నేటి నుంచి తెలంగాణ అసెంబ్లీ.. ప్రత్యేకంగా ఆ బిల్లు కోసమే!

తెలంగాణలో కొత్త పురపాలక చట్టం ఆమోదం కోసం ప్రత్యేకంగా శాసనసభ సమావేశమవుతోంది. ఈ సమావేశాలు రెండు రోజుల పాటు జరగనున్నాయి. గురువారం ఉదయం 11 గంటలకు సమావేశాలు ప్రారంభం కానున్నాయి. గురు, శుక్రవారాలు రెండు రోజులు అసెంబ్లీ ప్రత్యేక సమావేశాలు జరగనున్న నేపథ్యంలో అధికార , ప్రతిపక్ష కాంగ్రెస్‌ సన్నద్ధమయ్యాయి. పరోక్ష పద్ధతిలో మేయరు, పురపాలక ఛైర్మన్ల ఎన్నికలు నిర్వహించేందుకు బుధవారం జరిగిన మంత్రివర్గ సమావేశంలో ఆమోదం తెలిపారు. కేసీఆర్ అధ్యక్షతన బుధవారం ప్రగతిభవన్‌లో దాదాపు అయిదున్నర గంటల పాటు జరిగిన మంత్రిమండలి సమావేశంలో కీలక నిర్ణయాలు తీసుకున్నారు. ఎన్నికల మేనిఫేస్టో‌లో హామీ ఇచ్చిన విధంగా పెంచిన పింఛన్లను జులై 20 నుంచి పంపిణీ చేయనున్నట్టు సీఎం వెల్లడించారు. నియోజకవర్గాల వారీగా కార్యక్రమాలు చేపట్టి అర్హులకు అందించాలని సూచించారు. సమగ్ర పట్టణాభివృద్ధి లక్ష్యంగా సమీకృత టౌన్‌షిప్‌లు ఏర్పాటు చేయాలని తెలంగాణ ప్రభుత్వం నిర్ణయించింది. నగరాలు, పట్టణాల్లో భూమి గరిష్ఠ వినియోగం లక్ష్యంగా ఈ విధానానికి రూపకల్పన చేసింది. వాస్తవానికి రెండేళ్ల కిందటే అవుటర్‌ రింగ్‌ రోడ్‌, మౌలిక సదుపాయాలను ఉపయోగించుకుని టౌన్‌షిప్‌లను ఏర్పాటు చేయాలని ప్రభుత్వం నిర్ణయించింది. దీనికి సంబంధించిన ముసాయిదా ఇప్పటికే సిద్ధం చేయగా తాజాగా మార్పులు చేసి చట్టంగా తీసుకురానుంది. Read Also: గురువారం ఈ బిల్లు శాసనసభ ముందుకు రానుంది. గృహ వసతి పెంచడం, అక్కడ మౌలిక సదుపాయాలు, సౌకర్యాలు కల్పించడం దీని లక్ష్యం. ప్రణాళికాబద్ధమైన అభివృద్ధికి ప్రభుత్వ భూములపైనే ఆధారపడకుండా ప్రభుత్వ-ప్రైవేటు భాగస్వామ్యంతో ప్రాజెక్టులు చేపట్టనున్నారు. రియల్‌ ఎస్టేట్‌ రంగంలో పెట్టుబడులకు ఇది మరింత అవకాశం కల్పించనుంది. 13 ఇంటిగ్రేటెడ్ టౌన్‌షిప్‌ల ఏర్పాటుపై దృష్టి సారించినట్లు ప్రభుత్వం గతంలోనే ప్రకటించింది. హెచ్‌ఎండీఏతో పాటు అన్ని మున్సిపల్ కార్పొరేషన్లు, మున్సిపాల్టీలు, పట్టణాభివృద్ధి సంస్థలకు ఒకే తరహా నిబంధనలుంటాయి. వంద ఎకరాలు, 50 ఎకరాలు, 25 ఎకరాల టౌన్‌షిప్‌లు నెలకొల్పుతారు. డెవలప్‌మెంట్‌ ఛార్జీలు, స్టాంపు డ్యూటీ, నాలా ఛార్జీలతో పాటు ప్రత్యేకంగా రాయితీలను ఇవ్వనున్నారు. మరోవైపు, ప్రభుత్వం ప్రవేశపెట్టబోయే నూతన చట్టంలోని అంశాలను పరిశీలించి, ఏమైనా అభ్యంతరాలుంటే వాటిని సభ ద్వారా ప్రభుత్వం దృష్టికి తీసుకువెళ్లాలని కాంగ్రెస్ నిర్ణయించింది. సానుకూలంగా స్పందించకుంటే ఏ విధంగా వ్యవహరించాలన్నదానిపైనా చర్చించి నిర్ణయం తీసుకుంటారు. సమావేశాలను మున్సిపల్‌ చట్టం ఆమోదం కోసం రెండు రోజులకే పరిమితం చేయకుండా వారంరోజులు నిర్వహించాలని ప్రభుత్వాన్ని కోరే అవకాశం ఉంది.

By July 18, 2019 at 09:40AM

Read More https://telugu.samayam.com/latest-news/state-news/two-days-special-sessions-of-ts-assembly-begin-today/articleshow/70271128.cms