మోదీ నాకు గొప్ప మిత్రుడు.. భారతీయ అమెరికన్ల ఓట్లన్నీ నావే: డొనాల్డ్ ట్రంప్
అమెరికాలో ఎన్నికల ప్రచారం హోరాహోరీగా సాగుతోంది. ఆసియా సంతతి అమెరికన్ ఓటర్లను ఆకట్టుకోడానికి అటు రిపబ్లికన్లు, ఇటు డెమోక్రాట్లు ప్రయత్నిస్తున్నారు. వ్యూహాత్మకంగా భారతీయ అమెరికన్ కమలా హ్యారీస్ను ఉపాధ్యక్ష అభ్యర్థిగా డెమోక్రాట్లు నిలబెట్టడంతో ట్రంప్ శిబిరంలో ఆందోళన వ్యక్తమవుతోంది. ఈ నేపథ్యంలో భారతీయ ఓటర్ల మద్దతు చూరగొనటానికి ట్రంప్ ప్రయత్నిస్తున్నారు. తాజాగా, శ్వేతసౌధం వద్ద ట్రంప్ మీడియాతో మాట్లాడుతూ.. భారత తనకు గొప్ప స్నేహితుడని, భారతీయ అమెరికన్లు తనకే ఓటు వేస్తారని ఆశాభావం వ్యక్తం చేశారు. భారతీయ అమెరికన్లతోనూ నాకు మంచి అనుబంధం ఉందని వ్యాఖ్యానించారు. ‘భారతీయుల నుంచి తనకు గొప్ప మద్దతు ఉంది.. ప్రధాని నరేంద్ర మోదీ నుంచి కూడా సపోర్ట్ ఉంది.. కాబట్టి భారతీయ అమెరికన్లు నాకే ఓటు వేస్తారని అనుకుంటున్నా’అని అన్నారు. ఇటీవల రిపబ్లికన్ నేషనల్ కన్వెన్షన్లో మీ కోసం పేరుతో 49 అంశాలతో కూడిన ఎన్నికల ప్రణాళికను విడుదల చేసిన విషయం తెలిసిందే. తాజాగా, ట్రంప్ విక్టరీ ఇండియన్ అమెరికన్ ఫైనాన్స్ కమిటీ సహ అధ్యక్షుడు అల్ మాసన్.. గతేడాది హ్యూస్టన్, ఈ ఏడాది ఫిబ్రవరిలో మోదీ-ట్రంప్ సంయుక్త ప్రసంగానికి సంబంధించిన చిన్న క్లిప్పింగులను వీడియో చేసిన ట్విట్టర్లో పెట్టారు. ఈ వీడియోను ట్రంప్ ఎన్నికల ఆర్ధిక ప్రచార కమిటీ జాతీయ ఛైర్మన్ కింబర్లీ గుల్ఫైల్, డొనాల్డ్ కుమారుడు జూనియర్ ట్రంప్ రీట్వీట్ చేశారు. భారతీయ అమెరికన్లలో బాగా ప్రాచుర్యం పొందిన కింబర్లీ, జూనియర్ డొనాల్డ్, ఇవాంకా ట్రంప్ తదితరులు.. భారత-అమెరికా సంబంధాలపై మీ అభిప్రాయాలను మీ తరపున ప్రచారం చేస్తారా? అని మీడియా ప్రతినిధి ప్రశ్నించగా... ‘నాకు భారతదేశం గురించి తెలుసు.. మీరు చెప్పిన ఆ యువకుల ఆలోచనలను (కింబర్లీ, ట్రంప్ జూనియర్, ఇవాంకా) నేను అర్థం చేసుకున్నాను. వారు చురుకైన వ్యక్తులు.. భారత్తో వారికి మంచి సంబంధం ఉందని తెలుసు.. నా వైఖరి కూడా అదే’ అని ట్రంప్ అన్నారు . ‘ప్రధాన మంత్రి మోదీ నా స్నేహితుడు.. తను చాలా మంచి పనులు చేస్తున్నాడు. ఇలా చేయడం అంత సులభం కాదు.. అని గతేడాది సెప్టెంబర్లో హ్యూస్టన్ వేదిక జరిగిన 'హౌడీ మోదీ' కార్యక్రమంలో తన చారిత్రక ప్రసంగం గుర్తుచేసుకున్నారు. ‘హ్యూస్టన్లో ఒక అద్భుతమైన సంఘటన జరిగింది.. అది మీకు తెలుసు... నన్ను ప్రధాని మోదీ ఆహ్వానించడం గొప్ప సంఘటన.. ఇది నమ్మశక్యం కాదు. ఓ ప్రధాని మరీ ఇంత ఉదారంగా ఉండలేరు.. ప్రధాని మోదీ, భారతదేశం నుంచి మాకు గొప్ప మద్దతు ఉంది’ అని ట్రంప్ వ్యాఖ్యానించారు.
By September 05, 2020 at 12:27PM
No comments