AP Cinematography Bill: సినీ ఇండ‌స్ట్రీకి ఏపీ స‌ర్కార్ షాక్‌.. బెనిఫిట్ షోలు ఉండవు.. ప్ర‌భుత్వ నిబంధ‌న‌ల మేర‌కే టికెట్ రేట్స్: మంత్రి
ప్ర‌భుత్వం సూచించిన ధ‌ర‌ల‌లోనే సినిమా టికెట్స్‌ను ప్ర‌జ‌ల‌కు అందుబాటులోకి తీసుకొచ్చేలా ఆన్ లైన్ టికెటింగ్ సిస్ట‌మ్‌ను తీసుకు వ‌స్తున్న‌ట్లు మంత్రి తెలిపారు. దీనికి సంబంధించిన చ‌ట్ట స‌వ‌ర‌ణ బిల్లును ఆయ‌న ప్ర‌వేశ పెట్టారు. అందులో భాగంగా బెనిఫిట్ ఫోస్ ఉండ‌వ‌ని, ప్ర‌భుత్వం నిర్ణ‌యించిన ధ‌ర‌ల్లోనే టికెట్ రేట్స్ ఉంటాయ‌ని ఆయ‌న తెలిపారు. బుధ‌వారం మంత్రి పేర్ని నాని అసెంబ్లీలో మాట్లాడుతూ ‘‘పేద, మ‌ధ్య త‌ర‌గ‌తి వ‌ర్గాలంద‌రికీ ప్ర‌ధాన వినోదాత్మ‌కంగా ఉంటున్న సినిమా మాధ్య‌మాన్ని, దుర‌దృష్ట‌వ‌శాత్తు ప్ర‌స్తుతం పేద, మ‌ధ్య త‌ర‌గ‌తుల్లో సినిమాపై ఆపేక్ష‌ను, మ‌మ‌కారాన్ని సొమ్ము చేసుకునేదానికి ఎక్కువ మంది న‌డుం క‌డుతున్న సంద‌ర్భం. ప్ర‌భుత్వ నిర్దేశిత రేట్ల ప్ర‌కారం ఉన్న‌టువంటి రేట్లకు కాకుండా ఎక్కువ రేట్లకు టిక్కెట్స్‌ను అమ్ముతున్నారు. రోజుకి నాలుగు షోల‌ను మాత్ర‌మే వేయాల‌ని చ‌ట్టం చెబుతుంది. కానీ సూర్యుడు లేవ‌క‌ముందే షో వేయ‌డం. ఆ షోలో ఒక్కొక్క ప్రేక్ష‌కుడి ద‌గ్గ‌ర ఒక్కొక్క ర‌కంగా ఇష్టా రాజ్యంగా టిక్కెట్ ధ‌ర‌ను నిర్ణ‌యించి వ‌సూలు చేసి పేద, మ‌ధ్య త‌ర‌గ‌తి ప్రేక్ష‌కుల ఇష్టాన్ని సొమ్ము చేసుకుంటున్నారు. నాలుగు షోలు వేయాల్సిన థియేటర్స్‌లో ఆరు, ఏడు, ఎనిమిది.. షోలు ప్ర‌ద‌ర్శిస్తున్నారు. సినిమా అంటే మాకు ఎదురుండ‌కూడ‌దు. సినిమా ప‌రిశ్ర‌మ‌లో మేం చేసినా ఎదురుండ‌కూడ‌దు. చ‌ట్టాల మ‌మ్మ‌ల్ని ఆప‌వు అనే పోక‌డ‌లు ఉండ‌టాన్ని ఇప్పుడు మ‌నం చూడొచ్చు. అలా ఉండకుండా టిక్కెట్టు రేట్స్ పెంచేసి ప్ర‌జ‌ల బ‌ల‌హీన‌త‌ల‌ను సొమ్ము చేసుకోకుండా క‌ట్ట‌డి చేయ‌డానికి ఆన్ లైన్ ద్వారా టిక్కెట్ వ్య‌వ‌స్థ‌ను తీసుకు రావాల‌ని అనుకుంటున్నాం. దీని వ‌ల్ల ప్ర‌జ‌ల‌కు మేలైన సౌకర్యం క‌లుగుతుంది. సినిమాటోగ్ర‌ఫీ చ‌ట్టంలో మార్పు తీసుకు రావ‌డం వ‌ల్ల ప్ర‌జ‌ల‌కు మేలు క‌లుగుతుంది. నిర్మాత‌లు ఇది వ‌ర‌కు విడుద‌లైన సినిమాల విష‌యంలో చెప్పిన క‌లెక్ష‌న్స్‌కు, ప్ర‌భుత్వానికి వ‌చ్చిన ట్యాక్స్‌కు ఎక్క‌డా పొంత‌న ఉండ‌టం లేదు. అందుక‌నే ఆన్‌లైన్ టికెటింగ్‌ను తీసుకొస్తే, ప్ర‌భుత్వానికి రావాల్సిన ట్యాక్స్‌ల‌ను ఎవ‌రూ కూడా దాచే ప‌రిస్థితి ఉండ‌దు. ప్ర‌భుత్వం ఆలోచ‌న‌న‌ను కూడా కొంద‌రు త‌ప్పుప‌డుతున్నారు. ఇందులో స్టేక్ హోల్డ‌ర్స్‌గా ఉన్న థియేట‌ర్స్ య‌జ‌మానులు, డిస్ట్రిబ్యూట‌ర్స్‌, నిర్మాత‌ల‌కు ఇబ్బందులు లేవు. ఇబ్బంద‌ల్లా కొన్ని రాజ‌కీయ పార్టీల‌కు, వారిని కొమ్ము కాసే మాధ్య‌మాల‌కు మాత్ర‌మే. ఇది 100 శాతం ప్ర‌జ‌ల‌కు అందుబాటులో ఉప‌యోగ‌ప‌డే వ్య‌వ‌స్థ ఇది. ఈ ఆన్‌లైన్ టికెటింగ్ పోర్టల్‌ను ప్ర‌భుత్వం నిర్వ‌హిస్తుందే త‌ప్ప.. దాని వ‌ల్ల వ‌చ్చిన డ‌బ్బుల‌ను ప్ర‌భుత్వం త‌న వ‌ద్ద ఉంచుకోదు’’ అన్నారు. ఆన్ లైన్ టికెటింగ్ వ్య‌వ‌స్థ‌ను వ్య‌తిరేకిస్తూ వ‌చ్చిన వారికి ఇది పెద్ద షాకింగ్ న్యూస్‌. అలాగే ఆంధ్రప్ర‌దేశ్ ప్ర‌భుత్వం టికెట్ రేట్స్‌ను పెంచుతుంద‌ని భావిస్తూ వ‌చ్చిన పెద్ద నిర్మాత‌ల‌కు కూడా ఈ నిర్ణ‌యం శ‌రాఘాతంగా మారింద‌నే చెప్పాలి.
By November 24, 2021 at 04:49PM
No comments