బాబుతో టీడీపీ ఎంపీలు భేటీ.. ట్వీట్ల వార్‌పై కేశినేనిని ప్రశ్నించిన అధినేత!
విజయవాడ ఎంపీ నాని, ఎమ్మెల్సీ బుద్ధా వెంకన్న మధ్య జరిగిన ట్వీట్ల యుద్ధానికి తాత్కాలికంగా తెరపడిన విషయం తెలిసిందే. ఇద్దరి మధ్య సోషల్ మీడియా వేదికగా పెద్ద యుద్ధమే నడిచింది. ఈ నేపథ్యంలో అధినేత చంద్రబాబుతో లోక్‌సభ సభ్యులు ఆదివారం భేటీ అయ్యారు. గుంటూరు ఎంపీ గల్లా జయదేవ్, విజయవాడ ఎంపీ కేశినేని నాని, శ్రీకాకుళం ఎంపీ కింజరాపు రామ్మోహన్ నాయుడు బాబుతో సమావేశమయ్యారు. ఉండవల్లిలోని నివాసానికి వచ్చిన ఈ ముగ్గురూ తాజా రాజకీయ పరిస్థితులపై చర్చించారు. చంద్రబాబుతో భేటీ అయిన విషయం ఎంపీ రామ్మోహన్ నాయుడు ట్విట్టర్ ద్వారా షేర్ చేసుకున్నారు. తమ అధినేత చంద్రబాబుతో పాటు గల్లా జయదేవ్, కేశినేని నానితో భేటీ అయ్యామని తెలిపారు. ‘అధినేత చంద్రబాబును కేశినేని నాని, గల్లా జయదేవ్‌తో కలిశాం.. మా మధ్య సమావేశం సహృద్భావ వాతావరణంలో సాగింది’ అంటూ ట్వీట్ చేశారు. ఈ సందర్భంగా బుద్ధా వెంకన్నతో జరిగిన ట్విట్టర్ వార్‌పై కేశినేని నానిని చంద్రబాబు ప్రశ్నించినట్లు తెలుస్తోంది. కాగా, ఒక దశలో చంద్రబాబును హెచ్చరించేలా కేశినేని ట్వీట్ చేశారు. తాను టీడీపీలో కొనసాగడం ఇష్టంలేకపోతే చెప్పండి పార్లమెంటు సభ్యత్వానికి, పార్టీకి రాజీనామా చేస్తానని, అలా కాకపోతే మీ పెంపుడు కుక్కల్ని నియంత్రించడంటూ ఘాటుగానే హెచ్చరించారు. ఇదే సమయంలో సీన్‌లోని వైసీపీ నేత పొట్లూరి వరప్రసాద్ ఎంటరయ్యారు. దీంతో బెజవాడ రాజకీయాలు ఒక్కసారిగా మరింత వేడెక్కాయి. అప్పటి వరకు టీడీపీ నేతలు ఎంపీ కేశినాని, ఎమ్మెల్సీ బుద్దాల మధ్య మాటల యుద్ధం నడిస్తే.. పీవీపీ ఎంట్రీతో ఆసక్తికరంగా మారింది. ఇద్దరు నేతలు ట్వీట్లతో ఒకరిపై మరొకరు దుమ్మెత్తి పోసుకున్నారు. ఇద్దరి మధ్య వార్ నడిచింది. ఓ ప్రబుద్ధుడితో అక్రమ సంబంధమంటూ కేశినాని ట్వీట్ చేస్తే.. అటు ఇటు కానోళ్లు, నిక్కర్లు అంటూ పీవీపీ కూడా రెచ్చిపోయారు.
By July 21, 2019 at 02:13PM
No comments