దేశంలో కరోనా పడగ.. నిన్న ఒక్క రోజే రికార్డుస్థాయిలో 21వేల కేసులు

దేశంలో మహమ్మారి వ్యాప్తి మరింత ఉద్ధృతంగా ఉంది. గురువారం నాటి పాజిటివ్ కేసుల్లో మరో కొత్త రికార్డు నమోదయ్యింది. నాలుగు రోజుల తర్వాత మరోసారి పాజిటివ్ కేసులు 20వేలు దాటాయి. దేశవ్యాప్తంగా గురువారం 20,903 కొత్త కేసులు నమోదు కాగా.. మరో 379 మంది కరోనాతో చనిపోయారు. దేశంలో క‌రోనా వైర‌స్ బ‌య‌ట‌ప‌డిన అనంత‌రం ఒక్క‌రోజులోనే ఈ స్థాయిలో న‌మోదుకావ‌డం ఇదే తొలిసారి. దేశవ్యాప్తంగా కరోనా వైరస్ కేసుల సంఖ్య 626,377కి చేరగా.. మరణాల సంఖ్య 18,225గా నమోదయ్యింది. కరోనా నుంచి 3.79లక్షల మంది కోలుకోగా.. 2.28 లక్షల మంది ఆస్పత్రుల్లో చికిత్స పొందుతున్నారు. కాగా, జులై 2 వరకు దేశవ్యాప్తంగా 92,97,749 మందికి పరీక్షలు నిర్వహించామని ఐసీఎంఆర్ ప్రకటించింది. జులై 2న 2,41,576 శాంపిల్స్‌ను పరీక్షించినట్టు తెలిపింది. ‌గత పది రోజుల మ‌ర‌ణాల‌తో పోల్చిచే గురువారం కాస్త త‌గ్గాయి. శుక్ర‌వారంనాటికి దేశంలో క‌రోనా వ‌ల్ల మ‌ర‌ణించిన‌ వారిసంఖ్య 18,213కు చేరిన‌ట్లు కేంద్ర ఆరోగ్య‌, కుటుంబ సంక్షేమశాఖ వెల్ల‌డించింది. దేశంలో వైర‌స్ విజృంభ‌ణ‌, బాధితుల సంఖ్య పెర‌గ‌డంతోపాటు మ‌ర‌ణాల సంఖ్య ఎక్కువగా నమోదవుతోంది. గ‌డిచిన వారంలోనే దేశంలో దాదాపు 3వేల మంది మృత్యువాత‌ప‌డ్డారు. ప్ర‌స్తుతం భార‌త్‌లో కరోనా వైరస్ బాధితుల‌ రిక‌వ‌రీ రేటు దాదాపు 60శాతంగా ఉండ‌గా మ‌ర‌ణాల రేటు 2.6శాతంగా ఉంది. గ‌త నెల‌తో పోలిస్తే క‌రోనా మ‌ర‌ణాల రేటు కాస్త తగ్గుతూ వ‌స్తోంది. మ‌హారాష్ట్ర తర్వాత మిళ‌నాడులో కొవిడ్ మ‌హ‌మ్మారి ఉగ్ర‌రూపం కొన‌సాగుతోంది. అక్కడ నిన్న ఒక్క‌రోజే 4,343పాజిటివ్ కేసులు న‌మోద‌య్యాయి. దీంతో త‌మిళ‌నాడులో మొత్తం క‌రోనా బాధితుల సంఖ్య ల‌క్షకు చేరువయ్యింది. ఇప్ప‌టివ‌ర‌కు 98,392 పాజిటివ్ కేసులు న‌మోదుకాగా వీరిలో 1,321మంది ప్రాణాలు కోల్పోయారు. దేశంలోని మొత్తం క‌రోనా మ‌ర‌ణాల్లో దాదాపు 45శాతం ఒక్క మ‌హారాష్ట్రలోనే నమోదుకావడం ఆందోళ‌న క‌లిగిస్తోంది. ప్ర‌స్తుతం అక్కడ క‌రోనా మ‌ర‌ణాల సంఖ్య 8,178కి చేరింది. పాజిటివ్ కేసుల సంఖ్య ల‌క్షా 86వేలు దాటింది. రాజధాని ఢిల్లీలో మొత్తం కేసుల సంఖ్య 92,175కి చేరగా... 2,864 మంది మృత్యువాత‌ప‌డ్డారు. గుజ‌‌రాత్‌లోనూ క‌రోనా విజృంభ‌ణ కొన‌సాగుతోంది. రాష్ట్రంలో కేసుల సంఖ్య 33,913కు చేర‌గా వీరిలో ఇప్ప‌టివ‌ర‌కు 1886 మంది చ‌నిపోయారు. ఆంధ్రప్రదేశ్‌లో కరోనా కేసులు 16,097కు చేరాయి. ఒక్కరోజే 845 మందికి పాజిటివ్‌ నిర్ధారణైంది. వీరిలో 812 మంది ఏపీలో ఉంటున్న వారు కాగా, 29 మంది ఇతర రాష్ట్రాలు, నలుగురు విదేశాల నుంచి వచ్చిన వారు. గడచిన 24 గంటల వ్యవధిలో ఇంత పెద్ద ఎత్తున పాజిటివ్‌ కేసులు రావటం ఇదే తొలిసారి. తెలంగాణలో కరోనా నానాటికీ ఉద్ధృతమవుతోంది. గురువారం ఒక్కరోజే 1,213 కేసులు నమోదయ్యాయి. ఇప్పటి వరకూ రాష్ట్రంలో ఒక్కరోజులో నమోదైన కేసుల్లో ఇదే అత్యధికం. ఈనెలలో వరుసగా రెండో రోజు కూడా 1000కి పైగా కేసులు నమోదవడం ఆందోళన కలిగిస్తోంది. తాజా ఫలితాల్లో అత్యధికంగా జీహెచ్‌ఎంసీ(హైదరాబాద్‌) పరిధిలో 998 కేసులున్నాయి. హైదరాబాద్‌ పరిసర జిల్లాలైన మేడ్చల్‌(54), రంగారెడ్డి(48)ల్లోనూ వైరస్‌ వణుకు పుట్టిస్తోంది.

By July 03, 2020 at 11:13AM

Read More https://telugu.samayam.com/latest-news/india-news/coronavirus-india-reports-379-deaths-and-highest-single-day-spike-of-20903-new-cases/articleshow/76764181.cms