ఆస్ట్రేలియాలో విస్తరిస్తున్న కార్చిచ్చు.. 24 మంది మృతి, లక్షలాది జంతవులు బలి

ఆస్ట్రేలియాలో కార్చిచ్చు తీవ్రరూపం దాల్చింది. సెప్టెంబరు 23న మొదలైన ఈ కార్చిచ్చు రోజు రోజుకూ విస్తరిస్తూ భయభ్రాంతులకు గురిచేస్తోంది. ఇప్పటి వరకు ఈ మంటలకు 24 మంది చనిపోగా, వేలాది మూగజీవాలు సజీవదహనమయ్యాయి. శనివారం నాడు మంటలు మరింత విస్తరించి, పొగలు వ్యాపించడంతో ఆకాశం నల్లగా మారింది. గంటకు 80 కిలోమీటర్ల వేగంతో వేడి గాలులు వీస్తుండగా, ఉష్ణోగ్రతలు 48.9 డిగ్రీల సెల్సియస్‌కు చేరుకున్నాయి. మంటలను అదుపు చేయడానికి ప్రభుత్వం 3,000 మంది సైనికులను రంగంలో దింపింది. ప్రజలు సైతం పెద్ద సంఖ్యలో స్వచ్ఛందంగా ముందుకు వచ్చి మంటలను ఆర్పడానికి సహకరిస్తున్నారు. కార్చిచ్చు వల్ల విద్యుత్తు లైన్లు దెబ్బతినడంతో సిడ్నీ సహా ఇతర ప్రధాన నగరాలకు విద్యుత్తు సరఫరా నిలిచిపోయే ప్రమాదం ఉంది. న్యూ సౌత్‌‌ వేల్స్‌, విక్టోరియా రాష్ట్రాల్లో పరిస్థితి దారుణంగా ఉంది. మొత్తం 60 లక్షల హెక్టార్లలో మంటలు వ్యాపించగా, న్యూసౌత్‌ వేల్స్‌లో 40 లక్షల హెక్టార్లు, విక్టోరియాలో 8 లక్షల హెక్టార్లలో చెట్లు, పంటలు అగ్నికి ఆహుతయ్యాయి. కార్చిచ్చు ప్రాంతంలో ప్రధాని స్కాట్ మోరిసన్ పర్యటించనున్నారు. ఈ విపత్తు కారణంగా స్కాట్‌ మోరిసన్‌ భారత పర్యటనను వాయిదా వేసుకున్నారు. జనవరి 13 నుంచి 4 రోజుల పాటు ఆయన భారత్‌‌లో పర్యటించాల్సి ఉంది. విక్టోరియా రాష్ట్రంలోని బిమ్స్‌డేల్‌లో దేశి గ్రిల్‌ హోటల్‌ నిర్వహిస్తున్న భారత సంతతికి చెందిన కన్వల్జీత్‌ సింగ్‌, కమల్‌జీత్‌ కౌర్‌లు బాధితులకు అండగా నిలిచారు. తమ హోటల్‌లో ఉచితంగా ఆహారం అందజేస్తున్నారు. సహాయ శిబిరాల్లో ఉన్నవారికీ భోజన ఏర్పాట్లు చేస్తున్నారు. మరోవైపు, ఆస్ట్రేలియా జంతు ప్రేమికుడు, షార్క్ దాడిలో ప్రాణాలు కోల్పోయిన స్టీవ్ ఇర్విన్ కుటుంబం ఆయన వారసత్వాన్ని కొనసాగించి తమకు మూగజీవాలంటే ఎంత అభిమానమో చాటుకున్నారు. ఇర్విన్ కుమార్తె బిండ్ సహా కుటుంబసభ్యులు కార్చిచ్చులో గాయపడిన జంతువులను రక్షించి తమ వన్యప్రాణి హాస్పిటల్‌లో చికిత్స అందజేస్తున్నారు. ఆదివారం నాడు మంటలు కొద్దిగా తగ్గి చల్లబడంతో కొంత ఉపశమనం కలిగింది. అయితే, పరిస్థితులు ఇంకా అస్థిరంగా ఉన్నాయని, అప్రమత్తంగా ఉండాలి అధికారులు హెచ్చరించారు. మంటలను అదుపుచేయడానికి వేలాది ఫైర్ ఇంజిన్లను వినియోగిస్తున్నారు. న్యూసౌత్ వేల్స్, విక్టోరియాలో పరిస్థితి కొంత మెరుగుపడింది.. కానీ చాలా చోట్ల మంటలు చెలరేగుతున్నాయి.. వీటిని అదుపుచేయడానికి అగ్నిమాపక సిబ్బంది తీవ్రంగా శ్రమిస్తున్నారని ప్రధాని మోరిసన్ ట్వీట్ చేశారు.

By January 05, 2020 at 11:27AM

Read More https://telugu.samayam.com/latest-news/international-news/deadly-fires-are-threatening-australias-way-of-life-death-toll-to-24/articleshow/73105837.cms