చిన్నారులను బంధించిన యూపీ వ్యక్తి.. రష్యాలో జరిగిన ఓ ఘటనను స్ఫూర్తిగా తీసుకున్నాడు!

ఉత్తరప్రదేశ్‌లోని ఫరుఖాబాద్ జిల్లాలో రెండు రోజుల కిందట పుట్టిన రోజు పేరుతో 23 మంది చిన్నారులను ఇంటికి పిలిచి వారిని బంధీలుగా చేసుకున్న వ్యక్తిని పోలీసులు కాల్చి చంపిన విషయం తెలిసిందే. ఈ ఘటనలో కసారియా గ్రామంలో చోటుచేసుకోగా, ఓ హత్యకేసులో శిక్ష అనుభవిస్తున్న నిందితుడు సుభాశ్ బాథమ్ ఓ పథకం ప్రకారం పిల్లలను బంధించాడు. బెయిల్‌పై బయటకు వచ్చిన నిందితుడు ఇందు కోసం నెల రోజుల నుంచే పథకం వేసినట్టు కాన్పూర్ రేంజ్ ఐజీ మోహిత్ అగర్వాల్ తెలిపారు. నిందితుడు మొబైల్ ఫోన్‌ను స్వాధీనం చేసుకున్న పోలీసులకు అందులో కీలక సమాచారం లభ్యమైంది. తన డిమాండ్లను నెరవేర్చుకోవాలనే ఉద్దేశంతో దీర్ఘకాలికమైన ప్రణాళిక వేసిన నిందితుడు.. అంతకు ముందు రష్యాలో జరిగిన ఇలాంటి సంఘటనను క్షుణ్ణంగా పరిశీలించినట్టు పోలీసులు గుర్తించారు. బాంబుల తయారీలో మెలకువల గురించి ఆన్‌లైన్‌లో శోధించి, సమాచారం డౌన్‌లోడ్ చేసినట్టు ఓ సీనియర్ పోలీస్ అధికారి వెల్లడించారు. రష్యాలో 2004లో చోటుచేసుకున్న ఘటనపై కూడా పూర్తి వివరాలను, నాడు నిందితుడు అనుసరించి వ్యూహాలను తెలుసుకున్నాడు. ఓ దోపిడీ కేసులో నాలుగు నెలల కిందట జైలుకు వెళ్లిన అతడు అక్కడ ఉండగానే వ్యూహరచన చేసి, ఇతర ఖైదీల నుంచి మరిన్ని వివరాలను గ్రహించి.. అంతేకాదు, వారి సాయంతో ఆయుధాలు, పేలుడు పదార్థాలను సేకరించాడు. తన వ్యూహం అమలుచేయడానికి నిందితుడు బాథమ్ ఎవరి సహకారమైనా తీసుకున్నాడా? అనే కోణంలో విచారిస్తున్నామని, అతడి కాల్ డేటాను విశ్లేషిస్తున్నామని పోలీసులు పేర్కొన్నారు. చిన్నారులను బంధీలుగా చేసుకున్న నిందితుడు తన ఇంటిలో బాంబులు అమర్చినట్టు హెచ్చరించాడని అన్నారు. వారిని వదిలిపెట్టాలంటే ఒక్కొక్కరికి కోటి రూపాయాలు ఇవ్వాలని డిమాండ్ చేశాడని, అతడిని సముదాయించేందుకు ప్రయత్నించిన పోలీసులపై రెండు రౌండ్లు కాల్పుల జరిపాడన్నారు. దీంతో పోలీసులు ఎదురు కాల్పులు జరిపి నిందితుడ్ని మట్టుబెట్టారు. అతడి ఇంటి నుంచి నాటు తుపాకీ, 315 బోర్ రైఫిల్, 20 లోడ్‌చేసిన కాంట్రేడ్జ్‌లు, 135 నాటుతుపాకులు, సిలెండర్ బాంబులు, బాంబుల తయారీకి వాడే మెటీరియల్ స్వాధీనం చేసుకున్నారు.

By February 02, 2020 at 12:39PM

Read More https://telugu.samayam.com/latest-news/india-news/farrukhabad-man-who-took-23-children-hostage-had-studied-a-similar-case-in-russia-say-up-cops/articleshow/73866241.cms