హుజూర్నగర్: TDP పోటీ చేసేది, YSRCP పోటీ చేయనిది ఆయన కోసమేనా?
తెలంగాణ రాజకీయం మొత్తం ఇప్పుడు ఉప ఎన్నిక చుట్టూ తిరుగుతోంది. ప్రధాన పార్టీలకు చెందిన అభ్యర్థులంతా ఇప్పటికే నామినేషన్లు వేశారు. సర్పంచ్లు, లాయర్లు ఇండిపెండెంట్లుగా భారీ సంఖ్యలో పోటీ పడుతున్నారు. ఎంత మంది పోటీ పడినప్పటికీ.. ప్రధాన పోటీ మాత్రం కాంగ్రెస్, టీఆర్ఎస్ మధ్యే ఉండే అవకాశం ఉంది. హుజూర్నగర్లో ఉత్తమ్ కుమార్ రెడ్డి కుటుంబానిదే హవా కావడంతో.. ఇప్పటి వరకూ ఇక్కడ టీఆర్ఎస్ ఒక్కసారి కూడా గెలవలేకపోయింది. దీంతో ఈసారి ఎలాగైనా ఇక్కడ గులాబీ జెండా ఎగరేయాలనే కసితో టీఆర్ఎస్ పని చేస్తోంది. తెలంగాణ అసెంబ్లీ ఎన్నికల్లో కాంగ్రెస్తో పొత్తు పొట్టుకొని మహా కూటమి కట్టిన టీడీపీ.. తర్వాత జరిగిన లోక్ సభ ఎన్నికల్లో కాంగ్రెస్కు ప్రయోజనం చేకూర్చడం కోసం పోటీకి దూరంగా ఉంది. టీడీపీ ఏర్పాటైన తర్వాత తెలంగాణలో పూర్తిస్థాయిలో పోటీకి దూరంగా ఉండటం అదే తొలిసారి. హుజూర్నగర్ ఉప ఎన్నికలోనూ టీడీపీ కాంగ్రెస్కు మద్దతునిస్తుందని భావించారు. కానీ అనూహ్యంగా టీడీపీ బరిలో దిగింది. తమ అభ్యర్థిగా కమ్మ సామాజిక వర్గానికి చెందిన చావా కిరణ్మయి పేరును ప్రకటించింది. కాంగ్రెస్తో దోస్తీ లేదని సంకేతాలు పంపడానికే చంద్రబాబు ఈ నిర్ణయం తీసుకున్నారని భావిస్తున్నారు. టీడీపీ ఈ ఎన్నికల్లో పోటీ చేయడం ద్వారా పరోక్షంగా టీఆర్ఎస్కు లబ్ధి చేకూరుతుంది. కాంగ్రెస్కు దూరంగా జరగడంతోపాటు.. కేసీఆర్ పట్ల తామేమీ వ్యతిరేక వైఖరితో లేమని చెప్పడానికి టీడీపీకి ఈ నిర్ణయం ఉపకరిస్తుంది. ఇక మరో ఆంధ్రా పార్టీ వైఎస్ఆర్సీపీ.. ఆంధ్రా ప్రాంతానికి సమీపంగా ఉండే హుజూర్నగర్ ఉప ఎన్నికలో పోటీకి దూరంగా ఉంటున్నట్టు ప్రకటించింది. 2014 ఎన్నికల్లో తెలంగాణ ప్రాంతంలో పోటీ చేసిన వైఎస్ఆర్సీపీ ఖమ్మం జిల్లాలో మూడు ఎమ్మెల్యే సీట్లు, ఓ ఎంపీ స్థానాన్ని గెలుపొందింది. తర్వాత వారంతా కారెక్కారు. 2018 తెలంగాణ అసెంబ్లీ ఎన్నికల్లో, అనంతరం జరిగిన లోక్ సభ ఎన్నికల్లో వైఎస్ఆర్సీపీ పోటీకి దూరంగా ఉంది. కేసీఆర్తో దోస్తీనే ఇందుకు కారణం. గత ఎన్నికల్లో ఏపీలో టీడీపీని ఓడించడానికి, వైఎస్ఆర్సీపీని గెలిపించడానికి కేసీఆర్ తన వంతు ప్రయత్నించారు. జగన్, కేసీఆర్ మధ్య దోస్తీ ఉంది. ఆ కారణంగానే వైఎస్ఆర్సీపీ హుజూర్నగర్లో పోటీకి దూరంగా ఉంది. పోటీలో ఉండి టీడీపీ, పోటీకి దూరంగా ఉండి వైఎస్ఆర్సీపీ.. రెండు ఆంధ్రా పార్టీలు గులాబీ పార్టీ విజయానికి పరోక్షంగా సహకరిస్తున్నాయనేది రాజకీయ విశ్లేషకుల మాట. కేసీఆర్ రాజకీయం అంతే మరి.
By September 30, 2019 at 10:28AM
No comments