మాకు స్ఫూర్తినిచ్చారు.. భవిష్యత్తులో మీతో కలిసి పనిచేస్తాం: ఇస్రోపై నాసా ప్రశంసలు
చంద్రుడిపై అధ్యయనానికి చంద్రయాన్-2 ప్రయోగించిన భారత అంతరిక్ష పరిశోధన సంస్థ (ఇస్రో) కృషిని ప్రతి ఒక్కళ్లు అభినందిస్తున్నారు. చివరి మెట్టుపై ల్యాండర్ ఆగిపోయినా ఇందులో శాస్త్రవేత్తల పడిన కష్టాన్ని గుర్తించి, గౌరవిస్తున్నారు. విదేశీ మీడియా సైతం చంద్రయాన్-2 విఫలం కాలేదని, ఆర్బిటర్ చంద్రుడి కక్ష్యలోనే ఉందని ఇది కూడా విజయమేనని వ్యాఖ్యానించింది. చంద్రయాన్-2 ప్రయోగంపై అమెరికా అంతరిక్ష పరిశోధన సంస్థ ప్రశంసలు కురిపించింది. చంద్రుడి ఉపరితలంలో దక్షిణ ధ్రువంపై వ్యోమనౌకను దింపడానికి చేసిన ప్రయత్నాన్ని నాసా శ్లాఘించింది. అంతరిక్షంలో పరిస్థితులు ఎంతో కఠినంగా ఉంటాయని, చంద్రుడి దక్షిణ ధ్రువంపై వ్యోమనౌకను దింపాలన్న ఇస్రో ప్రయత్నాలు తమకు స్ఫూర్తినిచ్చిందని కొనియాడింది. అంతేకాదు భవిష్యత్తులో సౌరవ్యవస్థపై అధ్యయనానికి ఇస్రోతో కలిసి పనిచేస్తామని స్పష్టం చేసింది. ఈ మేరకు ట్విట్టర్‌లో నాసా పేర్కొంది. ‘అంతరిక్షంలో పరిస్థితులు చాలా కఠినంగా ఉంటాయి..చంద్రయాన్-2 వ్యోమనౌకను చంద్రుడి దక్షిణధ్రువంపై దింపడానికి ఇస్రోచేసిన ప్రయత్నాన్ని అభినందిస్తున్నాం.. ఈ ప్రయోగంతో మాకు స్ఫూర్తినిచ్చారు.. భవిష్యత్తులో సౌర వ్యవస్థపై అన్వేషణకు కలిసి పనిచేసే అవకాశం కోసం ఎదురుచూస్తున్నాం’ అంటూ ట్వీట్ చేసింది. భారత్ దశాబ్దాల కృషి, ఇంజినీరింగ్ ప్రతిభకు చంద్రయాన్-2 నిదర్శనమని, ఆర్బిటర్ తన కక్ష్యలోనే ఉండి పనిచేస్తుందని, ల్యాండర్ విక్రమ్ నుంచి సంకేతాలు రాకపోవడం విఫలమైనట్టు కాదని న్యూయార్క్ టైమ్స్ వ్యాఖ్యనించింది. సెప్టెంబరు 2న చంద్రయాన్-2 ఆర్బిటర్ నుంచి విడిపోయిన విషయం తెలిసిందే. ప్రస్తుతం ఆర్బిటర్ చంద్రుడి కక్ష్యలో తిరుగుతోంది. జులై 22న శ్రీహరికోటలోని షార్ కేంద్రం నుంచి బయలుదేరిన చంద్రయాన్- 2 భూకక్ష్యలో 23 రోజుల ప్రయాణం అనంతరం ఆగస్టు 14న చంద్రుడివైపు పయనం ఆరంభించింది. వివిధ దశలను విజయవంతంగా దాటుకుంటూ ఆర్బిటర్ నుంచి ల్యాండర్ విడిపోయింది. శనివారం తెల్లవారుజామున చంద్రుడి ఉపరితలంపై దిగుతూ 14 నిమిషాలు సజావుగా సాగిన ల్యాండర్ ప్రయాణం.. మరో నిమిషంలో లక్ష్యాన్ని చేరుకుంటుందనగా సాంకేతిక సమస్య తలెత్తింది. దీంతో 2.1 కిలోమీటర్ల దూరంలో ఉండగానే సంకేతాలు నిలిచిపోయాయి.
By September 08, 2019 at 12:55PM
No comments