తెలుగు సీరియల్ నటి మిస్సింగ్.. వారం రోజులుగా లేని ఆచూకీ
పలు తెలుగు సీరియళ్లలో నటిస్తున్న లలిత అనే నటి అదృశ్యం కావడం హైదరాబాద్‌లో కలకలం రేపింది. లేడీస్ హాస్టల్‌లో ఉంటూ షూటింగులకు వెళ్తున్న ఆమె వారం రోజులుగా కనిపించకుండా పోయింది. దీంతో తల్లిదండ్రులు ఎస్సార్నగర్ పోలీసులకు ఫిర్యాదు చేశారు. అనంతపురం జిల్లా ధర్మవరానికి చెందిన లలిత(27) యాక్టింగ్‌పై మక్కువగా కొన్నాళ్ల క్రితం హైదరాబాద్ వచ్చింది. ఆమెకు వివాహమై ఓ బాబు ఉన్నాడు. అయితే కుటుంబ కలహాల నేపథ్యంలో భర్త నుంచి వేరుపడిన లలిత సీరియల్స్‌లో నటించేందుకు చేరుకుంది. అమీర్‌పేటలోని రాజరాజేశ్వరీ ఉమెన్స్ హాస్టల్‌లో ఉంటూ షూటింగులకు వెళ్లేది. ధర్మవరంలో ఉన్న తల్లిదండ్రులు లలితకు వారం రోజులుగా ఫోన్ చేస్తుండగా స్విచ్ఛాఫ్ వస్తోంది. దీంతో కంగారుపడిన వారు హైదరాబాద్ చేరుకుని హాస్టల్‌లో ఆరా తీశారు. లలితను వారం రోజుల క్రితం ఓ వ్యక్తి హాస్టల్ నుంచి తీసుకెళ్లాడని, అప్పటి నుంచి ఆమె తిరిగి రాలేదని హాస్టల్ నిర్వాహకులు, రూమ్‌మేట్స్ చెప్పారు. దీంతో ఆమె తల్లిదండ్రులు తమకు తెలిసిన వారి వద్ద ఆరా తీసినా ఫలితం లేకపోయింది. చేసేదేమీ లేక బుధవారం ఎస్సార్నగర్ పోలీస్‌స్టేషన్‌కు వెళ్లి తమ కుమార్తె కనిపించడం లేదని ఫిర్యాదు చేశారు. దీంతో పోలీసులు కేసు నమోదు చేసుకుని దర్యాప్తు చేపట్టారు. భర్తకు దూరంగా ఉంటున్న లలిత ఓ వ్యక్తితో ప్రేమలో ఉన్నట్లు వార్తలొస్తున్నాయి. లలిత అతడితోనే వెళ్లిపోయిందా? లేక ఎవరైనా ఆమెను బలవంతంగా తీసుకెళ్లారా? అన్న కోణంలో పోలీసులు దర్యాప్తు చేపట్టారు. లలిత బస చేసిన హాస్టల్ వద్ద సీసీ కెమెరా పుటేజీని పరిశీలిస్తున్నారు. ప్రేమ, కల్యాణ వైభవం, స్వర్ణ ఖడ్గం తదితర సీరియళ్లలో లలిత నటిస్తున్నట్లు కుటుంబ సభ్యులు చెబుతున్నారు.
By June 27, 2019 at 10:33AM
No comments