సీఏఏ వ్యతిరేక ఆందోళనకు సిక్కుల మద్దతు వీడియో వైరల్.. అసలు నిజం ఇదీ
పౌరసత్వ సవరణ చట్టానికి వ్యతిరేకంగా దేశ రాజధాని ఢిల్లీలోని షాహీన్‌బాగ్‌లో ముస్లింలు ఆందోళనలు నిర్వహిస్తున్న విషయం తెలిసిందే. ఈ ఆందోళనలో పెద్ద సంఖ్యలో సిక్కులు కూడా పాల్గొని తమ సంఘీభావం తెలియజేశారని పేర్కొంటూ మొహమూద్ జావేద్ అనే వ్యక్తి ఫేస్‌బుక్‌లో ఓ వీడియో పోస్ట్ చేశాడు. సిక్కు సోదరులు ర్యాలీగా షాహీన్‌బాగ్‌కు వచ్చి.. సీఏఏ, ఎన్‌ఆర్సీలు వద్దంటూ చేపట్టిన డిమాండ్‌కు మద్దతుగా ఉంటాని చెప్పినట్టు వీడియోను పోస్ట్ చేసిన వ్యక్తి పేర్కొన్నాడు. అయితే, వాస్తవానికి ఆ వీడియో గతేడాది నవంబరులో పంజాబ్‌లోని సుల్తాన్‌పూర్ లోధి వద్ద సిక్కులు నిర్వహించిన ఊరేగింపునకు సంబంధించింది. ఢిల్లీలోని షహీన్‌బాగ్‌ ఆందోళనలతో దీనికి ఏమాత్రం సంబంధం లేదు. నిర్ధారణ ప్రక్రియ జావేద్ పోస్ట్‌చేసిన వీడియోలో ఉన్న మోటార్ బైక్ పంజాబ్ రిజిస్ట్రేషన్‌తో ఉంది.. PB08BA 8747 అనే నెంబరు జలంధర్‌ ప్రాంతానిది కాగా, పంజాబ్ పోలీసులకు సంబంధించిన జీప్ కూడా ఆ ర్యాలీలో ఉంది. తెల్లటి రంగు దస్తులు, తలపాగా ధరించి ఉన్నందున వారంతా నామ్‌ధారీ వర్గానికి చెందిన సిక్కులుగా గుర్తించారు. వీటి ఆధారంగా గూగుల్‌లో కీలక పదాలను శోధించి 2019 నవంబర్ 2 2019 నాటి పంజాబ్ కేసరి పత్రికలో వచ్చిన కథనంతో ధ్రువీకరించారు. సిక్కు మత స్థాపకుడు గురు నానక్ దేవ్ 550వ జయంత్యుత్సవాలను పురస్కరించుకుని పంజాబ్‌లోని కపుర్తలా జిల్లా సుల్తాన్‌పూర్ లోధిలో నామ్‌ధారీ వర్గానికి చెందిన సిక్కులు ఈ ర్యాలీని నిర్వహించారు. ఈ సమాచారంతో పాటు యూట్యూబ్‌లో నవంబరు 3, 2019లో అప్‌లోడ్ చేసిన వీడియో ఆధారంగా జావేద్ పోస్ట్‌ను ఫేక్‌‌గా ధ్రువీకరించాం. ‘సుల్తాన్‌పూర్ లోధి నామ్‌ధారీ సంగత్ 50000’అనే టైటిల్‌తో ఉన్న ఈ వీడియో సిక్కుల ఊరేగింపులో మరో కోణాన్ని తెలియజేస్తుంది. అలాగే నవంబరు 2, 2019 నాటి ఈ ఊరేగింపునకు సంబంధించిన మరో వీడియో గుర్తించి, అందులోని పంజాబ్ పోలీసు జీపును గమనించిన తర్వాత జావేద్ పోస్ట్ చేసిన వీడియో షహీన్‌బాగ్‌ది కాదని నిర్ధారించారు. పౌరసత్వ సవరణ చట్టం 2019, నేషనల్ రిజిస్టర్ ఆఫ్ సిటిజన్స్‌కు వ్యతిరేకంగా షాహీన్ బాగ్‌లో ముస్లింలు చేపట్టిన ఆందోళనలకు సంఘీభావం తెలుపుతూ భారీగా సిక్కులు తరలివచ్చారనేది తప్పుడు వాదన.. ఇది పంజాబ్‌లో సిక్కులు నిర్వహించిన ఊరేగింపునకు సంబంధించిన పాత వీడియోగా టైమ్స్ ఫాక్ట్ చెక్ విభాగం గుర్తించింది.
By February 19, 2020 at 09:19AM
No comments