దేశంలో కరోనా.. రోజువారీ కొత్త కేసులు నమోదులో రెండో స్థానానికి భారత్

దేశంలో కరోనా రక్కసి ఉగ్రరూపం దాల్చుతోంది. రోజువారీ కొత్త కేసులు భారీగా నమోదవుతూ.. పాత రికార్డులు బద్దలవుతున్నాయి. గతవారం ఏకంగా 2.38 లక్షల మందికి కొత్తగా వైరస్ నిర్ధారణ అయ్యింది. అలాగే 4,285 మరణాలు చోటుచేసుకున్నాయి. దేశం మొత్తం కేసుల్లో 21 శాతం, మరణాల్లో 16 శాతం గతవారమే నమోదు కావడం గమనార్హం. ఆదివారం 40వేలకుపైగా పాజిటివ్ కేసులు నిర్ధారణ కాగా.. మహమ్మారి బారినపడి మరో 673 మంది ప్రాణాలు కోల్పోయారు. రికవరీ కంటే యాక్టివ్ కేసులు కూడా ఈ వారంలో పెరగడం వైరస్ తీవ్రతకు అద్దం పడుతోంది. దేశవ్యాప్తంగా పాజిటివ్ కేసుల సంఖ్య 11 లక్షలు దాటింది. కేసులు 10 లక్షలకు చేరిన మూడు రోజుల్లోనే ఈ సంఖ్యకు చేరుకుంది. మొత్తం కేసులు 11 లక్షల 17వేలకు చేరింది. మరణాలు కూడా 27,500గా నమోదయ్యాయి. ఇప్పటి వరకూ 7లక్షల మంది కోలుకున్నారు. మరో 3.89 లక్షల మంది ఆస్పత్రుల్లో చికిత్స పొందుతున్నారు. జూన్ 13 నుంచి 19 వరకు మొత్తం కేసులు 2.38 లక్షలు నమోదుకాగా.. అంతకు ముందు వారంతో పోల్చితే ఇది 31 శాతం అధికం. ఆదివారం మొత్తం పది రాష్ట్రాల్లో రోజువారీ కేసులు రికార్డుస్థాయిలో నమోదయ్యాయి. మహారాష్ట్రలో అత్యధికంగా 9,518 మందికి కొత్తగా వైరస్ నిర్ధారణ కాగా.. తర్వాతి స్థానంలో 5,041 కేసులతో ఆంధ్రప్రదేశ్ నిలిచింది. ఇప్పటి వరకూ మహారాష్ట్ర తర్వాత ఆంధ్రప్రదేశ్‌లోనే ఒక్క రోజే 5వేలకుపైగా కేసులు నమోదయ్యాయి. ఇక, తమిళనాడు 4,979, బెంగాల్ 2,278, ఉత్తరప్రదేశ్ 2,250, గుజరాత్ 965, రాజస్థాన్ 934, మధ్యప్రదేశ్ 837, కేరళ 821, ఉత్తరాఖండ్ 239 కేసులు నిర్ధారణ అయ్యాయి. జులై 16 తర్వాత అత్యధిక మరణాలు ఆదివారం చోటుచేసుకున్నాయి. దేశ రాజధాని ఢిల్లీలో మహమ్మారి కాస్త అదుపులోకి వచ్చినట్టే కనిపిస్తోంది. అక్కడ ఆదివారం 1,211 మంది కొత్తగా వైరస్ బారినపడ్డారు. జులైలో నమోదయిన కేసుల్లో ఇవే అత్యల్పం. మహారాష్ట్రలో 9,518 మందికి వైరస్ సోకింది. కర్ణాటకలో ఆదివారం మరో 4,120 మందికి వైరస్ నిర్ధారణ కాగా. మరో 91 మరణాలు చోటుచేసుకున్నాయి. దీంతో అక్కడ మొత్తం కేసులు 63,772కు చేరగా.. మరణాల సంఖ్య 1,331కి చేరింది. బెంగళూరు నగరంలో ఏకంగా 2,156 కేసులు నమోదయ్యాయి. ఏపీలో రికార్డు స్థాయిలో ఒకేరోజు పెద్ద ఎత్తున కరోనా కేసులు, మరణాలు నమోదయ్యాయి. శనివారం ఉదయం 9 గంటల నుంచి ఆదివారం ఉదయం 9 మధ్య 5,041 మందికి వైరస్‌ సోకినట్లు నిర్ధారణ అయింది. కరోనా బారిన పడి రాష్ట్రవ్యాప్తంగా 56 మంది మృతి చెందారు. 24 గంటల్లో పరీక్షించిన ప్రతి 100 నమూనాల్లో 16.18 శాతం పాజిటివ్‌గా తేలాయి. ఇప్పటివరకూ నమోదైన మొత్తం కేసుల సంఖ్య 49,650కు, మృతుల సంఖ్య 642కు చేరాయి.

By July 20, 2020 at 07:41AM

Read More https://telugu.samayam.com/latest-news/india-news/coronavirus-count-hits-40000-mark-on-sunday-21-of-all-cases-came-in-past-week/articleshow/77057947.cms