వాయుగుండంగా మారిన అల్పపీడనం.. రేపటికి తుఫానుగా: ఆ రాష్ట్రాలకు రెడ్ అలర్ట్

తూర్పు మధ్య అరేబియా స‌ముద్రంలో ఏర్పడిన అల్పపీడనం సోమవారం ఉదయం వాయుగుండంగా మారింది. ఇది నేటి సాయంత్రానికి తీవ్ర వాయుగుండంగా, మరో 24 గంటల్లో తుఫాన్‌గా మారుతుందని భారత వాతావరణ కేంద్రం (ఐఎండీ) సోమవారం ఉదయం వెల్లడించిన బులిటెన్‌లో తెలిపింది. జూన్ 3న ఉదయం తీవ్ర తుఫాన్‌గా మారి మహారాష్ట్ర, గుజరాత్ వద్ద అదే రోజు రాత్రి తీరాన్ని తాకనుందని వెల్లడించింది. ప్రస్తుతం ఈ వాయుగుండం గోవాలోని పనాజీకి నైరుతిగా 370 కిలోమీటర్లు, మహారాష్ట్రలోని ముంబయికి దక్షిణ-నైరుతిగా 690 కిలోమీటర్లు, గుజరాత్‌లోని సూరత్‌కు నైరుతిగా 920 కిలోమీటర్ల దూరంలో కేంద్రీకృతమై ఉన్నట్టు పేర్కొంది. తూర్పు మధ్య, పక్కనే ఉన్న ఆగ్నేయ అరేబియా మీదుగా ప్రయాణించి, తరువాతి 12 గంటలలో తుఫానుగా మారతుంది. తదుపరి 24 గంటల్లో జూన్ 2 ఉదయం తీవ్ర తుఫానుగా మారి ఉత్తరం వైపుకు మళ్లే అవకాశం ఉందని అంచనా వేసింది. తర్వాత ఉత్తర-ఈశాన్య దిశగా సాగి, ఉత్తర మహారాష్ట్ర, దక్షిణ గుజరాత్ తీరం మధ్య హరిహరేశ్వర్ మధ్య వద్ద జూన్ 3 సాయంత్రం లేదా రాత్రి వేళ డామన్‌కు సమీపంలో తీరం దాటుతుందని తెలిపింది. ప్రభావంతో సోమవారం సాయంత్రం నుంచి గంటకు 60 నుంచి 70 కిలోమీటర్ల వేగంతో, మంగళవారం ఉదయం నుంచి గంటకు 80 నుంచి 125 వేగంతో ఈదురుగాలులు వీస్తాయని హెచ్చరించింది. ఈ తుఫాన్ కారణంగా దేశంలోని పలు ప్రాంతాల్లో ఒక మోస్తరు నుంచి భారీ వర్షాలు కురిసే అవకాశం ఉందని వాతావరణ శాఖ తెలిపింది. తూర్పు తీరంలో ఇటీవల సంభవించిన అంఫన్ తుఫాన్.. పశ్చిమ బెంగాల్, ఒడిశా రాష్ట్రాల్లో బీభత్సం సృష్టించిన సంగతి తెలిసిందే. ఆ తుఫాన్ వెళ్లిపోయిన కొద్ది రోజులకే పశ్చిమ తీరం నుంచి మరో తుఫాన్ వస్తుండటం గమనార్హం. తుఫాను కారణంగా జూన్ 1 నుంచి లక్షద్వీప్, కేరళ, కర్ణాటక తదితర ప్రాంతాల్లో ఓ మోస్తరు నుంచి భారీ వర్షాలు కురుస్తాయని ఐఎండీ తెలిపింది. గుజరాత్, మహారాష్ట్రలకు రెడ్ అలెర్ట్ జారీచేసింది. దక్షిణ కొంకణ్, గోవా తీరాల్లో, మధ్య మహారాష్ట్రలో జూన్ 2, 3, 4 తేదీల్లో భారీ వర్షాలు కురిసే అవకాశం ఉందని వెల్లడించింది. ఉత్తర కొంకణ్, ఉత్తర మధ్య మహారాష్ట్రలోని పలు ప్రాంతాల్లో జూన్ 3,4 తేదీల్లో భారీ నుంచి అతి భారీ వర్షాలు కురుస్తాయని సూచించింది. గుజరాత్ దక్షిణ భాగం, డామన్, డయ్యూ, దాద్రా నగర్ హవేలీ ప్రాంతాల్లోనూ వర్షాలు కురిసే అవకాశం ఉందని తెలిపింది. జూన్ 4 వరకు మత్స్యకారులెవరూ అరేబియా సముద్రంలో చేపల వేటకు వెళ్లకూడదని హెచ్చరించింది.

By June 01, 2020 at 11:33AM

Read More https://telugu.samayam.com/latest-news/india-news/cyclonic-storm-in-arabian-sea-imd-issues-red-alert-to-maharashtra-gujarat-for-june-4/articleshow/76130323.cms