Breaking News

మిరాకిల్.. పోగొట్టుకున్న పెళ్లినాటి ఉంగరం 50 ఏళ్ల తర్వాత దొరికింది!


ఓ మహిళ పోగొట్టుకున్న ఉంగరం తిరిగి దాదాపు ఐదు దశాబ్దాల తర్వాత ఆమె చెంతకు చేరింది. ఉంగరం పడిపోయిన ప్రాంతంలో ఓ వ్యక్తి మెటల్‌ డిటెక్టర్‌ సాయంతో మూడు రోజులపాటు తీవ్రంగా వెతికి చివరకు దాన్ని కనిపెట్టడం విశేషం. బ్రిటన్‌ సమీపంలోని ఔటర్ హెబ్రైడ్స్‌ దీవి వెస్ట్రన్ ఐల్స్‌లో ఈ ఆసక్తికర ఘటన వెలుగులోకి వచ్చింది. పెగ్గీ మాక్‌స్వీన్‌ (86) దాదాపు 50 ఏళ్ల కిందట తన ఇంటి ఆవరణలో బంగాళదుంపలు సేకరిస్తుండగా ఆమె వేలికి ఉన్న పెళ్లినాటి ఉంగరం జారిపోయింది. దీంతో ఆ చుట్టుపక్కలా వేతికింది. ఎంత వెతికినా ఉంగరం జాడ కనిపించకపోవడంతో ఇక దొరకదని నిర్ణయానికి వచ్చి ఆశ వదులుకుంది. ఇటీవల ఈ విషయం తెలుసుకున్న మెటల్ డిటెక్టరిస్ట్ డొనాల్డ్ మాక్‌ఫీ.. ఆ ఉంగరాన్ని వెతికిపట్టేందుకు రంగంలోకి దిగాడు. ఆమె ఎక్కడయితే ఉంగరాన్ని పొగొట్టుకున్నారో ఆ ప్రాంతంలో మెటల్ డిటెక్టర్ సాయంతో వెదకడం ప్రారంభించాడు. ప్రస్తుతం గడ్డి మైదానంగా మారిన లినిక్లేట్‌ మాంఛైర్‌లో మూడు రోజులు పాటు వెతికి అనుకున్నది సాధించాడు. దీనిపై మాక్‌ఫీ మాట్లాడుతూ.. ఇది కొంచెం భావోద్వేగంగా ఉందన్నారు. ఉంగరం పోగొట్టుకున్న ప్రాంతం మద్యం ప్రియులకు ముఖ్య కేంద్రంగా గుర్తింపు పొందిందని తెలిపారు. మొత్తం 5 వేల చదరపు మీటర్ల పరిధిలో 90 గంటల పాటు శోధించిన తర్వాత ఉంగరం లభించిందని పేర్కొన్నారు. ‘‘మూడు రోజులపాటు దాదాపు 5 వేల చదరపు మీటర్ల పరిధిలో వెతికాను. సుమారు 90 గుంటలు తవ్వాను. బంగారు ఉంగరాలు, అదే ఆకారంలోని రింగ్‌ పుల్స్‌ను గుర్తించినప్పుడు మెటల్‌ డిటెక్టర్‌ ఒకే విధమైన ధ్వని చేస్తుంది. దీంతో కాస్త ఇబ్బంది ఎదురైంది. అటువంటివి చాలానే వచ్చాయి. గుర్రపు నాడాలు, డబ్బాలు తదితర వస్తువులూ బయటపడ్డాయి. కానీ, మూడో రోజు నాకు ఉంగరం దొరికింది. నేను ఆశ్చర్యపోయాను.. లక్షలో ఒక కేసులో మాత్రమే ఇది సాధ్యపడుతుంది. ఖచ్చితంగా నా ఉత్తమ అన్వేషణల్లో ఇది ఒకటి. అదృష్టం కూడా కలిసొచ్చింది’’ అని మాక్‌ఫీ వివరించారు. ఉంగరాన్ని ఆమెకు అందజేయగానే సంభ్రమాశ్చర్యానికి గురయ్యారని, దానిని తన వేలికి పెట్టుకోగా సరిగ్గా సరిపోయిందని అన్నారు. ఇక మాక్‌స్వీన్ ఆనందంతో ఉబ్బితబ్బుబ్బి అయ్యారు. ‘‘ఆయన నా దగ్గరకు వచ్చిన తర్వాత మీ చేతిలో ఏదైనా ఉందా అని అడిగాను.. ఉంగరం చూపించగానే నేను నమ్మలేకపోయాను, కానీ నేను మళ్లీ చూస్తాను అనుకోలేదు.. ఆ రోజున నా చేతి గౌజుల్లో నుంచి ఉంగరం అదృశ్యమైంది. నేను ఇంటికి వచ్చే వరకు ఉంగరం పోయిందని నాకు తెలియదు.. దాని కోసం రెండు మూడు రోజులు వెతికాను గానీ కనిపించలేదు’’ అని అన్నారు.


By December 05, 2021 at 07:25AM


Read More https://telugu.samayam.com/latest-news/international-news/woman-reunited-with-wedding-ring-she-lost-50-years-ago-in-england/articleshow/88099558.cms

No comments