గ్రామ వాలంటరీ పోస్టుల భర్తీ ప్రక్రియపై హైకోర్టులో పిల్

ఆంధ్రప్రదేశ్ ప్రభుత్వం మొత్తం 4 లక్షల గ్రామ వాలంటీర్ పోస్టుల భర్తీచేపట్టిన విషయం తెలిసిందే. ఈ పోస్టులను కేవలం ఇంటర్వ్యూ ఆధారంగా భర్తీ చేస్తున్నారు. అయితే, వాలంటీర్‌ పోస్టులను ఇంటర్వ్యూ ప్రాతిపదికన భర్తీచేయడాన్ని సవాల్ చేస్తూ హైకోర్టులో ప్రజాప్రయోజన వ్యాజ్యం దాఖలైంది. ప్రతిభ ఆధారంగా భర్తీ చేయాలని అభ్యర్థిస్తూ రాష్ట్ర యువజన కాంగ్రెస్‌ అధ్యక్షుడు రాకేశ్‌రెడ్డి ఈ వ్యాజ్యాన్ని దాఖలు చేశారు. కేవలం మౌఖిక పరీక్ష ద్వారా వీటిని భర్తీ చేయడం తగదని, విద్యార్హత ఆధారంగా వెయిటేజ్‌ మార్కులు ఇవ్వాలని పిల్ పేర్కొన్నారు. అంతేకాదు, నియామకాలకు సంబంధించిన జీవో లోపభూయిష్టంగా ఉందని ఆరోపించారు. వాలంటరీ పోస్టుల భర్తీకి ప్రభుత్వం జారీచేసిన జీవో 104 అమలును నిలుపుదల చేయాలని రాకేశ్ రెడ్డి తన వ్యాజ్యంలో కోరారు. కాగా, ఏపీలో గ్రామ వాలంటీర్ పోస్టుల భర్తీ కోసం జులై 11 నుంచి ఇంటర్వ్యూలు నిర్వహిస్తున్నారు. మండల పరిషత్ కార్యాలయాల్లో జరుగుతోన్న ఈ ఇంటర్వ్యూలు జులై 25తో ముగియనున్నాయి. ఎంపికైన అభ్యర్థులకు ఆగస్టు 1న నియామక పత్రాలు అందజేయనున్నారు. వీరికి ఆగస్టు 5 నుంచి 10 వరకు నిర్దిష్ట అంశాల్లో శిక్షణనిచ్చి, ఆగస్టు 15న బాధ్యతలు అప్పగిస్తారు. గ్రామాల్లో ప్రతి యాభై కుటుంబాలకో వాలంటీర్‌ చొప్పున రాష్ట్రవ్యాప్తంగా నాలుగు లక్షల మందిని నియమిస్తున్నారు. గ్రామాల్లో సంక్షేమ, అభివృద్ధి కార్యక్రమాల అమలులో వలంటీర్లు కీలక భూమిక పోషించనున్నారు. ఈ వ్యవస్థ ఆగస్టు 15 నుంచి అమలులోకి వస్తుందని ముఖ్యమంత్రి జగన్‌మోహన్‌రెడ్డి ఇప్పటికే ప్రకటించారు.

By July 25, 2019 at 09:54AM

Read More https://telugu.samayam.com/latest-news/state-news/pil-against-grama-volunteer-posts-selection-process-in-ap-high-court/articleshow/70373436.cms