అమెరికా స్థావరంపై మరోసారి రాకెట్ దాడి.. పశ్చిమాసియాలో మళ్లీ ఉద్రిక్తతలు
ఇరాక్లోని అమెరికా సైనిక స్థావరంపై మరోసారి రాకెట్ దాడి చోటుచేసుకుంది. ఉత్తర ఇరాక్లోని కిర్కుక్ ప్రావిన్సులో ఉన్న అమెరికా సైనిక స్థావరం కే1పై రాకెట్ దాడి జరిగింది. అయితే, ఈ దాడుల్లో ఎవరూ గాయపడలేదని ఇరాక్ భద్రతా అధికారులు వెల్లడించారు. అయితే, పూర్తి వివరాలను వెల్లడించడానికి వారు నిరాకరించారు. ఇదే స్థావరంపై గత డిసెంబర్ 27న దాడికి పాల్పడి.. దాదాపు 30 రాకెట్లను ప్రయోగించారు. ఆ దాడుల్లో అమెరికాకు చెందిన ఒక ఉన్నతాధికారి ప్రాణాలు కోల్పగా... ఈ దాడుల వెనుక హెజ్బోలా ఉగ్రవాద సంస్థ ఉన్నట్టు అమెరికా ఆరోపించింది. సైనిక స్థావరంపై దాడికి ప్రతీకారంగా హెజ్బోలా ఉగ్రవాద శిబిరాలపై అమెరికా విరుచుకుపడింది. ఈ ప్రతీకార దాడుల్లో 25 మంది హెజ్బోలా ఉగ్రవాదులు హతమయ్యారు. ఇరాన్ రివల్యూషనరీ గార్డ్స్ కమాండర్ జనరల్ ఖాసిం సులేమానీని బాగ్దాద్ విమానాశ్రయంలో అమెరికా సైన్యం హతమార్చింది. దీంతో అమెరికా, ఇరాన్ మధ్య ఉద్రిక్తతలు తారాస్థాయికి చేరుకుని యుద్ధ మేఘాలు కమ్ముకున్నాయి. సులేమానీ హత్యకు ప్రతీకారం తీర్చుకుంటామని ప్రకటింని ఇరాన్.. అన్నంత పనీ చేసింది. ఇరాక్లో అమెరికా సైనిక స్థావరాలపై రాకెట్ దాడులు చేసింది. అలాగే ఇరాన్కు చెందిన పలు ఉగ్ర సంస్థలు సైతం అమెరికా స్థావరాలపై దాడులకు పాల్పడుతున్నాయి. తాజా దాడుల నేపథ్యంలో, పశ్చిమాసియాలో మరోసారి ఉద్రిక్తతలు పెరిగే అవకాశం ఉందని నిపుణులు అంచనా వేస్తున్నారు. మరోవైపు, అమెరికా సైన్యం తమ దేశం విడిచివెళ్లిపోవాలని ఇరాక్ పార్లమెంట్లో ప్రవేశపెట్టిన తీర్మానానికి అనుకూలంగా సభ్యులు ఓటేశారు. అయితే, దీనిపై ఇరాక్ అధ్యక్షుడు మాత్రం తన నిర్ణయాన్ని ప్రకటించలేదు. సద్దాం హుస్సేన్ను మట్టుబెట్టిన తర్వాత ఇరాక్లో అమెరికా సైన్యం గుత్తాధిపత్యం కొనసాగుతోంది.
By February 14, 2020 at 11:46AM
No comments