మోనికాతో అఫైర్‌‌కి కారణం అదే.. సంచలన విషయం వెల్లడించిన క్లింటన్!

అమెరికా మాజీ అధ్యక్షుడు .. వైట్‌హౌస్‌ ఉద్యోగిని మోనికా లెవిన్‌స్కీ ప్రేమాయణం అప్పట్లో ప్రపంచవ్యాప్తంగా చర్చనీయాంశమైంది. రెండుసార్లు 1993 నుంచి 2001 వరకు అమెరికా అధ్యక్షుడిగా పనిచేసిన క్లింటన్‌.. మోనికాతో వైట్‌హౌస్‌లో జరిపిన రాసలీలలు 1998లో న్యూస్ వీక్ కథనంతో వెలుగులోకి వచ్చింది. నాటి ఈ సంఘటన క్లింటన్‌ను ఇప్పటికీ వెంటాడుతోంది. రాజకీయ, వ్యక్తిగత జీవితంపై పెను ప్రభావం చూపింది. తాను చేసింది తప్పేనని పలు సందర్భాల్లో క్లింటన్ బహిరంగంగా అంగీకరించారు. తాజాగా, ఈ అంశంపై క్లింటన్ మరోసారి నోరువిప్పారు. ఆమెతో శారీరక సంబంధం పెట్టుకోడానికి దారితీసిన పరిస్థితుల గురించి ఓ డాక్యుమెంటరీకి ఇచ్చిన ఇంటర్వ్యూలో వివరించారు. అప్పట్లో అమెరికా అధ్యక్షుడిగా చాలా ఒత్తిళ్లను ఎదుర్కొన్నానని, వాటి నుంచి ఉపశమనం పొందడానికి మోనిక లెవిన్‌స్కీతో లైంగిక సంబంధం పెట్టుకున్నానని సంచలన వ్యాఖ్యలు చేశారు. ఆ సమయంలో తాను అసంతృప్తి, భయాందోళనకు గురైన సందర్భాలు ఎన్నో ఉన్నాయని, వాటన్నింటినీ అధిగమించి, మానసిక ప్రశాంతత, ఉపశమనం పొందడానికి ఇటువంటి చర్యకు పాల్పడినట్టు తెలిపారు. తాను చేసింది చెడ్డపనేనని, అప్పుడు అలా చేసుండాల్సింది కాదన్నారు. అయితే, కొన్ని విషయాలు మనుషులని జీవితాంతం వెంటాడుతుంటాయని, మనిషి చేయకూడని పనులు చేస్తుంటాడని అన్నారు. తాను ఆనాడు చేసింది కూడా తప్పేనని అంగీకరించిన క్లింటన్.. ఆమెతో గడపడం వల్ల ఒత్తిడి తగ్గి కాస్త ప్రశాంతంగా ఉండగలిగేవాడనని పేర్కొన్నారు. ఒత్తిడిలో ఉన్నప్పుడు ప్రపంచం తలకిందులైనట్టు.. మెదడులో ఆలోచనలు వేగంగా పరిభ్రమిస్తాయి.. ప్రతి ఒక్కరికీ జీవితంలో ఒత్తిళ్లు, నిరాశలు, భయాలు వెంటాడుతాయని అన్నారు. నాకు కూడా అలాంటి అనుభవమే ఎదురయ్యిందని తెలిపారు. లెవిన్‌స్కీతో సంబంధం అనేక పరిణామాలకు దారితీసిందని అన్నారు. మోనికాతో ఎఫైర్‌ బిల్ క్లింటన్ రాజకీయ, వ్యక్తిగత జీవితంలోనూ ఎన్నో పరిణామాలలకు దారితీసింది. క్లింటన్ తొలిసారి అధ్యక్షుడిగా అయిన తర్వాత 1995 నుంచి 1997 వరకు మోనికా వైట్‌హౌస్‌లో 1995 నుంచి 1997 వరకు అన్‌పెయిడ్ ఇంటర్నీగా చేరారు. అప్పటికి ఆమె వయస్సు 22 ఏళ్లు. 1995 నవంబర్‌లో క్లింటన్, లెవిన్‌స్కీ మధ్య ప్రేమ చిగురించి శారీరక సంబంధానికి దారితీసింది. క్లింటన్ చుట్టూ తిరుగుతోందనే కారణంతో 1996 ఏప్రిల్‌లో లెవిన్‌స్కీని శ్వేతసౌధం నుంచి పెంటగాన్‌కు బదిలీ చేశారు. అయితే, 1997 డిసెంబర్‌లో పెంటగాన్‌లో విధుల నుంచి ఆమె తప్పుకుంది. ఇద్దరి ఎఫైర్ వెలుగులోకి రావడంతో 1998లో క్లింటన్ అభిసంశను కూడా ఎదుర్కోవాల్సి వచ్చింది. విషయం వెలుగులోకి వచ్చిన తర్వాత మీడియా సమావేశం ఏర్పాటుచేసి మరీ తనకు ఆమెతో ఎలాంటి ఎఫైర్‌ లేదని ఖండించారు. కానీ, చివరకు 1998 అక్టోబరులో దీనిని అంగీకరించారు. క్లింటన్‌తో రాసలీలలు తెర మీదికి రావడంతో 1990వ దశకంలో లెవిన్‌స్కీ పేరు ప్రపంచవ్యాప్తంగా మారుమోగింది.

By March 07, 2020 at 01:45PM

Read More https://telugu.samayam.com/latest-news/international-news/us-former-president-bill-clinton-reveals-sexual-affair-with-monica-lewinsky-to-help-anxieties/articleshow/74524750.cms