Indian 2 Accident: వెంట్రుక వాసిలో ప్రాణాలతో బయటపడ్డాను: కాజల్ అగర్వాల్
కమల్ హాసన్, శంకర్ కాంబినేషన్‌లో వస్తున్న ‘ఇండియన్ 2’ సినిమా సెట్లో ఘోర ప్రమాదం చోటు చేసుకున్న సంగతి తెలిసిందే. షూటింగ్ కోసం ఏర్పాటు చేసిన ఓ భారీ క్రేన్ కుప్పకూలింది. ఈ ఘటనలో ముగ్గురు వ్యక్తులు దుర్మరణం పాలయ్యారు. డైరెక్టర్ శంకర్ కూడా గాయపడినట్లు సమాచారం. ఘటనలో మరో 10 మంది తీవ్రంగా గాయపడ్డారు. వారిని దగ్గర్లోని హాస్పిటల్‌కు తరలించి చికిత్స అందిస్తున్నారు. ఈ విషాద ఘటనపై నటి స్పందించారు. ఈ సినిమాలో కాజల్ కథానాయికగాన నటిస్తున్న సంగతి తెలిసిందే. అయితే యాక్సిడెంట్ స్పాట్‌లో కాజల్ కూడా ఉన్నారట. వెంట్రుక వాసిలో ప్రాణాలతో బయటపడ్డానని అంటున్నారు. ‘‘ఈ ఘటనపై నేను ఎంత బాధపడుతున్నానో చెప్పడానికి మాటలు రావడంలేదు. నా ముగ్గురు కొలీగ్స్‌ను కోల్పోయాను. వారి కుటుంబాలు ధైర్యంగా ఉండాలని కోరుకుంటున్నాను. నా ముగ్గురు స్నేహితుల ఆత్మకు శాంతి చేకూరాలి. నిన్న రాత్రి జరిగిన ఘోర ప్రమాదంలో వెంట్రుక వాసిలో నేను తప్పించుకున్నాను కాబట్టి ఇప్పుడు ట్వీట్స్ చేయగలుగుతున్నాను. సమయం, జీవితం గురించి పెద్ద గుణపాఠాలే నేర్చుకున్నాను’ అని తెలిపారు. ఈ ఘటనపై కమల్ హాసన్ కూడా ట్వీట్ చేసారు. ‘‘ఆ ముగ్గురి కుటుంబాలు పడుతున్న బాధకంటే నేను ఎక్కువగా చింతిస్తున్నాను. ఇలా జరుగుతుందని అనుకోలేదు. గాయపడిన వారిని హాస్పిటల్‌కు తరలించాం. నేను డాక్టర్లతో మాట్లాడి వెంటనే చికిత్స ప్రారంభించాల్సిందిగా కోరాను. వారంతా త్వరలో కోలుకోవాలని ఆశిస్తున్నాను’ అన్నారు. సినిమా షూటింగ్ జరుగుతుండగా 150 అడుగుల భారీ క్రేన్ తెగిపడి అక్కడే ఉన్న టెంట్‌పై పడింది. ఈ ప్రమాదంలో ఇద్దరు అసిస్టెంట్ డైరెక్టర్లు, ఓ లైట్‌బాయ్ అక్కడికక్కడే మృతి చెందినట్లు సోషల్ మీడియాలో కొంత మంది పోస్టు చేశారు. శంకర్ సినిమా షూటింగ్‌లో పెను విషాదం చోటు చేసుకుందని కామెంట్లు పెట్టారు.
By February 20, 2020 at 09:56AM
No comments