ఎఫ్‌బీఐ మోస్ట్ వాంటెడ్ జాబితాలో గుజరాతీ.. పట్టిస్తే రూ.70 లక్షల నజరానా!
భార్యను హత్యచేసి పరారీలో ఉన్న భారతీయుడ్ని అమెరికా దర్యాప్తు సంస్థ ఫెడరల్ బ్యూరో ఆఫ్ ఇన్వెస్టిగేషన్ (ఎఫ్‌బీఐ) మోస్ట్ వాంటెడ్ జాబితాలో చేర్చింది. అంతేకాదు, అతడిని పట్టిచ్చి వారికి లక్ష డాలర్లు అంటే రూ.70 లక్షలు నజరానాగా ఇస్తామని ప్రకటించింది. నాలుగేళ్లుగా తప్పించుకు తిరుగుతోన్న అతడి కోసం అమెరికా, భారత్‌లో తీవ్రంగా గాలిస్తోంది. ఎఫ్‌బీఐ తెలిపిన వివరాల ప్రకారం.. గుజరాత్‌లోని అహ్మదాబాద్ సమీపాన వీరాంగమ్‌కు చెందిన (24) అత్యంత క్రూరమైన నేరస్థుడని పేర్కొంది. భద్రేశ్ అతడి భార్య పాలక్‌ (21) ఇద్దరూ అమెరికాలోని హనోవర్‌ మేరీల్యాండ్‌లోని డంకిన్‌ డోనట్‌ స్టోర్‌లో పనిచేసేవారు. ఈ నేపథ్యంలో 2015 ఏప్రిల్‌లో వీరిద్దరూ అక్కడ రాత్రిపూట విధులు నిర్వహించారు. తర్వాత ఏం జరిగిందో గానీ పాలక్‌ తీవ్ర గాయాలతో దారుణ హత్యకు గురైంది. ఆమెపై ఆయుధంతో దాడిచేసి గాయపరిచిన ఆనవాళ్లను గుర్తించారు. ఈ ఘటనపై కేసు నమోదుచేసిన అక్కడి పోలీసులు... విచారణ చేపట్టారు. దర్యాప్తులో భాగంగా స్టోర్‌లోని సీసీఫుటేజీని పరిశీలించిన పోలీసులు అందులో రికార్డయిన దృశ్యాన్ని చూసి షాక్ తిన్నారు. హత్య జరిగిన రోజు రాత్రి పాలక్‌తో స్టోర్‌ వంట గదిలోకి వెళ్లిన భద్రేశ్.. ఆ తరవాత ఆయన ఏమీ తెలియనట్లుగా బయటకి వచ్చేయడం సీసీఫుటేజీలో కనిపించింది. స్టోర్‌ నుంచి నడుచుకుంటూ నేరుగా ఇంటికి వెళ్లిన అతడు లగేజీ సర్దుకుని క్యాబ్ ఎక్కి న్యూయార్క్ విమానాశ్రయానికి చేరుకుని పరారయ్యాడు. పాలక్‌ను హత్యచేసిన తర్వాత ట్యాక్సీలో ఓ హోటల్‌కు చేరుకున్న పటేల్.. అక్కడ ఓ గది తీసుకుని రాత్రి నిద్రపోయాడు. ఉదయం దానిని ఖాళీచేసి అక్కడ నుంచి వెళ్లిపోయినట్టు సీసీటీవీ ఫుటేజ్‌ ద్వారా గుర్తించారు. అప్పటి నుంచి అతడి కోసం ఎఫ్‌బీఐ గాలిస్తోంది. 2017లో తొలిసారి తీవ్రమైన నేరస్థుల జాబితాలో అతడి చేర్చింది. అతడి కోసం గుజరాత్, మహారాష్ట్ర, ఢిల్లీలోనూ గాలిస్తోంది. వివిధ యాంగిల్స్‌లో భద్రేశ్ ఫోటోలను ముద్రించి వాటి కింద ఇంగ్లిష్, హిందీ, గుజరాతీ, మరాఠా, ఫ్రెంచ్ భాషల్లోనూ ప్రకటనలు వెలువరించింది. ఢిల్లీలోని ఎఫ్‌బీఐ ఏజెంట్ వివిధ రాష్ట్రాల పోలీసుల సమన్వయంతో అతడి ఆచూకీ కోసం ఆరా తీస్తున్నారు. అతడి బంధువులు, స్నేహితులను ప్రశ్నిస్తున్నారు. భద్రేశ్‌కుమార్ పటేల్ కోసం ముమ్మరంగా గాలిస్తున్నామని ఢిల్లీ పోలీస్‌ విభాగానికి చెందిన ఓ సీనియర్ అధికారి వెల్లడించారు.
By October 20, 2019 at 11:34AM
No comments