్రతిమా మండల్‌, ఇతర మహిళా నేతలు గ్రామంలోకి ప్రవేశించక ముందే యూపీ పోలీసులు అడ్డుకున్నారు. డెరెక్‌ ఒబ్రెయిన్‌ను లాగి కిందపడేశారు గ్రామానికి ఒకటిన్నర కిలోమీటర్ల దూరంలో వారిని ఆపేశారు. పరామర్శించి వెళ్లిపోతామని చేతులు జోడించి బతిమలాడారు. అయినా, పోలీసులు అంగీకరించలేదు.
By October 03, 2020 at 08:05AM
No comments