పాపం పండింది.. తల్లిని గెంటేసిన కొడుకు కోడలికి జైలుశిక్ష
భర్తను కోల్పోయి వృద్ధాప్యంలో ఒంటరిగా జీవిస్తున్న తల్లి ఆస్తిపై కన్నేసిన కొడుకు భార్యతో కలిసి దారుణానికి ఒడిగట్టాడు. ఆమెను నమ్మించి ఇంట్లోనే మకాం పెట్టి ఆస్తులన్నీ తన పేరిట రాయించుకున్నాడు. అవసరం తీరాక తల్లిని ఇంటి నుంచి గెంటేసి దిక్కున్న చోట చెప్పుకోమన్నాడు. ఏం చేయాలో తెలీక పోలీసులను ఆశ్రయించిన వృద్ధురాలు చివరకు కొడుకు కోడలి ఆట కట్టించి కటకటాల్లోకి వెళ్లేలా చేసింది. సికింద్రాబాద్ పరిధిలోని నేరేడ్‌మెట్ కాకతీయ నగర్‌కు చెందిన ప్రేమకుమారికి ఇద్దరు కుమార్తెలు, ఓ కుమార్తె ఉంది. అందరికీ పెళ్లిళ్లు అయిపోవడంతో వేర్వేరుగా స్థిరపడ్డారు. దీంతో ప్రేమకుమారి భర్తతో కలిసి ఉండేది. అనారోగ్యంతో ఆయన 2013లో చనిపోవడంతో అప్పటి నుంచి ఒంటరిగానే ఉంటోంది. తల్లి పేరిట భారీగా ఆస్తులు ఉండటంతో పెద్ద కుమారుడు అమిత్‌కుమార్ వాటిని దోచేయాలని ప్లాన్ వేశాడు. భార్య లావణ్యతో కలిసి 2015లో తల్లి దగ్గరకు వచ్చి ఉంటున్నాడు. ఈ క్రమంలోనే తల్లి పేరిట ఉన్న ఆస్తులన్నింటినీ క్రమంగా తన పేరిట రిజిస్టర్ చేయించుకున్నాడు. తాను వచ్చిన పని పూర్తి కావడంతో అమిత్‌కుమార్ అదే ఏడాది తల్లిని గెంటేసి ఇంటికి తాళం వేసుకుని వెళ్లిపోయాడు. కన్నబిడ్డే ఇంత మోసానికి పాల్పడటంతో ఏమి చేయాలో తెలీని పరిస్థితుల్లో బాధితురాలు పోలీసులకు ఆశ్రయించింది. తనకు జరిగిన అన్యాయంపై ఫిర్యాదు చేయడంతో పోలీసులు అమిత్‌కుమార్, లావణ్య దంపతులపై కేసు నమోదు చేశారు. ఈ కేసును విచారించిన మల్కాజ్‌గిరి న్యాయస్థానం నిందితులకు రెండేళ్ల జైలుశిక్ష, రూ.10వేల చొప్పున జరిమానా విధిస్తూ తీర్పు చెప్పింది. నవమాసాలు మోసి కని పెంచిన తల్లిని వృద్ధాప్యంలో కష్టపెట్టడం పాపమని, ఇలాంటి వారికి ఇంకా కఠిన శిక్షలు వేయాలని సామాజిక వేత్తలు అంటున్నారు. కన్నవారిని హింసించే పిల్లలకు ఈ తీర్పు చెంపపెట్టు కావాలని అభిప్రాయపడుతున్నారు.
By July 23, 2019 at 12:45PM
No comments