ప్రధాని మోదీ సహా భారత్‌లోని కీలక వ్యక్తులపై చైనా నిఘా..!
మాటలకు, చేతలకు ఏ మాత్రం పొంతన ఉండదనే సంగతి తెలిసిందే. అమెరికాను దాటేసి.. అగ్రరాజ్యంగా నిలవడం.. ఈ ప్రపంచాన్ని తన గుప్పిట్లో పెట్టుకోవడం దాని లక్ష్యం. మరో 30 ఏళ్లలో తిరుగులేని శక్తిగా ఎదగాలని భావిస్తోన్న డ్రాగన్.. అందుకోసం వెళ్తున్న దారి మాత్రం సరిగా లేదు. తనకు పోటీ వస్తుందనుకున్న దేశాలతో కయ్యానికి కాలు దువ్వడం.. ఆర్థిక ప్రయోజనాల ఆశ చూపి చిన్న దేశాలను తనవైపు లాగేసుకోవడం.. ఆ తర్వాత అప్పులు తీర్చాలని బెదిరించడం ఇది డ్రాగన్ వ్యవహారం. అమెరికాతోపాటు ఆ దేశంతో సన్నిహితంగా మెలుగుతున్న భారత్‌పైనా చైనా నిఘా పెట్టింది. ప్రధాని మోదీ, రాష్ట్రపతి, రాష్ట్రాల సీఎంలు.. కేబినెట్ మంత్రులు.. ప్రతిపక్ష నేతలు... ఇలా పది వేల మందికిపైగా వ్యక్తులు, సంస్థలపై డ్రాగన్ నిఘా వేసింది. షెంజాన్‌కు చెందిన టెక్నాలజీ సంస్థ జెన్హువా డేటా ఇన్ఫర్మేషన్ టెక్నాలజీ లిమిటెడ్.. ‘ఫారిన్ టార్గెట్స్’తో గ్లోబల్ డేటాబేస్ నిర్వహిస్తోంది. చైనా ప్రభుత్వం, చైనీస్ కమ్యూనిస్ట్ పార్టీతో సంబంధాలున్న ఈ సంస్థ మన దేశ ప్రముఖులు, సంస్థలను సైతం నిరంతరం ‘పర్యవేక్షిస్తోంది’. త్రివిధ దళాల అధిపతి బిపిన్ రావత్‌తోపాటు 15 మంది త్రివిధ దళాల మాజీ చీఫ్‌లు, సుప్రీం కోర్టు ప్రధాన న్యాయమూర్తి, కాగ్ జీసీ ముర్ము.. ప్రముఖ పారిశ్రామిక వేత్తలు రతన్ టాటా, గౌతమ్ అదానీ తదితరులపై చైనా సంస్థ నిఘా పెట్టింది. కీలక స్థానాల్లో ఉన్న అధికారులు, జడ్జిలు, శాస్త్రవేత్తలు, విద్యావేత్తలు, జర్నలిస్టులు, నటులు, క్రీడాకారులు, ఆధ్యాత్మికవేత్తలు, యాక్టివిస్టులపైనా చైనా నిఘా ఉంచడం గమనార్హం. ఆర్థిక నేరాలు, అవినీతి, ఉగ్రవాదం; బంగారం, ఆయుధాలు, అటవీ జంతువులు, నార్కోటిక్స్ స్మగ్లింగ్‌ ఆరోపణలు ఎదుర్కొంటున్న వందలాది మందిపైనా చైనా నిఘా ఉంచింది. ఓవర్సీస్ కీ ఇన్ఫర్మేషన్ డేటాబేస్ పేరిట జెన్హువా సంస్థ గత రెండు నెలలకుపైగా భారత ప్రముఖులు, సంస్థలపై నిఘా ఉంచినట్లు ఇండియన్ ఎక్స్‌ప్రెస్ పేర్కొంది. ఈ డేటాబేస్‌లో అమెరికా, యూకే, జపాన్, ఆస్ట్రేలియా, కెనడా, జర్మనీ, యూఏఈ దేశాలకు చెందిన వివరాలు కూడా ఉన్నాయి. ఈ డేటాబేస్‌లో ప్రముఖుల కుటుంబీకులతో ఫ్యామిలీ ట్రీని కూడా ఏర్పాటు చేసినట్లు గుర్తించారు.
By September 14, 2020 at 11:24AM
No comments