Hyderabad Bullet Train కొత్తగా ఏడు బుల్లెటు రైలు ప్రాజెక్టులు..హైదరాబాద్ మార్గంలో ఒకటి!
దేశంలో తొలి బుల్లెట్ రైలు ముంబయి-అహ్మదాబాద్ మధ్య 2023 నాటికి అందుబాటులోకి వస్తుందని కేంద్ర ప్రభుత్వం ప్రకటించిన విషయం తెలిసిందే. అయితే, అనివార్య కారణాల వల్ల ఈ ప్రాజెక్టు మరో ఐదేళ్లు వెనక్కు వెళ్లే సూచనలు కనిపిస్తున్నాయి. ఇదిలా ఉండగా కొత్తగా మరో ఏడు బుల్లెట్ రైలు ప్రాజెక్టులకు కేంద్రం ప్రణాళికలు రూపొందించింది. ఇందులో ముంబయి- హైదరాబాద్ బుల్లెట్ రైలు మార్గం కూడా ఒకటి. ‘ఏడు కొత్త కారిడార్లకు సంబంధించిన సమగ్ర ప్రాజెక్టు నివేదిక (డీపీఆర్)లను సిద్ధం చేయాలని జాతీయ హైస్పీడ్ రైలు కార్పొరేషన్ (ఎన్హెచ్ఎస్ఆర్సీఎల్)ను కేంద్రం ఆదేశించింది. ఈ ఏడు ప్రాజెక్టుల మొత్తం అంచనా వ్యయం దాదాపు రూ.10 లక్షల కోట్లు’ అని ఓ అధికారి వెల్లడించారు. ఢిల్లీ- వారణాసి (865 కిలోమీటర్లు); ముంబయి- హైదరాబాద్ (711 కిలోమీటర్లు); చెన్నై- మైసూర్ (435 కిలోమీటర్లు); ఢిల్లీ- చంఢీగఢ్- లుధియానా, జలంధర్ మీదుగా అమృత్సర్ (459 కిలోమీటర్లు), ఢిల్లీ-అహ్మదాబాద్ (866 కిలోమీటర్లు); వారణాసి-హౌరా (760 కిలోమీటర్లు) మార్గాల్లోనూ బుల్లెట్ రైళ్లను ఏర్పాటు చేయాలని కేంద్రం భావిస్తోంది. ప్రాజెక్టు మొత్తం 4,869 కిలోమీటర్ల దూరం ఉంటుందని అంచనా వేసినట్లు తెలుస్తోంది. తొలి బుల్లెట్ రైలు ప్రాజెక్టు ముంబయి-అహ్మదాబాద్ మధ్య (508.17 కిలోమీటర్లు) కేంద్ర ప్రభుత్వం ఇప్పటికే ప్రారంభించింది. దాని అంచనా వ్యయం రూ.1.08 లక్షల కోట్లు. ముంబై-అహ్మదాబాద్ బుల్లెట్ రైలు పనులకు 2017 సెప్టెంబరు 14 జపాన్ ప్రధాని షింజో అబేతో కలసి ప్రధాని నరేంద్ర మోదీ శంకుస్థాపన చేశారు. ఈ ప్రాజెక్టుకు జపాన్ ఆర్ధిక, సాంకేతిక సహకారం అందజేస్తోంది. రూ.79 వేల కోట్ల రుణం భారత్కు ఇచ్చేందుకు జపాన్ అంగీకరించింది. ఈ ప్రతిష్టాత్మక ప్రాజెక్టు కోసం 100 ఇంజినీర్లు జపాన్ నుంచి భారత్కు వచ్చారు. వాస్తవానికి ఆ మార్గంలో 2023 డిసెంబరు నాటికి బుల్లెట్ రైలు సేవలను అందుబాటులోకి తేవడమే లక్ష్యంగా పెట్టుకుంది. అయితే- భూ సేకరణ సంబంధిత సమస్యలు, కరోనా మమ్మారి విజృంభణ వంటి ఆటంకాలతో 2028 అక్టోబరుకు వాయిదా పడే సూచనలు ఉన్నాయి. ముంబయి-అహ్మదాబాద్ ప్రాజెక్టు కోసం ఇప్పటివరకు 63 శాతం భూ సేకరణ పూర్తయింది.
By September 15, 2020 at 07:35AM
No comments