రాముడిపై అనుచిత వ్యాఖ్యలు.. కత్తి మహేష్ అరెస్ట్!

సినీ రాజకీయ విశ్లేషకుడు మహేష్ కత్తిని పోలీసులు అదుపులోకి తీసుకున్నారు. శ్రీరాముడిపై అసభ్యకరమైన పోస్ట్‌లు పెట్టడంతో ఆయన్ని హైదరాబాద్ సైబర్ క్రైమ్ పోలీసులు అరెస్ట్ చేశారు. తన ఫేస్ బుక్‌లో ‘రాముడు కరోనా ప్రియుడు’ అంటూ పోస్ట్ పెట్టడంతో పోలీసులకు ఫిర్యాదులు అందాయి. వీటిపై స్పందించిన పోలీసులు కత్తి మహేష్‌పై ఐపీసీ సెక్షన్ 154 కమ్యూనల్ యాక్ట్ ‌కింద కేసు నమోదు చేశారు. అయితే కత్తి మహేష్ రాముడిపై అనుచిత వ్యాఖ్యలు చేయడం ఇదే తొలిసారి కాదు.. 2018లో రాముడుపై ఇలాంటి వ్యాఖ్యలే చేయడంతో.. నగర బహిష్కరణ చేశారు. పోలీసుల అనుమతి లేకుండా అతడు హైదరాబాద్‌ నగరానికి రాకూడదని ఆదేశాలు జారీచేశారు. పలు హిందూ ధార్మిక సంఘాలు నిరసన వ్యక్తం చేయడంతో పాటు.. శ్రీరాముడిపై కత్తి మహేశ్‌ అనుచిత వ్యాఖ్యలను నిరసిస్తూ శ్రీపీఠాధిపతి స్వామి పరిపూర్ణానంద స్వామి ధర్మాగ్రహ యాత్ర పేరుతో పాదయాత్రను చేపట్టారు. అయితే అప్పట్లో పరిపూర్ణానంద పాదయాత్రకు పోలీసులు అనుమతి నిరాకరించారు. అయితే ఇంత వివాదం రేగినా.. మళ్లీ కత్తి మహేష్ హిందువులు మనోభావాలు దెబ్బతినేలా రాముడు కరోనా ప్రియుడు అంటూ అనుచిత వ్యాఖ్యలు చేయడం వివాదాస్పదంగా మారింది.

By August 14, 2020 at 01:38PM

Read More https://telugu.samayam.com/telugu-movies/cinema-news/movie-critic-kathi-mahesh-arrested-by-hyderabad-police-for-his-abusive-comments-on-lord-sri-ram/articleshow/77541496.cms