నేవీలో కరోనా కలకలం.. 26 మంది సెయిలర్స్‌కి పాజిటివ్
దేశంలోనే అత్యధికంగా కరోనా వైరస్ పాజిటివ్ కేసులు మహారాష్ట్రలోనే నమోదవుతుండగా.. దేశ ఆర్ధిక రాజధాని ముంబయిలోనే 2వేల మంది వైరస్ బారినపడ్డారు. తాజాగా, ముంబయిలో 26 మంది నేవీ సిబ్బందికి వైరస్ సోకినట్టు నిర్ధారణ అయ్యింది. దీంతో నేవీ వర్గాల్లో తీవ్ర ఆందోళన వ్యక్తమవుతోంది. ముంబయి డాక్‌యార్డ్‌లోని కనీసం నాలుగు అమెరికా, ఒకటి ఫ్రాన్స్ అణ్వాయుధ విమాన వాహక నౌకల కార్యకలాపాలకు ఇది ప్రతికూలంగా మారింది. పశ్చిమ్ నావెల్ కమాండ్‌ ఐఎన్ఎస్ ఆంగ్రే నౌకలోని లాజిస్టిక్ విభాగం సిబ్బందిలో 26 మందికి వైరస్ నిర్ధారణ అయినట్టు విశ్వసనీయ వర్గాలు వెల్లడించాయి. ప్రస్తుతం వీరిని ముంబయిలోని ఐఎన్‌హెచ్ఎస్ అశ్వని హాస్పిటల్‌లో చేర్పించి చికిత్స అందజేస్తున్నారు. ఒక్కసారిగా 26 మంది వైరస్ నిర్ధారణ కావడంతో వీరితో సన్నిహితంగా ఉన్న సెయిలర్స్‌, ఇతర సిబ్బందిని గుర్తించే ప్రక్రియ పెద్ద ఎత్తున కొనసాగుతోంది. వీరందరూ ఐఎన్ఎస్ ఆంగ్రే బ్యాచిలర్ రెసిడెన్షియల్ బ్లాక్‌లో నివాసం ఉంటున్నారు. ఈ బ్లాక్‌ను కంటెయిన్‌మెంట్ జోన్‌గా ప్రకటించారని, ఐఎన్ఎస్ ఆంగ్రేను పూర్తిగా మూసివేశారని తెలిపాయి. ముంబయి నావెల్ డాక్‌యార్డ్‌లో ఐఎన్ఎస్ ఆంగ్రేతోపాటు పలు యుద్ధ నౌకలు, జలాంతర్గాములు ఉంటాయి. ఏప్రిల్ 7న తొలిసారి ఓ సెయిలర్‌కి కరోనా వైరస్ సోకినట్టు గుర్తించారు. కరోనా సోకిన నౌకాదళ మాజీ ఉద్యోగి నుంచి అతడికి వైరస్ సోకినట్టు నిర్ధారణ అయ్యింది. దీంతో అతడితో కాంటాక్ట్‌లో ఉన్న ఇతర సెయిలర్స్‌ను పరీక్షించగా.. వీరిలో 25 మంది వైరస్ ఉన్నట్టు నిర్ధారణ అయ్యిందని విశ్వసనీయ వర్గాలు పేర్కొన్నాయి. అయితే, మాత్రం దీనిపై అధికారికంగా ఎలాంటి ప్రకటన చేయలేదు. సైనిక దళాల్లో ఇంత పెద్ద సంఖ్యలో వైరస్ కేసులు నిర్ధారణ కావడం ఇదే తొలిసారి. ఆర్మీలో ఇద్దరు వైద్యులు సహా ఎనిమిది మంది వైరస్ బారినపడ్డారు. యుద్ధనౌకలు, జలాంతర్గాములలో కరోనా వైరస్ వ్యాప్తి చెందకుండా చర్యలు చేపట్టాల్సిన అవసరం ఉందని ఏప్రిల్ 9 నేవీ చీఫ్ అడ్మిరల్ కరంవీర్ సింగ్ వ్యాఖ్యానించారు. యుద్ధ నౌకలు, జలంతార్గాములు కరోనా వైరస్ బారినపడకుండా చూడటం చాలా కష్టమని, ఎందుకంటే ఇందులో భౌతిక దూరం పాటించడం పెద్ద టాస్క్ అని అన్నారు. అమెరికాలోనూ దాదాపు 900 మంది సైనికులు కరోనా బారినపడ్డారు. వీరిలో పలువురు నౌకదళ సిబ్బంది కూడా ఉన్నారు.
By April 18, 2020 at 09:46AM
No comments