Jagan.. మీ అసలు అజెండా ఏంటీ..?: బీజేపీ పెద్దాయన ఫైర్
ఏపీలో ఎలాగైనా బలమైన పార్టీగా ఎదగాలని భావిస్తోన్న బీజేపీ.. సామ దాన బేధ దండోపాయాలను ప్రయోగిస్తోంది. కేంద్రస్థాయిలో వైఎస్ఆర్సీపీతో సఖ్యతగా ఉంటూనే.. రాష్ట్ర స్థాయిలో మాత్రం జగన్ సర్కారు నిర్ణయాలను తీవ్రంగా విబేధిస్తోంది. గతంలో చంద్రబాబును తీవ్రంగా విమర్శించిన నేతలు.. ఇప్పుడు జగన్‌ను విమర్శిస్తున్నారు. ఏమాత్రం అవకాశం దొరికినా అధికార పార్టీపై తీవ్రస్థాయిలో ఆరోపణలు గుప్పిస్తున్నారు. అమరావతిని రాజధానిగా మార్చొద్దంటూ.. టీడీపీ, జనసేనలకు పోటీగా బీజేపీ ప్రభుత్వాన్ని నిలదీసింది. ఇక మతం విషయంలో జగన్‌ను విమర్శిస్తున్న ఏకైక పార్టీ బీజేపీ. అమెరికా పర్యటనకు వెళ్లిన జగన్.. అక్కడేదో సభలో జ్యోతిప్రజ్వలనకు అంగీకరించలేదని కమలనాథులు ఆరోపించారు. దీనికి వైఎస్ఆర్సీపీ గట్టిగా బదులివ్వడంతో సెలైంట్ అయ్యారు. తాజాగా ఫాస్టర్లకు నెలా నెలా రూ.5 వేల చొప్పున గౌరవ వేతనం ఇవ్వాలని జగన్ సర్కారు తీసుకున్న నిర్ణయంపై కమలనాథులు మండిపడుతున్నారు. ఇప్పటికే బీజేపీ రాష్ట్ర అధ్యక్షుడు కన్నా లక్ష్మీనారాయణ జగన్ సర్కాపై ఫైర్ కాగా.. తాజాగా ఏపీ బీజేపీ ఇంఛార్జ్ సునీల్ దేవ్ధర్ జగన్‌ను టార్గెట్ చేశారు. ప్రభుత్వం ఒకే మతానికి అనుకూలంగా వ్యవహరిస్తూ నిధులను వినియోగిస్తోందని దేవ్ధర్ ఆరోపించారు. ఇతర మతాల్లోనూ పేదలున్నా.. పాస్టర్లకు మాత్రమే గౌరవ వేతనం ఇవ్వడం ఏంటని ప్రశ్నించారు. పాస్టర్లకు గౌరవ వేతనం ఇచ్చేలా ప్రభుత్వం తీసుకున్న నిర్ణయం అగ్నికి ఆజ్యం పోసేలా ఉందని మండిపడ్డారు. అసలు మీ రియల్ అజెండా ఏంటని నిలదీశారు. పాస్టర్లకు గౌరవ వేతనంపై ప్రభుత్వం జారీ చేసిన సర్క్యులర్ కాపీని దేవ్ధర్ ట్విట్టర్‌లో పోస్ట్‌ చేశారు. వాస్తవానికి జగన్ సర్కారు పాస్టర్లతోపాటు ఆలయ పూజారులు, ఇమామ్‌లకు కూడా గౌరవ వేతనం ఇస్తామని హమీ ఇచ్చింది. ఆలయ పూజారుల గౌరవ వేతనం పెంచడానికి, ఇప్పటికే అందుకుంటున్న వారికి గౌరవ వేతనాన్ని పెంచడం కోసం కూడా సర్క్యులర్ జారీ చేసింది. దేవాదాయ చట్టం ప్రకారం కేటగిరీ 6(సీ) పరిధిలోకి వచ్చే ఆలయాల్లో పని చేసే అర్చకులకు వేతనాన్ని 25 శాతం పెంచుతూ ప్రభుత్వం ఆదేశాలు జారీ చేసింది. మిగతా ఆలయాల్లో పని చేస్తున్న అర్చకులకు గౌరవ వేతనం, పూజా ఖర్చుల రూపంలో నెలకు రూ.10 వేల నుంచి రూ.35 వేలకు అందించనుంది. అర్చకులకు ఇళ్ల స్థలాలు అందజేసి, ఇళ్లు కట్టి ఇస్తామని కూడా ప్రభుత్వం తెలిపింది.
By September 05, 2019 at 10:13AM
No comments