కరోనా వైరస్: చైనాలో తగ్గుతుంటే ఆ దేశాల్లో మాత్రం ప్రమాద ఘంటికలు!
కరోనా వైరస్తో మృతిచెందినవారి సంఖ్య 2,442కి చేరుకుంది. శనివారం మరో 97 మంది మృతిచెందగా, 648 మందికి కొత్తగా వైరస్ సోకింది. దీంతో బాధితుల సంఖ్య 76,936కి చేరింది. చైనాలో కేసులు తగ్గుముఖం పట్టినా మిగతా దేశాల్లో క్రమంగా బాధితుల సంఖ్య పెరగడంతో ఆందోళన వ్యక్తమవుతోంది. ప్రపంచవ్యాప్తంగా మొత్తం 25 దేశాల్లో కరోనా వైరస్ విస్తరించింది. ఐరోపా, ఆసియా, మధ్య ఆసియాలో ప్రమాద ఘంటికలు మోగడంతో కొన్ని దేశాల్లో కార్యాలయాలు, పాఠశాలలకు సెలవులు ప్రకటించారు. మరోవైపు, ప్రపంచ ఆరోగ్య సంస్థ(డబ్ల్యూహెచ్ఓ)కు చెందిన నిపుణుల బృందం కొవిడ్-19 తాకిడి ఎక్కువగా ఉన్న హుబెయ్ ప్రావిన్సుల్లో శనివారం పర్యటించింది. స్థానిక వైద్యులతో కలిసి అక్కడి ప్రజలు, బాధితులతో మాట్లాడిన నిపుణుల బృందం.. పరిస్థితిని అడిగి తెలుసుకుంది. ఈ బృందంలో అమెరికా, జర్మనీ, జపాన్, నైజీరియా, రష్యా, సింగపూర్, దక్షిణ కొరియాకు చెందిన నిపుణులు ఉన్నారు. తొలుత వీరిని వుహాన్లో అనుమతించడానికి చైనా ప్రభుత్వం నిరాకరించినా.. చివర్లో అంగీకరించడం విశేషం. హుబే ప్రావిన్సులో 630 కొత్త కేసులు నమోదుకాగా.. అక్కడ వైరస్ బారిన పడ్డవారి సంఖ్య 64,084కు చేరింది. కొత్తగా వైరస్ సోకుతున్న వారి కంటే కోలుకొని ఇళ్లకు చేరుతున్న వారి సంఖ్యే అధికంగా ఉందని అధికారులు తెలిపారు. గత ఐదు రోజులుగా వైరస్ కేసులు తగ్గుముఖం పట్టాయి. ఇప్పటి వరకు 22,888 మంది వైరస్ నుంచి విముక్తి పొందినట్లు వెల్లడించారు. మరోవైపు, జపాన్, దక్షిణ కొరియాలో కరోనా బాధితుల సంఖ్య పెరుగుతోంది. జపాన్లో 1,200, దక్షిణ కొరియాలో 556 కేసులు నమోదయ్యాయి. అటూ ఇరాన్లోనూ కరోనా వైరస్ కారణంగా నలుగురు ప్రాణాలు కోల్పోయారు. టెహ్రాన్ సహా ప్రధాన నగరాల్లో వైరస్ సోకినట్టు అధికారులు తెలిపారు. అలాగే కెనాడా, లెబనాన్లో పర్యటించిన ఇరాన్ పౌరులకు వైరస్ సోకినట్టు నిర్ధారించారు. ఇటలీలోనూ బాధితుల సంఖ్య 89కి చేరుకోవడంతో తీవ్ర ఆందోళన వ్యక్తమవుతోంది. చైనాలో మొదలైన వైరస్ ప్రపంచంలోని వివిధ దేశాలకు వ్యాప్తిచెందడంతో అప్రమత్తంగా ఉండాలని డబ్ల్యూహెచ్ఓ చీఫ్ టెడ్రోస్ అధ్నామ్ ఘేబ్రియాసిస్ హెచ్చరించారు. వైరస్ వ్యాప్తిని అరికట్టడానికి దేశాలు తక్షణ చర్యలు తీసుకోకపోతే పెను ముప్పు తప్పదని, ఏ పరిణామాలకు దారితీస్తుందో చెప్పలేమని అన్నారు.
By February 23, 2020 at 11:54AM
No comments