చైనా-పాక్ సంయుక్త ప్రకటనలో కశ్మీర్ ప్రస్తావన.. భారత్ దిమ్మదిరిగే కౌంటర్
దాయాది పాకిస్థాన్, పొరుగు దేశం చైనా సంయుక్త ప్రకటనలో కశ్మీర్ అంశాన్ని ప్రస్తావించడంపై భారత్ తీవ్ర అభ్యంతరం వ్యక్తం చేసింది. పాకిస్థాన్ మీదుగా చైనా నిర్మిస్తున్న చైనా పాక్ ఎకనామిక్ కారిడార్ సంబంధించి ఇరు దేశాలు ఇటీవల చేసిన కీలక ప్రకటనలో కశ్మీర్ అంశాన్ని ప్రస్తావించాయి. దీనిపై తీవ్రంగా స్పందించిన భారత్.. కశ్మీర్ ప్రస్తావనను పూర్తిగా వ్యతిరేకిస్తున్నామని ఉద్ఘాటించింది. ఇటువంటి విషయాల్లో కశ్మీర్ ప్రస్తావన తీసుకురావడాన్ని తాము వ్యతిరేకిస్తున్నామని విదేశాంగ శాఖ అధికార ప్రతినిధి అనురాగ్ శ్రీవాస్తవ్ స్పష్టం చేశారు. కశ్మీర్ భారత్లో అంతర్భాగమని పునరుద్ఘాటించిన ఆయన.. ఇతరుల జోక్యాన్ని తాము అంగీకరించబోమని కుండబద్దలుకొట్టారు. చైనా చేపట్టిన ఈ మెగా ప్రాజెక్టులో కొంత భాగం పాక్ ఆక్రమిత కశ్మీర్ గుండా వెళ్తోన్న విషయం తెలిసిందే. దీనిపై భారత్ గతంలోనూ అనేక మార్లు అభ్యంతరం వ్యక్తం చేసింది. మరోవైపు..పాక్లోని బలూచిస్థాన్, పంజాబ్ ప్రావిన్సుల ప్రజలు కూడా ఈ ప్రాజెక్టును వ్యతికిస్తున్నారు. పాకిస్థాన్, చైనా విదేశాంగ మంత్రులు షా మహ్మద్ ఖురేషి, వాంగ్ యీలూ మధ్య వ్యూహాత్మక చర్చలు శుక్రవారం జరిగాయి. ఈ సమావేశం తర్వాత ఇరువురూ సంయుక్తంగా ఓ ప్రకటన విడుదల చేశారు. ‘శాంతియుత, స్థిరమైన, సహకార, సంపన్నమైన దక్షిణ ఆసియా అన్ని దేశాల ఉమ్మడి ప్రయోజనంలో ఉందని ఇరు పక్షాలు నొక్కిచెప్పాయి. సమానత్వం, పరస్పర గౌరవం ఆధారంగా ఈ ప్రాంతంలోని వివాదాలు, సమస్యలను చర్చలు ద్వారా పరిష్కరించుకోవాలి’ అని ప్రకటనలో పేర్కొన్నాయి. ఈ సందర్భంగా పాక్ పక్షం మాట్లాడుతూ.. జమ్మూ కశ్మీర్లో పరిస్థితి సహా ప్రస్తుత అత్యవసరంగా చర్చించాల్సిన సమస్యలు ఉన్నాయని వివరించింది. దీనిపై చైనా మాట్లాడుతూ.. కశ్మీర్ సమస్య భారత్, పాకిస్థాన్ మధ్య చారిత్రక వివాదంగా మిగిలిపోయిందని, ఐక్యరాజ్యసమితి భద్రతా మండలి తీర్మానాలు, ద్వైపాక్షిక ఒప్పందాల ద్వారా ఈ వివాదాన్ని శాంతియుతంగా, సక్రమంగా పరిష్కరించాలని చైనా పక్షం పునరుద్ఘాటించింది. పరిస్థితిని క్లిష్టతరం చేసే ఏకపక్ష చర్యలను చైనా వ్యతిరేకిస్తుంది’అని ఉమ్మడి ప్రకటనలో వ్యాఖ్యానించారు.
By August 23, 2020 at 07:20AM
No comments