Ukraine War నీరుగారి ఆశలు.. ఉక్రెయిన్-రష్యా చర్చలు అసంపూర్ణం
రష్యా ఉక్రెయిన్ యుద్ధం విషయంలో సోమవారం కీలక పరిణామం చోటుచేసుకుంది. ఇరు దేశాలూ శాంతికి తొలి అడుగులు వేయడంతో ప్రపంచం కాస్త ఊరట చెందింది. అయితే, అందరూ ఊహించనట్టుగానే ఎటువంటి ఒప్పందానికి రాకుండానే చర్చలను ముగించాయి. దాదాపు 5 గంటల పాటు చర్చలు జరిగినా.. ఇరు దేశాల మధ్య ఎలాంటి ఒప్పందం కుదరలేదు. తక్షణం యుద్ధాన్ని విరమించాలని ఉక్రెయిన్ డిమాండ్‌ చేసింది. రక్షణ మంత్రి, అధ్యక్షుడి సలహాదారు ఇతర ఉన్నతాధికారులు ఉక్రెయిన్ నుంచి హాజరుకాగా.. రష్యా అధ్యక్షుని సాంస్కృతిక సలహాదారు, మాజీ మంత్రి వ్లాదిమిర్‌ మెడిన్స్కీ నేతృత్వంలో ఆ దేశ బృందం హాజరైంది. చర్చలను రష్యా ఎలా చూస్తోందో చెప్పడానికి ఇదే నిదర్శనమని విశ్లేషకులు అంటున్నారు. ప్రాథమిక డిమాండ్లపై ఇరువర్గాలు తమ పట్టు సడలించపోవడంతో చర్చల్లో ఎలాంటి ముందడుగు పడలేదు. త్వరలోనే మరో విడత సమావేశం జరగవచ్చని భావిస్తున్నారు. అటు, ప్రత్యేక విధానం ద్వారా తమ దేశాన్ని వెంటనే ఐరోపా సమాఖ్య (ఈయూ)లో చేర్చుకోవాల్సిందిగా కోరుతూ సంబంధిత దరఖాస్తుపై ఉక్రెయిన్ అధ్యక్షుడు జెలెన్‌స్కీ సంతకం చేయడం కీలక పరిణామం. ఇది ఉద్రిక్తతలకు మరింత ఆజ్యం పోయొచ్చన్న విశ్లేషణలూ వెలువడుతున్నాయి. దరఖాస్తు చేస్తున్న ఫొటోను స్వయంగా అధ్యక్షుడే పత్రికలకు విడుదల చేశారు. సోమవారం రష్యా దాడులకు కొంతమేర విరామం లభించింది. శాంతి చర్చల నేపథ్యంలో రష్యా ఒక్కసారిగా దూకుడును తగ్గించింది. ఉక్రెయిన్ బలగాలు కూడా సంయమనం పాటిస్తున్నాయి. ఉక్రెయిన్ సంక్షోభంపై ఐరాస రెండు కీలక సమావేశాలు నిర్వహించింది. వాటిలో రెండు దేశాల ప్రతినిధులు వాగ్వాదానికి దిగారు. రష్యా యుద్ధోన్మాదాన్ని వ్యతిరేకిస్తూ వివిధ దేశాలు విధించిన ఆర్థిక ఆంక్షల ప్రభావం ఆ దేశంపై ఇప్పుడిప్పుడే మొదలయ్యింది. మరోవైపు, జెనివా తీర్మానంలో నిషేధించిన వ్యాక్యూమ్ బాంబులను రష్యా వినియోగిస్తోందని అమెరికాలో ఉక్రెయిన్ రాయబారి ఒకాసనా మార్కారోవా ఆరోపించారు. అమెరికా కాంగ్రెస్‌లో మార్కారోవా మాట్లాడుతూ.. ‘‘సాధారణంగా జెనివా తీర్మానంలో నిషేధించిన వ్యాక్యూమ్ బాంబులను రష్యా వాడుతోంది.. ఉక్రెయిన్‌కు భారీ నష్టం కలిగించడానికే ప్రయత్నిస్తోంది’’ అని అన్నారు. యుద్ధాన్ని ముగించడానికి తన వంతు చేయూత అందించడానికి వాటికన్ సిటీ కూడా ముందుకు వచ్చింది. చర్చలకు ఎప్పుడూ ఆస్కారం ఉంటుందని, ఈ విషయంలో తమ సేవల్ని పొందవచ్చని వాటికన్ సిటీ వర్గాలు తెలిపాయి. తక్షణమే సైనిక దాడులను ఆపేయాలని హితవు పలికింది. వాటికన్ స్టేట్ కార్డినల్ పైట్రో పరోలిన్ మాట్లాడుతూ.. ఉక్రెయిన్‌కు వ్యతిరేకంగా రష్యా యుద్ధాన్ని ప్రారంభించినప్పటికీ చర్చలకు ఎల్లప్పుడూ అవకాశం ఉందని వ్యాఖ్యానించారు. రష్యా-ఉక్రెయిన్ మధ్య ఏర్పడిన సంక్షోభాన్ని నివారించడానికి వాటికన్ దౌత్యం ప్రభావం చూపుతుందని యుద్ధం ప్రారంభానికి 10 రోజుల ముందు వాటికన్ సిటీలో ఉక్రెయిన్ రాయబారి అన్నారు. ఈ నేపథ్యంలో వాటికన్ చర్చల మధ్యవర్తిత్వానికి ముందుకు రావడం విశేషం.
By March 01, 2022 at 07:40AM
No comments