బీజేపీకి అజిత్ పవార్ మద్దతు వెనుక బలమైన కారణం? ఆయన శుద్ధపూసేంకాదు?!

కాంగ్రెస్-ఎన్‌సీపీలతో కలిసి ప్రభుత్వ ఏర్పాటుకు శివసేన చేస్తున్న ప్రయత్నాలకు ఊహించని షాక్ ఇచ్చింది. శుక్రవారం రాత్రి వరకూ శివసేనతో జరిగిన చర్చల్లో పాల్గొన్న నేత అనూహ్యంగా బీజేపీకి జైకొట్టడం.. రాష్రపతి పాలనను ఎత్తివేస్తూ కేంద్ర హోం శాఖ ఉత్తర్వులు జారీచేయడం, ముఖ్యమంత్రిగా దేవేందర్ ఫడ్నవీస్ ప్రమాణస్వీకారం గంటల్లోనే జరిగిపోయాయి. దీంతో శివసేన, కాంగ్రెస్‌లు ఖంగుతిన్నాయి. అజిత్ పవార్ నిర్ణయం వ్యక్తిగతమని, ఎన్‌సీపీకి సంబంధం లేదంటూ శరద్ పవార్ స్పష్టం చేశారు. కాగా, అజిత్ పవార్‌పై శివసేన నేత సంజయ్ రౌత్ విమర్శలు గుప్పించారు. శరద్ పవార్‌ను మోసం చేశారని, మహారాష్ట్రకు వెన్నుపోటు పొడిచారని దుయ్యబట్టారు. పవార్‌కు తెలియకుండా కథ నడిపించిన అజిత్ పవార్.. తమతో జరిగిన సమావేశాల్లోనూ అంటీ ముట్టనట్టుగా వ్యవహరించారని అన్నారు. అయితే, అజిత్ పవార్ బీజేపీకి మద్దతు పలకడం వెనుక ఈడీ కేసులే కారణమని రాజకీయ వర్గాలు అంటున్నాయి. శరద్ పవార్ అన్న అనంతరావు కుమారుడైన అజిత్ పవార్ మోస్ట్ నొటోరియస్ కేరక్టర్. ఆయన వాచాలత్వం, తత్వం గురించి 2013 నాటి ఓ సంఘటనే ఉదాహరణ. పశ్చిమ మహారాష్ట్రలో 2013లో తీవ్ర కరువు, దుర్భిక్షం నెలకుంది. దీనిపై నాటి కాంగ్రెస్ ప్రభుత్వం ఎలాంటి చర్యలు తీసుకోవడం లేదంటూ షోలాపూర్‌లో ఓ రైతు నిరాహార దీక్షకు దిగాడు. ఆయన దీక్ష 55వ రోజుకు చేరుకోవడంతో అంతటా ఆందోళన వ్యక్తమైంది. ఇదే సమయంలో పుణేలో జరిగిన ఓ బహిరంగ సభలో అజిత్ పవార్ పాల్గొన్నాడు. ఆయన దీక్షను పరోక్షంగా ప్రస్తావిస్తూ… ‘డ్యాముల నుంచి నీటిని విడుదల చేయాలని షోలాపూర్‌లో ఓ వ్యక్తి 55 రోజులుగా నిరాహార దీక్ష చేస్తున్నాడు.. డ్యాముల్లోకి నీళ్లు రాలేదు మేం ఏం చేయాలి… మూత్రం పోసి నింపాలా.. అయినా తాగడానికి నీళ్లు రానప్పుడు మూత్రం కూడా రాదు కదా ?’ అంటూ బాధ్యతారాహిత్యంగా మాట్లాడాడు. ఇది ఆయన గారి వ్యక్తిత్వం. ఈ వ్యాఖ్యలపై దుమారం రేగడంతో క్షమాపణలు చెప్పారు. మహారాష్ట్రలో విద్యుత్ కొరతపై కూడా ఓ సారి నోరుజారి విమర్శలపాలయ్యాడు. జనాభా పెరగడమే విద్యుత్ కొరతకు కారణమని అన్నారు. అయితే, వ్యవసాయ మంత్రిగా ఉన్న పవార్.. రూ.70,000 కోట్ల మేర కుంభకోణానికి పాల్పడినట్టు ఆరోపణలు వెల్లువెత్తడంతో రాజీనామా చేశారు. ఈ కుంభకోణంలో అజిత్ పవార్ ఈడీ కేసులను ఎదుర్కొంటున్నారు. పలు కుంభకోణాల్లోనూ ఆయన పేరు బయటకు వచ్చింది. మహారాష్ట్ర స్టేట్ కోఆపరేటివ్ బ్యాంకు స్కాంలో అర్హత లేకున్నా అడ్డమైన డాక్యుమెంట్ల ఆధారంగా వేల కోట్లను షుగర్ ఫ్యాక్టరీలు, నూలు మిల్లులకు రుణాలుగా ఇచ్చేశారు. ఈ కేసులో బాంబే హైకోర్టు అజిత్ పవార్ సహా ఎన్సీపీ లీడర్ జయంత్ పాటిల్, మరో 70 మంది మీద ఎఫ్ఐఆర్ నమోదు చేయాలని మహారాష్ట్ర పోలీసు ఆర్థికనేరాల విభాగాన్ని ఆదేశించింది. ప్రాథమిక ఆధారాలు స్పష్టంగా కనిపిస్తున్నాయని, నాబార్డు టీం కూడా గతంలోనే నిర్ధారించిందని బాంబే హైకోర్టు అభిప్రాయపడింది.

By November 23, 2019 at 11:12AM

Read More https://telugu.samayam.com/latest-news/india-news/interesting-things-about-ncp-leader-ajit-pawar-why-supports-to-bjp/articleshow/72194722.cms