చంద్రయాన్-2 అఖరి దశ కక్ష్య కుదింపు: నేడు కీలక ప్రక్రియ.. ధీమాగా ఇస్రో!
ప్రస్తుతం చంద్రుడి చుట్టూ పరిభ్రమిస్తున్న భారత అంతరిక్ష పరిశోధన సంస్థ (ఇస్రో) ప్రయోగించిన ఉపగ్రహం చివరి దశ కక్ష్య కుదింపు ప్రక్రియను ఆదివారం విజయవంతంగా ముగిసింది. ముందుగా నిర్ణయించిన ప్రకారం సాయంత్రం 6.21 గంటలకు ఆన్‌బోర్డ్‌ ప్రొపల్షన్‌ వ్యవస్థ ద్వారా 52 సెకన్లపాటు ఈ ప్రక్రియను చేపట్టినట్లు తెలిపింది. ప్రస్తుతం చంద్రయాన్-2 నౌక చంద్రుడి చుట్టూ 119 X 127 కిలోమీటర్ల కక్ష్యలో పరిభ్రమిస్తోందని, దీని పనితీరు సాధారణంగానే ఉందని ప్రకటించింది. కాగా, చంద్రయాన్-2లో కీలక ఘటమైన కక్ష్య నుంచి ల్యాండర్ విక్రమ్‌ను వేరు చేయడం సెప్టెంబరు 2న మధ్యాహ్నం 12.45 నుంచి 13.45 సమయంలో చేపట్టనున్నట్లు ఇస్రో వర్గాలు తెలిపాయి. దీని తర్వాత చంద్రుడి దక్షిణ ధ్రువంలో దిగేందుకు వీలుగా ల్యాండర్ విక్రమ్‌కు రెండు డీ ఆర్బిట్ విన్యాసాలు చేపడతారు. సెప్టెంబరు 3న ఉదయం 9 నుంచి 10 గంటల మధ్య తొలి డీ ఆర్బిట్, 4న ఉదయం 3 నుంచి 4 గంటల మధ్య రెండోది చేపట్టనున్నట్లు ఇస్రో వెళ్లడించింది. సెప్టెంబరు 7న తెల్లవారుజామున 1.30 నుంచి 2.30 గంటల మధ్యలో విక్రమ్ చంద్రుడి ఉపరితలాన్ని తాకనున్నట్లు ఇస్రో అధికారిక వెబ్‌సైట్‌లో తెలిపింది. ఇస్రో ఛైర్మన్ శివన్ మాట్లాడుతూ.. చంద్రయాన్-2ను 100 x 100 కిలోమీటర్ల కక్ష్యకు దగ్గరకు తీసుకురావాలని భావిస్తున్నట్టు తెలిపారు. ఆదివారం 119 X 127 కిలోమీటర్ల కక్ష్యకు విజయవంతంగా తీసుకొచ్చినట్టు పేర్కొన్నారు. కక్ష్యకు దగ్గరగా తీసుకురావడం వల్ల ల్యాండర్ అనుకున్న ప్రదేశంలో సక్రమంగా దిగుతుందని అన్నారు. సోమవారం మధ్యాహ్నం 1 గంట సమయంలో విక్రమ్ ల్యాండర్ ఉపగ్రహం నుంచి విడిపోయి, చంద్రుడి ఉపరితలంవైపు ప్రయాణిస్తుందని శివన్ వివరించారు. ల్యాండర్ విడిపోవడం చంద్రయాన్-2లో కీలక ఘట్టమని, దీనిపై శాస్త్రవేత్తలు ధీమాగా ఉన్నారని తెలిపారు. సెప్టెంబరు 4న విక్రమ్‌ను చంద్రుడి ఉపరితలంపై 6.5 సెకెన్లపాటు దింపేందుకు సన్నాహాలు చేస్తున్నట్టు వెల్లడించారు. సెప్టెంబరు 7 తెల్లవారుజామున 1.40 గంటలకు ల్యాండర్ 35 కిలోమీటర్ల x 97 కిలోమీటర్ల మధ్య కక్ష్యలో ఉన్నప్పుడు దాని పరిమితిని పరిశీలించి, 1.55 గంటలకు ఉపరితలంపై దింపనున్నట్టు ఇస్రో ఛైర్మన్ పేర్కొన్నారు.
By September 02, 2019 at 11:33AM
No comments