ఏపీ, తెలంగాణలో అసెంబ్లీ సీట్ల పెంపు.. ఆర్టీఐ ద్వారా కీలక విషయాలు వెలుగులోకి!

విభజన చట్టంలో పేర్కొన్నట్టుగా ఏపీ, తెలంగాణలో అసెంబ్లీ స్థానాల పెంపుపై కేంద్రం ప్రయత్నాలు ప్రారంభించిందా? అంటే అవుననే వాదన వినిపిస్తోంది. కింద ప్రముఖ సెఫాలజిస్ట్‌ ఇనగంటి రవికుమార్‌ దాఖలు చేసిన పిటిషన్‌పై కేంద్ర ఎన్నికలసంఘం ఇచ్చిన సమాధానం దీనికి బలచేకూర్చుతోంది. తెలుగు రాష్ట్రాల్లో అసెంబ్లీ సీట్ల పెంపు అంశం ఏ పరిస్థితుల్లో ఉందో తెలుసుకోవడానికి రవికుమార్ చేసిన దరఖాస్తుకు ఈసీ జులై 9న ఇచ్చిన సమాధానం కొత్త వాదనను తెరమీదికి తెచ్చింది. ప్రస్తుతం జమ్మూకశ్మీర్‌, సిక్కిం రాష్ట్రాల్లో అసెంబ్లీ సీట్ల పెంపుపై కేంద్రం కసరత్తు చేస్తోంది. వీటితోపాటు ఏపీ, తెలంగాణలో అసెంబ్లీ సీట్ల పెంపు అంశాన్నికూడా చేపట్టే ఉద్దేశంతో ఏప్రిల్‌లో కేబినెట్‌ నోట్‌ తయారుచేసి ఈసీకి పంపిందేమోనన్న అనుమానాలు రాజకీయ వర్గాల నుంచి వ్యక్తమవుతున్నాయి. ఏపీ విభజన చట్టం సెక్షన్‌ 26 ప్రకారం ఆంధ్రప్రదేశ్, తెలంగాణ రాష్ట్రాల్లోని ప్రతి పార్లమెంటు స్థానం పరిధిలో రెండు అసెంబ్లీ స్థానాలను పెంచాల్సి ఉంది. దీని ప్రకారం ఏపీలో 50, తెలంగాణలో 34 అసెంబ్లీ సీట్లు పెరగాలి. అయితే ఇది రాజ్యాంగంలోని ఆర్టికల్‌ 170కి లోబడే జరగాలనే నిబంధనను అందులో పొందుపరిచారు. సంక్లిష్టతతో కూడుకున్న కావడంతో గతంలో ఎన్డీయే భాగస్వామిగా ఉన్న చంద్రబాబు, తెలంగాణ సీఎం కేసీఆర్‌లు సీట్ల పెంపుపై పలుసార్లు కేంద్ర ప్రభుత్వానికి విజ్ఞప్తి చేసినా ప్రయోజనం లేకపోయింది. దీంతో ఇది ముగిసిన అధ్యాయమే అనుకున్నారు. అయితే, 2019 సార్వత్రిక ఎన్నికల షెడ్యూల్‌ విడుదలైన తర్వాత ఏప్రిల్‌లో సీట్ల పెంపుపై ఈసీకి కేంద్ర ప్రభుత్వం కేబినెట్‌ నోట్‌ పంపింది. ఆ విషయాన్ని కేంద్ర ఎన్నికల కమిషన్ వెల్లడించింది. ఆంధ్రప్రదేశ్‌, తెలంగాణల్లో అసెంబ్లీ సీట్ల పెంపునకు సంబంధించి కేబినెట్‌ నోట్‌‌ను ఏప్రిల్‌లో కేంద్ర హోంశాఖ తమకు పంపించి దానిపై అభిప్రాయం కోరిందని ఈసీ తెలిపింది. అయితే, ఏ అంశంపై మీకు స్పష్టమైన అభిప్రాయం కావాలో ప్రొటోకాల్‌ ప్రకారం అడగాలంటూ ఏప్రిల్‌ 24న ఆ దస్త్రాన్ని కేంద్రహోంశాఖకు తిప్పి పంపినట్టు ఆర్టీఐ దరఖాస్తుదారుకి ఈసీ సమాధానం ఇచ్చింది. అలాగే దీనికి సంబంధించి తదుపరి ఎలాంటి ఉత్తర ప్రత్యుత్తరాలు తమ దగ్గర లేవని ఎన్నికల సంఘం స్పష్టం చేసింది. కేంద్రం నుంచి 133 పేజీల దస్త్రం వచ్చినట్లు ఎన్నికల సంఘం అందులో వెల్లడించింది. ఒకవేళ అసెంబ్లీ స్థానాలను పెంచితే ఏపీలో ప్రస్తుతం 175 ఉండగా అవి 225కి, తెలంగాణలో 119 నుంచి 153కు చేరుతాయి. కానీ, నిబంధనల ప్రకారం.. నియోజవర్గాల పునర్విభజన ఎప్పుడంటే అప్పుడు జరగదు. దేశంలో పదేళ్లకోసారి జరిగే జనాభా లెక్కల ఆధారంగా నియోజకవర్గాల పునర్విభజన జరుగుతుంది. దీనికి రాష్ట్రపతి అనుమతి తప్పనిసరి. ప్రతి జనాభా లెక్కల తర్వాత నియోజకవర్గ పునర్విభజనకు చట్టం చేసే అవకాశాన్ని రాజ్యాంగంలోని 82వ అధికరణం పార్లమెంటుకు ఇస్తోంది. ఈ చట్టం ఆమోదించిన తర్వాత కేంద్ర ప్రభుత్వం నియోజకవర్గాల పునర్విభజనకు ఓ కమిషన్‌ ఏర్పాటు చేస్తుంది. ప్రస్తుతం 2026 వరకు నియోజకవర్గాల పునర్విభజన కుదరదు. 1991 జనాభా లెక్కల ప్రకారం జరిగిన నియోజకవర్గాల పునర్విభజన 2009లో అమల్లోకి వచ్చింది.

By July 25, 2019 at 09:26AM

Read More https://telugu.samayam.com/latest-news/state-news/rti-reveals-centre-effort-on-increase-of-assembly-seats-in-telugu-states/articleshow/70373031.cms