యూపీ: బాలికను రేప్ చేసి, కనుగుడ్లు పీకి, నాలుక కోసి అత్యంత పాశవికంగా హత్య
మైనర్ బాలికపై అత్యాచారానికి పాల్పడి, అత్యంత పాశవికంగా హత్యచేసిన ఘటన ఉత్తర్ప్రదేశ్లో చోటుచేసుకుంది. మైనర్పై అత్యాచారానికి పాల్పడిన కమాంధులు.. గొంతు నులిమి చంపేసి, ఆమె కనుగుడ్లు పీకేసి, నాలుక కోసి దారుణంగా హత్యచేశారు. లఖీమ్పూర్ ఖేరి జిల్లాలో శనివారం ఈ ఘటన వెలుగుచూసింది. బాలిక మృతదేహాన్ని గ్రామ పొలిమేరల్లోని చెరుకు తోటల్లో శనివారం ఉదయం గుర్తించారు. ఈ ఘటనపై కేసు నమోదుచేసిన పోలీసులు.. ఇద్దర్ని అదుపులోకి తీసుకున్నారు. ఇటీవల కాలంలో ఉత్తర్ప్రదేశ్లో చోటుచేసుకున్న దారుణ ఘటనల్లో ఇది ఒకటి. నేపాల్ సరిహద్దుల్లోని గ్రామంలో ఈ ఘటన చోటుచేసుకుంది. పోలీసులు అరెస్ట్ చేసిన నిందితుడి వ్యవసాయ క్షేత్రంలో మృతదేహం లభ్యమైంది. మృతదేహాన్ని స్వాధీనం చేసుకుని, పోస్ట్మార్టం నిర్వహించామని, బాలికపై అత్యాచారానికి పాల్పడినట్టు వెల్లడయ్యిందని లఖీమ్పూర్ ఖేరి జిల్లా ఎస్పీ తెలిపారు. నిందితులపై అత్యాచారం, హత్య, జాతీయ భద్రత చట్టం కింద కేసు నమోదుచేశామని పేర్కొన్నారు. బాధిత బాలిక శుక్రవారం మధ్యాహ్నం నుంచి అదృశ్యమైనట్టు తల్లిదండ్రులు తెలిపారు. తమ కుమార్తె కనపడకపోవడంతో ఆమె కోసం గ్రామంలో గాలించామని, చివరకు ఓ చెరుకుతోటలో విగతజీవిగా పడి ఉంది... గొతు నులిమి, కనుగుడ్లు పీకేసి, నాలుక కోసి చున్నీతో ఉరేశారని బాలిక తండ్రి కన్నీటిపర్యంతమయ్యారు. ఈ ఘటనపై మాజీ ముఖ్యమంత్రి మాయావతి తీవ్రంగా స్పందించారు. సభ్యసమాజానికి ఇది అత్యంత సిగ్గుచేటని, గతంలో సమాజ్వాదీ ప్రభుత్వానికి, ప్రస్తుత యోగి నాయకత్వంలోని బీజేపీకి ప్రభుత్వానికి తేడా ఏముందని దుయ్యబట్టారు. భీమ్ ఆర్మీ చీఫ్ చంద్రశేఖర్ ఆజాద్ సైతం ఈ హత్యాచార ఘటనను ఖండించారు. బీజేపీ పాలనలో దళితులపై అఘాయిత్యాలు పెరిగిపోయాయని, ఆటవిక పాలన కొనసాగుతోందన్నారు. తమ కుమార్తెలకు ఇళ్లలోనూ, బయట రక్షణ కరువయ్యిందని.. తక్షణమే యోగి రాజీనామా చేయాలని డిమాండ్ చేశారు. గతవారం హపూర్లో ఆరేళ్ల బాలికను అపహరించి, అత్యాచారానికి పాల్పడిన విషయం తెలిసిందే. ప్రస్తుతం ఆ బాలిక ఢిల్లీలోని హాస్పిటల్లో చికిత్స పొందుతోంది. వైద్యులు ఆమెకు శస్త్రచికిత్స చేయగా.. బాలిక పరిస్థితి నిలకడగా ఉంది.
By August 16, 2020 at 09:47AM
No comments