YS Jaganకు చెడ్డ పేరు తెచ్చా.. నా పదవికి రాజీనామా': వైసీపీ నేత సంచలన నిర్ణయం
పశ్చాతాపానికి మించిన ప్రాయశ్చిత్తం లేదంటారు పెద్దలు. ఏదైనా ఓ తప్పు చేస్తే.. ఆ తప్పును తెలిసుకొని సరిదిద్దుకోవడంకంటే మరో గొప్ప నిర్ణయం లేదు. ఓ వైసీపీ నేతకు చేసిన తప్పు తెలుసుకున్నారు.. తత్వం బోధపడటంతో.. పార్టీ అధినేతకు చెడ్డ పేరు తెచ్చానంటూ.. ఏకంగా తన ఛైర్మన్ పదవికి రాజీనామా చేశారు. కృష్ణా జిల్లా జగ్గయ్యపేటలో జరిగింది ఈ ఘటన. అసలు విషయానికి వస్తే.. జగ్గయ్యపేట మున్సిపల్ ఛైర్మన్ ఇంటూరి రాజగోపాల్ (చిన్నా)పై గతంలో కొన్ని పోలీసు కేసులు నమోదయ్యాయి. ఈ క్రమంలో రౌడీషీటర్స్ ఫోటోలు సేకరించేందుకు పోలీసులు ఫోన్లు చేసి ఫోటోలు తెప్పిస్తున్నారు. చిన్నాపై కూడా రౌడీషీట్ ఉండటంతో.. స్థానిక ఎస్సై ఆదివారం రోజు ఆయనకు ఫోన్ చేసి ఫోటో పంపాలని కోరారు. వెంటనే మున్సిపల్ ఛైర్మన్ చిన్నా.. తన అనుచరులతో పోలీస్ స్టేషన్ దగ్గరకు చేరుకున్నారు.. చొక్కా తీసేసి అర్ధనగ్నంగా బైఠాయించారు. నచ్చజెప్పేందుకు కానిస్టేబుళ్లు ప్రయత్నించినా వెనక్కు తగ్గలేదు. కొద్దిసేపటి తర్వాత సీఐ, ఎస్సైతో పాటూ మిగిలిన సిబ్బంది అక్కడికి చేరుకొని చిన్నాతో మాట్లాడే ప్రయత్నం చేశారు. ఈ క్రమంలో మున్సిపల్ ఛైర్మన్ పోలీసులతో దురుసుగా ప్రవర్తించారు.. వారిని దుర్భాషలాడారు. దీంతో పోలీసులు ఆయనతో పాటూ కొంతమంది అనుచరులపై మరో కేసు నమోదు చేశారు. ఈ వ్యవహారం జగ్గయ్యపేటలో హాట్ టాపిక్‌గా మారింది. మున్సిపల్ ఛైర్మన్ హోదాలో ఉన్న వ్యక్తి ఇలా ప్రవర్తించడంపై విమర్శలు వచ్చాయి. తనపై విమర్శలు రావడంతో చిన్నా వెనక్కు తగ్గారు. చేసిన తప్పును తెలుసుకొని సోమవారం రాత్రి పోలీసులకు బహిరంగంగా క్షమాపణలు చెప్పారు. జగ్గయ్యపేట ఎమ్మెల్యే సామినేని ఉదయభాను పౌర సన్మాన కార్యక్రమంలో.. తన ప్రశ్చాత్తాపాన్ని తెలియజేశారు. వైసీపీ అధినేత జగన్.. తనకు మున్సిపల్ ఛైర్మన్ పదవి ఇచ్చిన స్థానిక ఎమ్మెల్యే ఉదయభానుకు చెడ్డ పేరు తెచ్చానని బాధపడ్డారు. అందర్ని క్షమాపణ కోరారు. పోలీసుల పట్ల కావాలని అనుచితంగా ప్రవర్తించలేదన్నారు. తన పదవికి రాజీనామా చేస్తు ఎమ్మెల్యే ఉదయభానుకు రాజీనామా పత్రాన్ని సమర్పించారు. మరి ఈ రాజీనామాపై వైసీపీ ఎలాంటి నిర్ణయం తీసుకుంటుందన్నది ఆసక్తిగా మారింది.
By June 25, 2019 at 12:55PM
No comments