ఆస్ట్రాజెన్‌కాతో ఒప్పందం.. ప్రజలందరికీ ఫ్రీగా కరోనా వ్యాక్సిన్: ఆస్ట్రేలియా ప్రధాని

మానవాళికి కంటిమీద కునుకులేకుండా చేస్తున్న కరోనా వైరస్ మహమ్మారిని అంతం చేసే బ్రహ్మాస్త్రం కోసం ప్రపంచవ్యాప్తంగా పరిశోధకులు తీవ్రంగా శ్రమిస్తున్నారు. ఈ ప్రయత్నంలో భాగంగా కొన్ని సంస్థల టీకాల క్లినికల్ ట్రయల్స్ మొదలుపెట్టి, సానుకూల ఫలితాలు సాధించాయి. ఇప్పటికే ఆక్స్‌ఫర్డ్ యూనివర్సిటీ టీకా మూడో దశ క్లినికల్ ట్రయల్స్‌లోకి ప్రవేశించింది. ఆక్స్‌ఫర్డ్- ఫార్మ దిగ్గజం ఆస్ట్రాజెన్‌కా సంయుక్తంగా ఈ వ్యాక్సిన్‌ను అభివృద్ధి చేస్తున్నాయి. తాజాగా, వ్యాక్సిన్ ఉత్పత్తి, తయారీ కోసం ఆస్ట్రాజెనికాతో ఆస్ట్రేలియా ఒప్పందం కుదుర్చుకుంది. ఈ మేరకు ఆస్ట్రేలియా ప్రధాని స్కాట్‌ మోరిసన్‌ మంగళవారం వెల్లడించారు. వ్యాక్సిన్‌ తయారీ, పంపిణీకి సంబంధించిన అంశాలతో కూడిన ఒప్పందంపై సంతకం చేసినట్టు ఆయన తెలిపారు. స్వీడిస్‌- బ్రిటిష్‌ ఫార్మా కంపెనీ అయిన ఆస్ట్రాజెనికా అభివృద్ధి చేస్తున్న ఈ వ్యాక్సిన్‌ విజయవంతమైతే తమ దేశంలోనే ఉత్పత్తి చేసి ఆస్ట్రేలియాలో 2.5 కోట్ల మంది పౌరులందరికీ ఉచితంగా అందజేస్తామని స్కాట్‌ మోరిసన్‌ ప్రకటించారు. ఆక్స్‌ఫర్డ్‌-ఆస్ట్రాజెనికా అభివృద్ధి చేస్తున్న ఈ వ్యాక్సిన్‌ ఫలితాలు ఆశాజనకంగా ఉన్నాయి. ప్రస్తుతం ప్రపంచంలో మూడో దశ ట్రయిల్స్‌లో ఉన్న ఐదు వ్యాక్సిన్లలో ఆక్స్‌ఫర్డ్‌ వ్యాక్సిన్‌ ఒకటి. మూడో దశ ట్రయల్స్‌ సమర్థంగా కొనసాగుతున్న ఈ వ్యాక్సిన్‌ ఈ ఏడాది చివరికల్లా వస్తుందని పరిశోధకులు భావిస్తున్నారు. ఆస్ట్రేలియాలో ఇప్పటివరకు 23,700మంది కరోనా బారిన పడ్డారు. వీరిలో 14,900 మంది కోలుకోగా.. 430మందికి పైగా ప్రాణాలు కోల్పోయారు. విక్టోరియా రాష్ట్రంలో కేసులు ఒక్కసారిగా పెరిగిపోవడంతో ఆగస్టు తొలివారంలో లాక్‌డౌన్ ప్రకటించి, ఆంక్షలను కఠినంగా అమలుచేస్తున్నారు. అయితే, దేశంలో మొత్తం జనాభాకు వ్యాక్సిన్ సరఫరా ఖర్చు ఇంకా నిర్ణయించలేదు. కానీ,100 మిలియన్ సూదులు, సిరంజిలను సరఫరా చేయడానికి అమెరికా ఔషధ సంస్థ బెక్టన్ డికిన్సన్‌తో 25 మిలియన్ డాలర్ల మేర ఒప్పందం కుదుర్చుకుంది.

By August 19, 2020 at 07:19AM

Read More https://telugu.samayam.com/latest-news/international-news/covid-vaccine-we-will-manufacture-and-supply-free-for-australians-say-pm-morrison/articleshow/77624936.cms