Iran Tensions పశ్చిమాసియాలో ఉద్రిక్తతలు.. విమాన సంస్థలు, ప్రయాణికులకు భారత్ కీలక సూచన
గతవారం బాగ్దాద్ విమానాశ్రయంపై అమెరికా సైన్యం రాకెట్ దాడులకు పాల్పడి ఇరాన్ రివల్యూషనరీ గార్డ్స్ సైన్యాధిపతి ఖాసిం సులేమానీని మట్టుబెట్టిన తర్వాత పశ్చిమాసియాలో యుద్ధ మేఘాలు కమ్ముకున్నాయి. తాజాగా, ఇరాక్‌లోని అమెరికా వైమానిక స్థావరాలపై ఇరాన్ బాలిస్టిక్ క్షిపణులతో విరుచుకుపడింది. అల్‌ అసద్‌, ఇర్బిల్‌ ఎయిర్‌బేస్‌లపై డజనుకుపైగా క్షిపణులతో దాడిచేసింది. సులేమానీ హత్యకు ప్రతీకారం తీర్చుకుంటామని ప్రకటించిన నాలుగు రోజుల్లోనే ఈ దాడికి పాల్పడటం గమనార్హం. ఇరాన్‌తో చేసుకున్న అణు ఒప్పందం నుంచి వైదొలగిన అమెరికా.. మధ్య ఆసియాలో యుద్ధ విమానాలను మోహరిస్తామని 2019 మేలో ప్రకటించింది. అంతకు ముందే ఏప్రిల్‌లో ఇరాన్ రివల్యూషనరీ గార్డ్స్‌ను ఉగ్రవాద సంస్థగా ప్రకటించడం విశేషం. దీంతో అమెరికా, ఇరాన్ మధ్య పచ్చగడ్డివేస్తే భగ్గుమంటోంది. తాజాగా సులేమానీ హత్యతో పరిస్థితి మరింత ఉద్రిక్తంగా మారి ఒకరిపై ఒకరు కత్తులు దూసుకుంటున్నారు. ఈ నేపథ్యంలో విమానయాన సంస్థలకు భారత్ సూచనలు జారీచేసింది. ఇరాన్, ఇరాక్ సహా పర్షియన్ గల్ఫ్, ఒమన్ గగనతలం మీదుగా విమాన ప్రయాణాలు ప్రస్తుత పరిస్థితుల్లో సురక్షితం కాదని హెచ్చరించింది. ఇరాక్‌లో ప్రత్యేక పరిస్థితి నెలకున్నాయని, తదుపరి ప్రకటన వెలువడే వరకూ అత్యవసరమైతే తప్ప ఆ దేశానికి భారత పౌరులు తమ ప్రయాణాలు వాయిదావేసుకోవాలని విదేశాంగ శాఖ ప్రకటించింది. అలాగే ఇరాక్‌లోని భారతీయులు అప్రమత్తంగా ఉండాలని, ఆ దేశంలో ప్రయాణించడం అంత క్షేమం కాదని ఓ ప్రకటనలో విదేశాంగ శాఖ వెల్లడించింది. మరోవైపు, తన సైనిక స్థావరాలపై ఇరాన్ క్షిపణి దాడులకు పాల్పడటంపై అమెరికా తీవ్రంగా పరిగణించింది. మధ్య అసియా వ్యాప్తంగా మరింత పెద్ద ఎత్తున దళాలను తరలిస్తామని రక్షిణ శాఖ వర్గాలు వెల్లడించాయి.
By January 08, 2020 at 10:51AM
No comments