దేశంలో రేప్ కేసుల పరిస్థితేంటి? రాష్ట్రాలు, హైకోర్టులకు సుప్రీం సూటి ప్రశ్న
దేశంలో రోజు రోజుకూ పెరుగుతున్న అత్యాచార ఘటనలను తీవ్రంగా పరిగణించింది. ఈ తరహా నేరాల పెరిగిపోవడంపై సర్వోన్నత న్యాయస్థానం తీవ్ర ఆందోళన వ్యక్తంచేసింది. లైంగిక నేరాల విషయంలో న్యాయం అందుతున్న తీరును అంచనా వేసేందుకు సంబంధిత వ్యాజ్యాన్ని సుమోటోగా స్వీకరించింది. అలాంటి కేసుల్లో విచారణ, సాక్ష్యాల సేకరణ, ఫోరెన్సిక్, మెడికల్ నివేదికలు, బాధితుల వాంగ్మూలం, విచారణకు పట్టిన సమయం తదితర వివరాలను సమర్పించాలని అన్ని రాష్ట్ర ప్రభుత్వాలు, హైకోర్టులను కోరింది. వచ్చే ఏడాది ఫిబ్రవరి 7లోగా రేప్ కేసులకు సంబంధించి నివేదికను సమర్పించాలని సుప్రీం కోర్టు ప్రధాన న్యాయమూర్తి జస్టిస్ బోబ్డే నేతృత్వంలోని త్రిసభ్య ధర్మాసనం బుధవారం ఆదేశించింది. ఈ ధర్మాసనంలో చీఫ్ జస్టిస్ ఎస్ఏ బాబ్డేతోపాటు జస్టిస్ బీఆర్ గవాయ్, జస్టిస్ సూర్యకాంత్ సభ్యులుగా ఉన్నారు. ఏడేళ్ల కిందట 2012లో చోటుచేసుకున్న నిర్భయ వంటి భయంకర ఘటనల విషయంలో బాధితులకు సత్వర న్యాయం అందకపోవడం వల్ల ప్రజల నుంచి నిరసనలు వ్యక్తమవుతున్నాయని, అశాంతికి కారణమవుతున్నాయని ధర్మాసనం వ్యాఖ్యానించింది. ఆయా రాష్ట్రాల నుంచి అందిన నివేదికల్లోని సమాచారాన్ని అంతా క్రోడీకరించడం ద్వారా లైంగిక నేరాల విషయంలో నిబంధనల సమగ్ర అమలుకు ఉపయోగపడుతుందని ధర్మాసనం అభిప్రాయపడింది. ఈ విషయంలో సహకారం కోసం సిద్ధార్థ లూత్రాని అమికస్ క్యూరీగా నియమించింది. మరోవైపు, తనకు విధించిన మరణశిక్షపై పునఃసమీక్షించాలంటూ నిర్భయ కేసులో దోషి అక్షయ్ సింగ్ దాఖలుచేసిన పిటిషన్ను సుప్రీంకోర్టు బుధవారం తిరస్కరించింది. జస్టిస్ ఆర్ఆర్ భానుమతి నేతృత్వంలోని త్రిసభ్య ధర్మాసనం ఈ మేరకు నిర్ణయం తీసుకుంది. దీంతో దోషులకు ఢిల్లీ హైకోర్టు విధించిన ఉరిశిక్ష ఖరారయ్యింది. సుప్రీంకోర్టు నిర్ణయంపై నిర్భయ తల్లి హర్షం వ్యక్తం చేశారు.
By December 19, 2019 at 08:04AM
No comments