ఉద్యోగాల భర్తీలో రిజర్వేషన్లు: సుప్రీం సంచలన తీర్పు.. దేనికి సంకేతం

ప్రభుత్వ ఉద్యోగాలు, పదోన్నతుల్లో రిజర్వేషన్లపై సర్వోన్నత న్యాయస్థానం శుక్రవారం సంచలన తీర్పు వెలువరించింది. ప్రభుత్వ ఉద్యోగాల్లో రిజర్వేషన్లు అంతర్లీనంగా ఉన్నాయనే రాజ్యాంగ అపోహలకు సుప్రీం తన తీర్పుతో పుల్‌స్టాప్ పెట్టింది. ఎస్సీ, ఎస్టీ, ఓబీసీల కోటాల పరిమితికి రాష్ట్రాలు కట్టుబడి ఉండవని, పొందడం ప్రాథమిక హక్కుకాదని తీర్పు ఇచ్చింది. పదోన్నతుల్లో రిజర్వేషన్లు అమలుచేయాలనడం ప్రాథమిక హక్కుల్లో భాగం కాదని తేల్చిచెప్పింది. అంతేకాదు, పదోన్నతుల్లో రిజర్వేషన్లు కల్పించాలని రాష్ట్ర ప్రభుత్వాన్ని ఆదేశిస్తూ మండమస్ జారీ చేయలేమని సుప్రీంకోర్టు స్పష్టం చేసింది. ఉత్తరాఖండ్ ప్రభుత్వం 2012 సెప్టెంబరు 5న ప్రభుత్వ ఉద్యోగాల భర్తీకి విడుదల చేసిన నోటిఫికేషన్ కేసులో సుప్రీంకోర్టు శనివారం తుది తీర్పు వెలువరించింది. అప్పటి ఉత్తరాఖండ్ ప్రభుత్వం ఈ ఉద్యోగాల భర్తీలో ఎస్సీ, ఎస్టీలకు రిజర్వేషన్లు కల్పించలేదు. దీనిపై అభ్యంతరం వ్యక్తం చేస్తూ పలువురు ఆ రాష్ట్ర హైకోర్టును ఆశ్రయించారు. దీనిపై విచారణ చేపట్టిన హైకోర్టు.. నోటిఫికేషన్లను నిలుపుదలచేస్తూ ఆయా వర్గాలకు రిజర్వేషన్లు ఇవ్వాలని ప్రభుత్వాన్ని ఆదేశించింది. ఈ తీర్పును సవాల్ చేస్తూ ఉత్తరాఖండ్ ప్రభుత్వం.. సర్వోన్నత న్యాయస్థానంలో పిటిషన్ దాఖలు చేసింది. విచారణ సందర్భంగా ఉత్తరాఖండ్ ప్రభుత్వం తరఫున వాదనలు వినిపించిన లాయర్లు.. రాజ్యాంగంలోని ఆర్టికల్ 16(4), (4-ఎ) ప్రకారం పొందడం ప్రాథమిక హక్కు కాదని కోర్టుకు తెలిపాయి. ఈ వాదనలతో ఏకీభవించిన జస్టిస్ ఎల్ నాగేశ్వరరావు, జస్టిస్ హేమంత్ గుప్తాల ధర్మాసనం.. ఒకవేళ ప్రభుత్వ అభిప్రాయానికి తగినంత ప్రాతినిధ్యం వహించకపోతే ఎస్సీ, ఎస్టీలకు ఉద్యోగాలలో రిజర్వేషన్లు, పదోన్నతులు కల్పించడానికి రాష్ట్రాలకు అధికారం ఇస్తుందని పేర్కొంది. ప్రభుత్వం విడుదలచేసిన నోటిఫికేషన్‌ను సమర్ధించిన ధర్మాసనం.. హైకోర్టు తీర్పును రద్దుచేసింది. ‘ప్రభుత్వ ఉద్యోగాల భర్తీలో రిజర్వేషన్లు కల్పించాలని రాష్ట్ర ప్రభుత్వాన్ని ఆదేశించలేమని చట్టం చెబుతోంది... అదేవిధంగా.. పదోన్నతుల విషయంలోనూ ఎస్సీ, ఎస్టీలకు రిజర్వేషన్లు ఇవ్వడానికి రాష్ట్రం కట్టుబడి ఉండదు. ఒకవేళ రాష్ట్రాలు తమ అభీష్టానుసారం, అలాంటి నిబంధనలు అమలుచేయాలని భావిస్తే ప్రజా సేవలో వారి అసమర్థతను నిరూపించే వివరణాత్మక సమాచారాన్ని సేకరించాలని’ జస్టిస్ ఎల్ నాగేశ్వరరావు వ్యాఖ్యానించారు. రిజర్వేషన్ల అమలుకు కట్టుబడకపోవడం, రాష్ట్రం తన నిర్ణయాన్ని సమర్థించుకోవలసిన అవసరం లేదు... ఈ విషయాన్ని ఎస్సీ, ఎస్టీలు సుప్రీంకోర్టు దృష్టికి తీసుకొచ్చినా కచ్చితంగా అమలుచేయాలని రాష్ట్ర ప్రభుత్వానికి మాండమస్ రిట్ జారీ చేయలేమని ధర్మాసనం స్పష్టం చేసింది. సీనియర్ న్యాయవాదులు రంజిత్ కుమార్, ముకుల్ రోహిత్గీ, పీఎస్ నరసింహలు ఉత్తరాఖండ్ ప్రభుత్వం తరఫున వాదనలు వినిపించారు. ప్రభుత్వ ఉద్యోగాలు, పదోన్నతుల్లో రిజర్వేషన్ల పొందడం ప్రాథమిక హక్కు కాదని, వీటిని అమలుచేయాలని రాజ్యాంగంలో రాష్ట్రాలకు విధివిధానాలు స్పష్టం చేయలేదన్నారు.

By February 09, 2020 at 09:19AM

Read More https://telugu.samayam.com/latest-news/india-news/supreme-court-verdict-on-provide-reservations-in-govt-jobs-and-promotions/articleshow/74039177.cms