మరోసారి ఇరాన్‌పై ఆంక్షలు.. అమెరికాకు ఊహించని ఝలక్ ఇచ్చిన మిత్రపక్షాలు
మరోసారి ఇరాన్‌పై అగ్రరాజ్యం అమెరికా కన్నెర్ర జేసింది. ఆ దేశంపై ఐక్యరాజ్య సమితి విధించిన ఆంక్షలన్నింటినీ పునరుద్ధరించినట్లు అమెరికా ఆదివారం ప్రకటించింది. అయితే, అమెరికా చర్యలను చట్టవిరుద్దమని పేర్కొన్న ప్రపంచ దేశాలు.. ట్రంప్‌ యంత్రాంగం నిర్ణయాన్ని తప్పుబట్టాయి. దీంతో రేపటి నుంచి జరగబోయే సమావేశాల్లో ఇది చర్చనీయాంశంగా మారే అవకాశం ఉంది. ఇరాన్-అమెరికా మధ్య 2015లో అణు ఒప్పందం కుదిరిన విషయం తెలిసిందే. ఈ ఒప్పందం ప్రకారం ‘జాయింట్‌ కాంప్రిహెన్సివ్‌ ప్లాన్‌ ఆఫ్‌ యాక్షన్’(జేసీపీఓఏ)లోని నిబంధనలను ఇరాన్ ఉల్లంఘిస్తోందని అమెరికా ఆరోపించింది. ఈ నేపథ్యంలో ఐరాస భద్రతా మండలి (యూఎన్‌ఎస్‌సీ) చట్టాల నియమాల ప్రకారం నోటీసులు ఇచ్చిన తర్వాత 30 రోజుల గడువు ముగియడంతో ఆంక్షలు తక్షణమే అమలులోకి వచ్చాయని ప్రకటించింది. ఇదిలా ఉండగా.. ఆంక్షలు, వాటిని ఉల్లంఘించిన వారిపై తీసుకోవాల్సిన చర్యలపై వైట్‌హౌస్ సోమవారం ఉత్తర్వులు జారీ చేసే అవకాశం ఉంది. ఐరాస సభ్యదేశాలన్నీ ఈ ఆంక్షల్ని తప్పనిసరిగా పాటించాలని అమెరికా విదేశాంగశాఖ మంత్రి మైక్‌ పాంపియో అన్నారు. లేదంటే కఠిన చర్యలకు సిద్ధం కావాలని ఆయన హెచ్చరించారు. అయితే, ఇరాన్‌పై ఆంక్షల విషయంలో అమెరికా తీరును ఐరాస భద్రతా మండలిలో సభ్యదేశాలు తీవ్రంగా వ్యతిరేకించాయి. అమెరికా ప్రకటనను విస్మరించాలని నిర్ణయించిన దేశాలు.. అణు ఒప్పందం నుంచి వైదొలిగిన క్షణమే ఆంక్షల విధించే ప్రతిపాదన హక్కును అమెరికా కోల్పోయిందని గుర్తుచేశాయి. కానీ, మండలిలో సభ్యదేశంగా.. ఒప్పందంలో ప్రాథమిక సభ్యురాలిగా తమకు ఆ అధికారం ఉంటుందని అమెరికా వాదించింది. అమెరికా ఆంక్షలను తొలి నుంచీ చైనా, రష్యా వ్యతిరేకిస్తూ ఉన్నాయి. తాజాగా, మిత్రదేశాలపైన ఫ్రాన్స్‌, బ్రిటన్‌, జర్మనీ సైతం అమెరికా నిర్ణయాన్ని తప్పుబడుతూ యూఎన్‌ఎస్‌సీ అధ్యక్షుడికి లేఖ రాశాయి. దీంతో అణు ఒప్పందంతో లభించిన ఆంక్షల మినహాయింపును ఇరాన్ అందిపుచ్చుకుంటుందని స్పష్టం చేశాయి. ఇరాన్‌తో అణు ఒప్పందం నుంచి 2018 మేలో అమెరికా వైదొలగిన విషయం తెలిసిందే. అప్పటి నుంచి ఇరు దేశాల మధ్య పచ్చగడ్డి వేస్తే భగ్గుమంటోంది. అమెరికా నిర్ణయాన్ని భద్రతా మండలిలో ఇతర దేశాలు వ్యతిరేకించడంపై ఇరాన్ అధ్యక్షుడు హసన్ రౌహానీ హర్షం వ్యక్తం చేశారు. ఆదివారం నిర్వహించిన క్యాబినెట్ సమావేశం తర్వాత మీడియాలో ఆయన నేరుగా ప్రసంగించారు. ఐరాస ఆంక్షలను తిరిగి విధించాలని అమెరికా ఒత్తిడి చేసినా మిగతా దేశాలు వ్యతిరేకించడంపై అభినందనలు తెలిపారు. ఈ రోజు మన దేశ దౌత్య చరిత్రలో మరపురాని రోజు అవుతుంది అని వ్యాఖ్యానించారు. ఐక్యరాజ్యసమితి ఆంక్షలను పునఃస్థాపించాలన్న ప్రకటనకు కట్టుబడి ఉండే క్రమంలో ఇతరులను బెదిరించడానికి అమెరికా ప్రయత్నిస్తే, పరిణామాలు తీవ్రంగా ఉంటాయని రౌహానీ అన్నారు.
By September 21, 2020 at 08:57AM
No comments