నేడు నింగిలోకి చంద్రయాన్ -2.. లాంచ్ విండో నిమిషమే!

భారత అంతరిక్ష పరిశోధన సంస్థ () ప్రతిష్ఠాత్మకంగా చేపట్టిన చంద్రయాన్‌-2 ప్రయోగానికి సర్వం సిద్ధమైంది. ఇందుకు సంబంధించిన 20 గంటల కౌంట్‌డౌన్ ఆదివారం సాయంత్రం ప్రారంభమైంది. మరికొన్ని గంటల్లో జీఎస్‌ఎల్‌వీ-మార్క్‌3ఎం1 రాకెట్‌ ఉపగ్రహాన్ని నింగిలోకి తీసుకువెళ్లనుంది. సోమవారం మధ్యాహ్నం సరిగ్గా 2.43 గంటలకు నెల్లూరు జిల్లా శ్రీహరికోటలోని సతీశ్‌ ధవన్‌ స్పేస్‌ సెంటర్‌ షార్‌ రెండో ప్రయోగ వేదిక నుంచి చంద్రయాన్‌-2‌ను పంపనున్నారు. జీఎస్ఎ‌ల్వీ రాకెట్ 3.8 టన్నుల బరువుగల చంద్రయాన్‌-2 ఉపగ్రహాన్ని నిర్ణీత కక్ష్యలోకి ప్రవేశపెట్టనుంది. ప్రయోగ వేదిక నుంచి రాకెట్ బయలుదేరిన 16.13 నిమిషాల తర్వాత నిర్ణీత కక్ష్యలోకి ప్రవేశిస్తుంది. అనంతరం రాకెట్ నుంచి చంద్రయాన్‌-2 ఉపగ్రహం విడిపోతుంది. వాస్తవానికి ఈ ప్రయోగాన్ని జులై 15న తెల్లవారుజామున చేపట్టాల్సి ఉండగా ప్రయోగానికి 56 నిమిషాల ముందు క్రయోజెనిక్‌ ఇంజిన్‌లో సాంకేతిక లోపం తలెత్తిన విషయం గుర్తించి వాయిదా వేశారు. ఈ సమస్యను పరిష్కరించిన శాస్త్రవేత్తలు ప్రయోగానికి సిద్ధం చేశారు. చంద్రయాన్‌-2ను చంద్రుడి ఉపరితలంలోని దక్షిణ ధ్రువంలోకి ప్రవేశ పెట్టడమనేది అత్యంత క్లిష్టమైన అంశం. ఇస్రో అంతరిక్ష ప్రయోగాల్లో సంపూర్ణ నైపుణ్యం సాధించాలని కోరుకుంటున్న ముఖ్యమైన సాంకేతిక పరిజ్ఞానమిది. చంద్రుడిపై క్లిష్టమైన సాఫ్ట్‌ ల్యాండింగ్‌ కోసం ఇస్రో చేస్తున్న మొదటి ప్రయత్నమూ ఇది. ఆర్బిటర్‌ నుంచి ల్యాండర్‌, రోవర్‌ విడిపోయిన తరువాత 15 నిమిషాలు అత్యంత కీలకమైందని ఇస్రో శాస్త్రవేత్తలు అంటున్నారు. చంద్రయాన్-2 చంద్రుడిపై దిగిన తర్వాత అందులోని రోవర్‌ సెకనుకు సెంటీమీటరు వేగంతో 14 రోజుల పాటు పయనించనుంది. చంద్రుడి ఉపరితలంపై ఉన్న పదార్థాలను విశ్లేషించి సమాచారాన్ని, చిత్రాలను పంపనుంది. చంద్రుడిపై జల, ఖనిజాలు, రాతి నిర్మాణాల గురించి ఇది పరిశోధనలు చేయనుంది. ప్రస్తుతం చంద్రయాన్‌-2 ప్రయోగానికి అనువైన లాంచ్ విండో ఒక నిమిషమే కావడం విశేషం. ఈ స్వల సమయంలోనే ప్రయోగాన్ని విజయవంతంగా పూర్తిచేస్తామని ఇస్రో ఆత్మ విశ్వాసంతో ఉంది. లాంచ్ విండో తక్కువగా ఉన్నా గత 20 ప్రయోగాలను అనుకున్న సమయానికే అత్యంత కచ్చితత్వంతో పూర్తిచేసిన విషయాన్ని శాస్త్రవేత్తలు గుర్తుచేస్తున్నారు. జులై 15 తెల్లవారుజామున చంద్రయాన్‌-2ను ప్రయోగానికి 10 నిమిషాల లాంచ్‌ విండో అందుబాటులో ఉన్నాఆ రోజు అర్ధాంతరంగా నిలిచిపోయిన సంగతి తెలిసిందే.

By July 22, 2019 at 08:19AM

Read More https://telugu.samayam.com/latest-news/science-technology/isros-chandrayaan-2-launch-at-2-43-pm-today-countdown-still-continue/articleshow/70323311.cms