TDP Mlas Suspension: అచ్చెన్నాయుడు పేరు చెప్పగానే.. సభలో రోజా జబర్దస్త్ 'స్మైల్'
అసెంబ్లీ నుంచి ముగ్గురు టీడీపీ ఎమ్మెల్యేలు సస్పెండ్ అయ్యారు. సభకు పదే, పదే అడ్డు తగులుతున్నారని ఈ సెషన్ మొత్తానికి ఎమ్మెల్యేలు అచ్చెన్నాయుడు, గోరంట్ల బుచ్చయ్య చౌదరి, నిమ్మల రామానాయుడులను డిప్యూటీ స్పీకర్ సస్పెండ్ చేశారు. అనంతరం మార్షల్స్ ముగ్గుర్ని బలవంతంగా సభ నుంచి బయటకు తీసుకెళ్లారు. టీడీపీ ఎమ్మెల్యేల్ని సస్పెండ్ చేస్తూ డిప్యూటీ స్పీకర్ నిర్ణయం తీసుకునే సమయంలో టీడీపీ ఎమ్మెల్యేలవైపు చూస్తూ నవ్వారు. రోజా నవ్వుతూ తన హావభావాలతో అందరి దృష్టిని ఆకర్షించారు. టీడీపీ ఎమ్మెల్యేల వైపు తన చేతిని చూపిస్తూ చలోక్తులు విసిరారు. తన చేతిని కెమెరాలా పెట్టి చూడండి, చూడండి అంటూ.. తోటి ఎమ్మెల్యేలవైపు తిరిగి జబర్దస్త్ స్మైల్ ఇచ్చారు. ముఖ్యంగా అచ్చెన్నాయుడు పేరు చదువుతున్న సమయంలో ఆమె ఆనందంగా కనిపించారు. అదే సమయంలో కెమెరా ఆమె మీదకు ఫోకస్ కావడంతో.. రోజా చిరు నవ్వులు హైలైట్ అయ్యాయి. టీడీపీ హయాంలో రోజా దాదాపు ఏడాది పాటూ సస్పెండ్ అయ్యారు. అసెంబ్లీ బయట నిరసన తెలిపి.. అనంతరం హైకోర్టు, సుప్రీంకోర్టులో న్యాయపోరాటం చేసి.. తిరిగి సభలోకి అడుగుపెట్టారు. సస్పెన్షన్ ఎత్తివేసే విషయంలోనూ అప్పటి స్పీకర్ కనీసం కనికరం చూపించలేదని.. అన్యాయంగా తనను సభ నుంచి గెంటేశారని ఆవేదన వ్యక్తం చేశారు. బడ్జెట్ సమావేశాల్లో టీడీపీ సభ్యులు సభలో హుందాతనం లేదంటూ చేసిన వ్యాఖ్యలకు ఆమె ఇటీవలే కౌంటరిచ్చారు. తన సస్పెన్షన్ విషయాన్ని ప్రస్తావించారు. ఇప్పుడు టీడీపీ ఎమ్మెల్యేల్ని సస్పెండ్ చేయడంతో ఆమె ఫుల్ ఖుషీగా కనిపించారు.
By July 23, 2019 at 12:42PM
No comments